1 Nga" laung: mo" baui ngaid: ra" AsAng wa nga: lho" na shao:. Yao: wa nga" lo, jham re gye khaid' mau" , nga" lo, nyhug' jham re gye lag: mau" mho" byid: va".2 Yao: wa ngo re nhag' myain: yaug nga" ra" vokham" , nga" zho: cang yham ngo re khyaid' lhoe' ke' ra" AsAng. Ai: Mo"so re ngo khug ngha: na:. Nga" byumyu" re nga" qao:mae nha: to" ra".3 Mo"so we" nao ba: ra" xaosu byu we' AsAng ngaid: ga: khae: yu: ra" byu: zo: wa pe" ru" ru ngaid: ra" i"?.4 Byu wa angaui" we' dau: ra". Yao" bana ayo, wa lai: lo" ra" bao qaung re" ru: ngaid: ra".5 Mo"so we" mug: gaung re nyham: ke' mung: gyo" li" wa, bam jham re zao" tin" ke' wa, yao: bam wa myi: khug' thug' nhao geshao:.6 Lhe' caid' vhag' ke' mung: yao: bam re khe' sin" ke' wa, ni" myo: khe' bag: ke' mung: yao: bam re yhin" pyam"wa,.7 Mug: tho' mae" lo, yheim" ke' mung: ngo re she: thug' yu la,. No; ra" qid khug mae" re: , byu bang" qe: lo, khug mae" re: ngo re xoe:khyaid' yu la,.8 Yao: bam: nhaid' wa vhain" dao: ba: ta" ko" ra". Yao: bam: lo, yo lo, wa pyag' sham" ra" lo, ngaid ko" ra".9 Mo"so we" ni" qhid' kheim: mae nghaui" thoe asag' yang nghaui" thoe nghaui" nae" tau: daxe khe' de; ra" tang: be, mung: nga" AsAng re caung: nghaui" nae".10 Jhaung zug: re aung doe, nae" qam: pin" byid: wa,. AsAng: jeim Davi re makhy- ang" ra" shae gye mae" lhoe' ke' wa,.11 Byu bang" qe: lo, mae" ngo re she: thug' mung: qam: yu la,. Yao: bam: nhaid' wa vhain" dao: ba: ta" ako". Yao: bam: lo, yo lo, wa pyag' sham" ra" lo, ngaid ko" ra".12 Ngonhaung" zo: dau yaug gai nau" qe ve, qae" ayo, bin: ru: qi" lo mung: myiqe: nau" qe wa zho: cang yham qao: tae laug baui ru: boe" vegeshao: wo".13 Ngonhaung" jhi mae byang" sho' ja: cao jab bo: ru we' ngonhaung" caid' kyaung" yao kyaung" re ataung atug myo" je" li" mung:.14 Nung: jaung jham re: na: je" li" geshao:. Khang: nhau: be, khyaid' majo, sham" cam" lo" ru majo, khyo dang khain mae kaug' myain" qhu: thoe mung: ru majo, shao:.15 Airu" ra" mindao: mae na: ra" byumyu" wa nga: lho" ako". Mo"so re yao: bam: AsAng ga: toe' ra" byumyu" wa nga: lho" ra".