1 Nga" qam: o: Mo"so we" AsAng re ngo jhid' de; ra".2 Mo"so wa nga" laung: mo" baui , nga" AsAng ,ngo re khyi: lhoe' yu: ra" Mo"so , ngo khug ngha: zho: cang yham , ngo re khyaid' yu: ra" khyug lam: khug ngha gyebyu gai" ngaid: ra".3 Caung: khin" gai: ra" Mo"so mae ngo mho' mung: gyevo: lo, mae" khyaid' lhoe' yu: ru qhug' va".4 Shid: ra" taui: jham ngo re lhang" gam: kham" to: ko" mung: makhyang" ra" qid moe bug jham: yang ngo re kyaug' ko" ra".5 Mo:vo: mug: taui: wa ngo re lhang" kham" gam" to: mung: shid zug' taui: kheim" yang ngo re myi" va".6 Ngo qug: khai" ru mae Mo"so re khai: yu mung: nga" Mo"so re mho' yao va". Yao" pa" jhaung: yham mae" yao: nga" thoe re tae" gyo: mung: ngo mho' yao: ra" dao: thoe yao" no: mae vao va".7 Ai: au: mug: myid laui: mung: nain" na va". Bam jham apain aqao: laui" nin" na: ra". Yao" nhag' laung: ra" mathao ai re" ru: nin" laui" na: ru ngaid: ra".8 Yao" nhaid' mae" myi: khug' thug' mung: yao" nhaid' khug mae" myi: de; thug' li" mung: myi: gyoe: gyai zu" ra".9 Mug: gaung mae" gam" goe; ke' mung: gyo" li" ra".Yao" khuvo: gyid' mae mug: tang: caid' boe" jo; ra".10 Kherubim: dao mae jui: yang: dao" qin" ra". La hug' daung fo' adao mae bodao" qin" ra".11 Yao: wa mug: caid' khug mae vho' na mung: qid je" au: we' nhag' qhid' thaui" yang yao: re nghoe' gam: li" ko" ra".12 Yao" qhid' au: mae bao qhi: ru: yang jham no; thaui: mae" lag qu we' myi: gyoe: dao" thug' lo" ko" ra".13 Mo"so wa mug: gaung mae" lhe' caid' mug: dam: thoe ke' mung: myhao: thao" ra" yaug wa thoe mo" thaid' ke' ra".14 Yao: myo: khe' re bag: ke' mung: yao: bam re khyi" khao: ngo" khyo pyo: sin" ke' ra".15 Alao" Mo"so wa she: ke' ra" so' mathao mae qid mang: kao" we' mug: myid apain aqao: jham pug: thug' li" ra".16 Tho' zhao" myhao mae" lo, yheim" qang: ke' mung: thin: ra" moe dang: mae" ngo re xoe: yu va".17 Qam: gai: ra" yaug we" ngo re manug nhung: ra" lo, mae" ngo re khyi: khyaid' yu va".18 Qug: khai: qhug' ra" ayo, mae yao: bam ngo re tam" kyo" ko" qere: Mo"so wa ngo khug ngha jao: ngaid mung: ,19 Ngo re dau: ra" jo, qo khyo she: thug' yu mung: ngo re o ngaui yang: khyaid' lhoe' ke' byid: va".20 Ngo dang main: za: ngaid: na mung: Mo"so ngo re so' ha" nhao mung: nga" lo, shao lho" rure: yao: the' myao byid' ava".21 Pe" mung: ein: re ngo Mo"so: khyo dang mae khonhae" re: su" na mung: nga" Mo"so re shaid' nghung" pye' ru mabo.22 Yao" dao: phyid' ru alhab' wa nga" myo, qao: tae mae ngaid: ra". Yao" pin dao: kheim: jham re ngo vha: pye' nae" mangaid:.23 Mo"so: qhid' kheim: mae ngo qobo made, mung: magai: ra" khyo dang re jao" pye'na va".24 Airu: mung: Mo"so wa nga" dang main" ru we' yao" myo, jid' yang the' myao: ra" nga" lo, shao lho" ru we' dakhyo: Mo"so ngo re jeju byid' ava".25 Nhag' myain: ba yaug re nhag' myain" ru qu" byid' ava". Nhag' kao" vao" yaug re nhag' kao" vao" rure qu" byid' ava".26 Shao lho" ra" yang re: shao lho" ra" myid qu" ava". Kaung: kag' kaid' mo, re jhid' to: byid' ru qhu" va".27 Nyham: khyo" yaug re khyaid' yu mung: ngaid beim: nghao" ra" myo, nho nga: lao: re khyoe' pye' byid' ra".28 Gai gai: yao: AsAng wa nga" myi: dam re te' byid' ra". Nga" AsAng Mo"so wa nga" mug: caid' re bao byid' ra".29 Ngo wa AsAng mae khug ngha mung: gye qe, qo" phyo' pye' va". Nga" Mo"so re lam yang vo kham" re qo" lhoe" lai nhao va".30 Mo"so: lo, mau" wa khoqhi" jab byang" ra" i"?. Mo"so re lag yu: qu" re dang: ra". Yao: wa yao: re lam khug mo; no: qo ngaid: ra".31 AsAng mae" lai yang getau: Mo"so na lo" i"?. Ngonhaung" Mo"so mae" lai yang: getau khag' na shi" i"?.32 Ai: Mo"so wa ngo re qam: o: phyid' cui: cui: byid: mung: ngo ye" lo" ra" khyo dang re gug: gam byid' na: ra".33 Ngo re xe' khyid ru: mye, nhao mung: myhao: ra" jo, qo mae ngo re yhe' nha: to" ra".34 Yao: nga" lo, re gye mau" mho" byid: mung: gyid: la: re ngo qo" lao" thaung va".35 Ni" khyaid' yu: ra" go ngo re nao byid' ava". Ni" lo, yo lo; yang ngo re bao" thaug' byid' ra".36 Ngo ye" lo" nae" khyo dang re zin" khyaid' sho' khyo" pye' mung: majhaid' lang: nae" tau: nyhang" byid' ra" mathao mae ,37 Ngo wa gyevo re cao" khe' myhi mung: yao: bam re maqo" phyo' qheim" pye' pye' wa madam: tug' vao lo nae".38 Yao: bam nga" khyid' qao: mae gyang: lang: mung: maqo" to" ye, lo: sho' ngo yao: bam re nhau" nae".39 Mo"so ngo re gye khe' mau" qam: o: phyid' cui: cui: byid: mung: ngo we' tug' shai" ra" mo, re ngo qo"aung va".40 Ngo re manug nhung: ra" mo; lang zang: re ngo re qhaug' mung: phyo' qheim" pye' nae" akhang" re byid' to: gau va".41 Yao: bam mho' yao ko" ngaid yang: re: khyaid' nae" su mana. Mo"so re hug' yao ko" qere AsAng matau: byid:.42 Ai: ayo, mae ngo yao: bam re la ci: dao" lo: ra" phaui: lhug re"ru: ngo yao: bam re nau" nau" phaui: mhain" mung: boesaid re" ru: khyo dang khain mae shepye' to: nae".43 Ai: amyu" yang gye makhyaid' she mae" ngo re khyi: yu mung: labug amyu" qe: dao mae ug nhao: ra". Ngo re maba: ra" amyu" qe re: nga" mang: byu boe" lo veko".44 Nga" dao: thoe re the' gyo: lao" jao" yao: gyo" yu ko" ra". Yao: bam: zo: dau qe wa ngo re mho' bain: ko" ra".45 Mai: lo" byaug ko" mung: khug ngha jao: jo, qo mae" gyaug: nin" thug' lo" ako".46 Mo"so wa kao daui: na: ru mung: nga" laung: mo" baui mae nga: lho" shao: wo". Ngo re khyaid khyi yu: ra" Mo"so mae nga: yhe' byid' ru qhug' na veshao: wo".47 Nga" shaid' mae dang main: taung" dao: phyid' byid: mung: byumyu" qere nga" akhyid mae to" to: byid' ra" Mo"so wa nga: ye; na veshao: wo".48 Gyevo: lo, mae" ngo re khyaid' lhoe' yu va". Ngo re tau: lhain" ra" mo; tho' khyo ngo re tau: to' yhe' mung: lhaid' zo: phyo' zo: mo; lo, mae" khyaid' lhoe' yu va".49 Aimung: Mo"so we" ngo wa getau: byumyu" qe mae jeju re caung: khin" mung: AsAng: mang khyao: re caung: nghaui" caung: khin" na nae".50 Mo"so wa yao: tau: to' to" ra" jhaung zug: re khyaid' khyi: yu: khyo gekai: lai kaid' ava".Gekai: lai yao: xau gyain: byid' ra" yaug ga" ra" Davi wa yao" amyu" anyaug re ma thain: thoe: jeju aci: qhu" byid' na shao: wo".