1 Mo"so we" ngo re gug: gam: yu la, wo". AsAng mae khug ngha: na nae".2 Nao wa nga" AsAng ngaid: ra" ein: ngo Mo"so re mho va". Nao mae" lai yang: nga" tau: getau na gai jao: majo, lo: ,3 Myid gaung: dao na ko" ra" shaogyang" mo, we' lam: lang" ra" mo, re za: angaui: ra".4 Getau: khyo khe' khyo" cao" tao" ra" mo, wa kyi" khyag' phau: genae". Yao: bam: sa: phaid' ngaui" ra" jao: mae ngo bobo nae" mangaid:. Yao: bam: moso: mang khyao: re ngo pe" ta" cang mabo.5 Mo"so wa nga" jao khae aso: we' nga" zo: shaug' ja: re: ngaid: ra". AsAng wa nga" jo, nho" Ma re gam caung byid' na: ra".6 Ngo sang: ra" mug: kyo: wa yaug yo: ra" jo, qo mae ang mung: gai: thao" ra" jao khae aso: min re qo" the' khae: yu va".7 Ngo re caung gam: ra" AsAng re ngo nga: yhe' byid: nae". Myi" mae lao" re: nga" nhag' lam: re nhug' peim: byid' na: ra".8 Mo"so re ngo khonhae" re: myid: beim" na nae".Pe" mung: ein: re nga" lo, yo shaid' mae yao: na: na yang: ngo daui lab nae" made, lo:.9 Aimung: nga" nhag' myid ngaui bau: yang: solo re: yaug yo: ra".Nga" sho: re myid: lao" na mung: vao: ab' nae".10 Pe" mung: ein: re AsAng wa solo re movo: mug: mae shelhaui" to: nae" mangaid:. AsAng wa shao gyang" yaug re bab: nhau: lo" ru maboe" nhao lo:11 Kao daui: ra" khyo dang khyo jhui" ceim" shid' li" nae". AsAng: khug mae ngaui bau" ru we' ni" lo, yo shaid' mae malam: lai: pyo: pyo: za: gai: na: akhang" qo" nae".