1 Mo"so re caung: khin" caung: nghaui" ge, ngonhaung" Mo"so re khin" ru wa gai: ra" mau" ngaid: nghaui" myain" nghaui" thoe we' caung: ge,.2 Mo"so wa Yerusalem: re de" to: mung: mug: va: khyo khe' thug' ke' ra" Israel amyu" qere dam: zhang" yu: ra".3 Nhag' lam: gyug' main" ra" mo, re nhag' tang" mung: yao: bam: no phyo: re gai yo nhao: ra".4 Kyi jham re qug: qu" mung: alhab' re mang mhang" byid' ra".5 Ngonhaung" AsAng wa qi" qhang: ra". Phung bao re: qi" ra". Yao" nyain: wa mathao" magain ngaid: ra".6 Mo"so wa nhag' lam: nyham: khyo" ra" mo, re tau: to' mung: tarha" macao" ra" mo, re kam" wa myid gaung khyo deim" zag: khyo" ke' ra".7 Ham" hung: re caung: khin" zo" Mo"so: qhid' kheim: mae nghaui" thoe nghaui" ge,.Tang: she mung: ngonhaung" Mo"so nghaui" myain" nghaui" thoe we' caung: ge,.8 Mug: gaung re jham thaui" yang nghoe' gam: lo mung: myidgaung khyo mug: qu: khyo" ke' byid: mung: bam jham: dao mae mhin: zo: laung la re yaug nhao: ra".9 Gug' nyhug' gug' du: we' myang: yhai: na: ra" kuno, nau" jham re zo: nam byid' ra".10 Myao: jham: qam: o: re qu" ngaui: ru mangaid:. Byu khyid she: phyaid: ru re qam: maqo" , o ngaui: ru mangaid:.11 Gyaug phug' ra" yaug we' jeju re nhag' nghae" ra" yaug re Mo"so o ngaui: ra".12 Yerusalem: vogaung: we" Mo"so re caung: khin" wa, Ziun: vogaung: we" ni" Mo"so re caung: khin" wa,.13 Khoru: ein: re ni" kham: kyao" jham re zaui" tang byid: mung: ni" akhug mae" zo: dau qere min byid' ra".14 Ni" mug: kyo: re yaug yo nhao mung: mo: thao" ra" gaug zo: yang nao re khau: ra".15 Myidgaung dao khyo ni" mungdao: nhao: khyo" ke' mung: mungdao: wa phyaid za: tao" thug' lo" ra".16 Yao mug' re" ru: gyu: khai" jham re re: khyo" ke' mung: , nghin khai" jham rere: myiqe, re" ru: phyu: yaung" nhao: ra".17 Lag qu ce' re laug qhi khai" re" ru: khyo" ke' mung: ngin" rure khoyaug qo" zang: qhao" na nae".18 Dam: dalhang mungdao: re nhao: ke' mung: gyu: khai" nghin khai" jham ru: aqang: yug: lo" nhao: ra". Yao" la re nhao: ke' yang: qid gyaung: jham yug: lo" ko" ra".19 Mungdao: amyin" re Yaku' amyu" mae re: , cao"khyao jinkham jham re Israel amyu" jham mae re: qhu" byid: la,.20 Getau: byumyu" qere airu: makaid' qhu" ngaid: ra". Cao" khyao jinkham jham re yao: bam maba ko" ngaid: ra". Haleluya.