1 AsAng we" jhaung zug: wa ni" kheim: so' qam: o" yang ngaui bau" na mung: Ni" khyaid' yu: khyo re khoqhi" ngaui bau: ngaui lho" ra" i"?.2 Yao: myid: o: ra" khyo: nao byid' ava". Yao" nhaid' thoe: yang mho' yao: rure tae" gyo: byid' ava".3 Gai lho" ra" min jhaung: yao: re byid' va" ra". Hhang gyang" lhugmaug yao: re zhaung: byid' ava".4 Yao: wa kao so' mho' mung: AsAng wa yao: re kao qhang myo, myi: jhaung: byid' ava".5 Yao: wa phung bao kheim: so' qi: mung: khyaid' yu: ra" khyo" yang ni" lo, mae" phung qab bao re the' khae: yu: ava".6 AsAng wa yao: re apyaid ato: tau: jaung: to: mung: , Ni" myo, nho nga: lao" mathao: yang yao: re ngaui bau: nhao: ra".7 Pe" mung: ein: re yao: wa Mo"so re khug ngha mung: , myhao: thao" ra" Mo"so: jeju mae qo" daui lab nae" ngaid:8 Ni" lo, wa nao re tau: lhain" ra" gyevo qe khe' myhi mung: nao re manug nhung: ra" mo, re lo, yo lo; yang qo" myhi: yu: li" nae".9 Nao yao: bam re khyeim" mo" myi: ru: poe" byid: nae" ngaid: ra". Mo"so wa yao: nhag' yo" gyid' ru: yang yao: bam re myug: pye' li" nae". Myi: ru: yao: bam re ngha" jheim" pye' li" nae".10 Mug: myid: dao mae" yao: bam: amyu" mae" re: yao: bam: byu boe: qe: khug mae" yao: zo: bam re zai" kain" pye' li" nae".11 Khoru: ga" re yao: bam wa ni" akhyo re magai: ra" khyo" tau" da mung: magai: ra" khyo" juyi khyug' ko" qere: ma aung myaug ko" ngaid: ra".12 Nao wa yao: bam: la: myo: we' yao" myo, khung: mae thaung: qang byid: mung: yao: bam nhaung thao" phaug' lo" li" genae".13 Mo"so we" AsAng: kheim: so' qam: o: khyo" nga: qo" ru jo; na veshao: wo". Ngo nhaung" wa ni" phung bao re caung: khin" caung: nghaui" na nae".