1 Mo"so we" makhyang: mo; lo, mae" ngo re khyaid' khyi: yu la,. Qain: ra" yaug: lo, mae"ngo re gug: gam: yu la,.2 Ai bam wa nhag' khug mae magai: ra" tau" da bo ko" mung: gye kaid' nae" ru re lhau: zhung: ko" ra".3 Yao: bam wa lhao maui re" ru: sho re saui" ci ko" ra". Yao: bam: nhaid' mae maui bab: daug bo ko" ra".4 Mo"so we" tarha" macao" ra" mo; lo, mae" ngo re gug: gam: yu la, qain: ra" mo, lo, mae gug: gam bao" yu la,. Yao: bam wa ngo re deim" lhang: nae" yaung: to: ko" ra".5 Ngaid beim" ra" mo, nga" tau: lha" we' taui: re khae: nyham" to: ko" ra". Ngo ye" lo" nae" khyo mae myho khao: mung: zau: zhaug' to: ko" ra".6 AsAng wa nga" Mo"so ngaid: ra" ein: Mo"so re ta" to: va". Mo"so we" ngo jhaung: mho' ra" dao: re tae" gyo: byid: la,.7 AsAng Mo"so we" AsAng wa nga" khyaid' khyi: yu: qam: o: ngaid: ra". Mang: khe' ra" ba mae nga" au: re nghoe' gam: to: byid' ra".8 Mo"so we" tarha" macao" ra" yaug o ngaui: khyo: dazai" boe" byid:. Yao: myid: yaung: to" ra" rure dazai" byid:.9 Nga" avai: ayae mae yao: bam: au: re maqo" yhe' geshao:. Yao: yao: ta" ra" magai: ru: yang yao: bam re nghoe' gam: lo" shao:10 Yao: bam: adao mae myi: gyoe: gyo" sheim: veshao: zu" ra" myi: mae yao: bam re khyo" ke' shao:. Madam: gai: do, lo lo" dung: gyain: khyo khyo" ke' vegeshao:11 Jung" khyoe' ba: ra" yaug wa myid gye, dao mae magang" tang shao:. Qain: ra" yaug re: byo, qeim: ru joe" sho' qug: khai: cao" na shao:.12 Mo"so wa myaung sho: yaug: mau" re bao" mung: moe, shab' ra" mo; shaid' mae dao: phyid' nae" ru re ngo ba: na gau va".13 Gai gai: yao: tarha" cao" ra" mo, wa ni" mang khyao: re caung: khin" li" genae". Nhag' lam: din" ra" mo, wa AsAng mae na: na: li" genae".