1 Mo"so we" nao ngo re ca: qu" mung: ba: na gau ngaid: ra".2 Ngo zaung: ru , to" ru re ba: ra". Nga" tau" da re va: mae" lao" re: ba: ra".3 Ngo ye" lo" ra" khyo rere: , yab qo rere: ca: qu" mung: nga" ave, alhab' re ba se" na gau ngaid: ra".4 Mo"so we" ngo dao: dakheim: lao" mata" qere: AsAng wa ba: na gau ngaid: ra".5 AsAng wa nga" qhid' khyo thao khyo kham" to: mung: nga" dao mae lo, kai" to: byid: va".6 Ai qhi" yao: lase" myhao: ra" ru wa nga" tau: mug' pho: yao: ngaid: ra". Ai wa gyai myhao: ra" ru mung: ngo matho' myid: joe" ngaid: ra".7 Ni" solo we' ngo khotau mae gai: qo" gao: nae" i"?. Ni" myo, qao: tae mae" khokhyo gai: qo" phao nae" i"?.8 Mug: gaung khyo do, lo" qere: AsAng na: ra". Mo:vo: mug: mae yab qo re myhung: qere: nao na: jo; ra".9 Ai: mae re: ni" lo, wa ngo re jhui" yu mung: ni" lo, yo lo, wa ngo re zaui" zag: ci: ra".10 Kho khoru: mug: caid' wa ngo re nghoe' gam: lo: re ,11 Mug: bo" wa nga" avai: ayae bo" bao boe" nae".12 Mug: caid' yang ni" qhid' mae maqo" nghoe'. Myi" wa mug: bo" ru: mug: caid' we' mug: bo" wa ni" qhid' mae" daja: ja: ngaid:.13 AsAng wa nga" noce' re phain: mung: myhi" aung khug mae ngo re nghoe' gam: to" ra".14 Gyaug pho: we' mug' pho: mae cao" mung: ngo re phain: to: va" ra" mathao ngo nao re caung: khin" na nae". Ni" lo, mau" wa mug' pho" mau" ngaid: rure nga" solo wa dang dang ba: ra".15 Anyham: avho' jo, qo mae ngo re phain: ke' mung: myid gaung no; thao" ra" jo, qo mae ngo re gaung yaung: ra" au: mae nga" shoqug: shoqae jham re nao mato" myhid' nhaung.16 Nga" gaung mayaung shi: mae" ni" myo, ngo re myao: na mung: nga" tau: tu" to" ra" bana jham mae daja: re lao" ngo mamyao shi: re ni" tung" paug' mae alhab' tung" to: gau ngaid: ra".17 Mo"so we" nga" akhyo nao myid: yaung: khyo: khoqhi" phug' de; ra" i"?.Ai: gu: alhab' wa gyai myo: laug: ra".18 Ai: tau" da jham qug: qu" re ma coe bam nho" myo" ra". Ngo yab so: to" li" lao" nao we' daga" ngo na: na shi: nae".19 Mo"so we" tarha" macao" ra" mo, re nao se' pye' shao:. Sa: de; ra" mo, ngo we' va" lin shao:.20 Yao: bam wa AsAng re manug nhung: ra" myid we' ta" ko" mung: AsAng: gyevo jham wa tarha" mavao: ra" khyo" bau" nghao" ko" ra".21 Mo"so we" AsAng re nghang: mo, re ngo re: gai: nghang: nae" mangaid: i"?. AsAng re tau: lhain: nae" to" ye, mo, re ngo qu" ca' pye' gai nae" mangaid: i"?.22 Yao: bam re nhag' myid alhab' yang nghang" ra". AsAng: gyevo ru: jho: pye' va".23 AsAng we" ngo re ca: qu" mung: nga" nhag' myid re xam" to: byid: la,.24 Ma khyang" ra" khyodang khyo ngo cao" ra" macao" ra" ru re qu" mung: malam: lai: lo" ra" khyodang khyo jhui" ye" lo" la, wo".