1 Mo"so we" nga" mho' thoe re gyo: mung: ngo mho' yao: thoe re tae" gyo: byid: la, dao: so: zaung: ru , dang main" ru we' dakhyo: dam: ta" kyo: la,.2 Ni" qhid' kheim: mae daui mae" daui wa madin: mamain: ko" mathao mae ni" jeim pho" re tarha" dao: dabyid: la,.3 Gyevo qe wa nga" Solo re pyam" yhin" mung: kao rere: myid gaung joe" sho' deim" zag: to: mung: ayo, myao" sho' sushid re" ru: ngo re mug: caid' khug mae na nhao ko" ra".4 Ai ru: mung: nga" solo qam: shain: na mung: nga" aung khug nhag' myid laung: nga" ruru: ga" byaug: kyi: va".5 Qhid' phyao: lai: lo" va" ayo, re myid: beim: mung: mau" zo" alhab' jham rere: ni" lo, mau" zo" alhab' rere: myid: nghae" qu" na:.6 AsAng jhao" nga" lo, yheim" qang: to: va". Kyaug' ho: ra" myidgaung re" ru: nga" solo wa AsAng re myid: lao" na:.7 Mo"so we" phyaid phyaid tae" gyo: byid: la, ngo nhag' lam: gyug' byaug: kyi: va". Nao maqu" mageim kaid' yang: dung: gyain: khyo gyo" lo" yaug re"ru: ngo re daboe" nhao la,.8 Nao mae ngo khug ngha: ru mung: ne, seim mae ni" jeju ngo re qhu" la,. AsAng re lam jang" khug ngha: na: ngo ye" lo" nae" khyo dang re ba: to: byid: la,. AsAng re ngo myid: beim: so" na:.9 Mo"so we" ngo AsAng mae khug ngha: na: gyevo qe: lo, mae" ngo re khyaid' lhoe' yu la,.10 Nga" Mo"so wa AsAng ngaid: ra" mathao mae ni" nhag' myid re cao" nae" tau: mho" shid' la,. AsAng: gai: ra" solo wa din" ra" khyo khyo" ngo re jhui" lo" veshao:.11 AsAng we" ni" mangkhyao" tau: mae ngo re nhag' myain" yu la,. Ni" dang main" ru we' daru: za: nga" solo re qug: qe" kyin" nhaung" mae" phoe' yu la,.12 Ni" jeju khyo" nga" gyevo qere shao" sho' sham" khyo" pye' byid: la, ni" jeim pho" ngo ngaid: na:. Nga" nhag' myid solo re yhin" ra" mo, alhab' re phyo' sin" pye' byid: la,.