1 Nga" jhaung zug: , nga" Mo"so we" AsAng re ngo nga: yhe' nae". Mug: myid aqae: qae: mae mang khyao: re nga: yhe' na nae".2 AsAng re ne, qug nga: yhe' byid' na nae". Ni" mang khyao: re mug: myid aqae: qae: caung: khin" nae".3 Mo"so wa qi" qhang: ru mung: gyai caung: khin" pho: ngaid: ra". Yao" qi" qhang: ra" mau" re khoyaug re: maqo" ca ngaid: ra".4 Byu ngug xe qae: mae ni" lo, mau" re caung: khin" na geshao:. Ni" phungbao kheim: so' re yo: kyo" li" genae".5 Ngo re: ni" phung bao ham" hung: we' ni" mug' pho" mau" re ngo myid: nghae"qu" na nae".6 Ni" gyaug pho" ra" mau" re yao: bam ta" na ko" mung: ngo re: ni" qi: qhang: ra" mau" re ca: kyo: nae".7 Yao: bam wa ni" gai lho" ra" akhyo re hau" nhao" li" genae". Ni" dang main" rure zhao: yao taung" nghaui" thoe we' nghaui" li" genae".8 Mo"so wa jeju kaid' nae" nhag' myid nau" nhae" nhag' khyag' ra" nhag' myid we' byang" vin" mung: yao" aung khug mae" nhag' yo: malaui: ra" nhag' myid bo: ra".9 Mo"so wa na: gu: jo; gu: alhab' dao mae gai: ra" nhag' myid bo mung: yao: phain: to" ra" gu: alhab' re nhag' khyag' sho: gu: na: ra".10 Mo"so we" ni" mau" zo" alhab' wa nao re caung: khin" na ko" ra". Ni" shao lho" ra" mo, re: nao re nga: yhe' na ko" ra".11 Byu xaosu qere: yao" qam: o: mau" we' yao" mang: din" ham" hung: re ba: gyo: vegeshao:.12 Ni" mang: din" ham" hung: re yao: bam hau" kyo: mung: ni" qam: o: bo: ra" mau" re ta" kyo: vegeshao:.13 AsAng: mang: din" wa malam: lai" mang: din" ngaid mung: ni" jeju wa khonhae" re: gang" tang: ra". Mo"so wa tha" lang" ra" byu alhab' re thaug' qhao: byid' ra".14 Mo"so wa nyham: khyo" ke' ra" mo, alhab' re bao" thaug' yu: ra".15 Alhab' geim" wa AsAng re myid: nghae" qu" na: ako". Ayo, akhin: joe" lao" yao: bam re: zo: nam byid' ra".16 Ni" lo, zhab' yheim" ke' mung: daui mae" daui re qu" gam caung: ra".17 Mo"so: khyo gau: khao: ngo" wa dang main" ru mung: yao" mau" alhab' mae jeju re qu" byid' ra".18 Mo"so wa yao: re mho' yao mo, alhab', dao: so: we' yao: re mho' yao mo, jhao" na: ra".19 Yao: re gyaug phug' ra" mo, o ngaui: ru re zai" byang" byid' ra". Ai bam zag: yao: rure gyo: mung: khyaid' khyi: yu: ra".20 Mo"so wa yao: re jhid' kao: ra" mo, re qu" gam caung: ra". Tarha" macao" ra" mo, re kam" wa phyo'qheim" pye' ra".21 Nga" nhaid' sho Mo"so re caung: khin" caung: nghaui" li" nae". Daui mae" daui alhab' wa yao" shao lho" ra" mang khyao: re mug: myid aqae: qae: nga: yhe' na geshao: wo".