1 Mo"so we" ngo nao re caung: khin" ra".2 Sae za: dana: jo, nhag' lam: kaui mo, we' mhug' hab' qe ngo re ceim" khe' zin" ako". Yao: bam wa nga" akhyo re mhug' ta" ako".3 Pe" si: mabo: ru mae ngo re khaid' mung: nga" akhyo re magai: ra" khyo" ta" na: ako".4 Yao: bam re ngo jhid' de, mung: yao: bam: tau: mae" jhaung: mho' byid: qere: ngo re atug' khyo" kang lhang ke' ko" ra".5 Yao: bam wa ngo re gai: ra" atha" magai: ru tug' xe' byid: ko" ra". Jhid' de; nhag' myid atha" nghang" ru tug' ako".6 Yao" adao mae tarha" macao" ra" yaug re khyin: to: wa,.Yao" lo, yo shaid' mae qobo zhaug' yaug re: na: jo, veshao:.7 Yao: re dao: phyid' ra" au: seim" veshao: yao" jhaung: mho'dao: wa qobo boe" veshao:8 Yao" kao lang" veshao:. Yao" zai yo su qo" lo" vegeshao:.9 Yao" zo: dau qe wa cug' zo: boe" mung: yao" myhi" zang re: cug' mo" mo" veshao:.10 Yao: zo: qe wa mho' zo" lhang: qin" ra" mo, boe" geshao:.Yao: bam: yham jham mae" thug' mung: zo: nam qho zo: vege- shao:.11 Yao: mae jo; ra" gu: alhab' geim" re jhin sang: yu: pye' byid: veshao:. Yao: zaui" qo" ra" jo, nho" re re: supe" yang lhaid' yu: lo" vegeshao:.12 Yao: re jeju kaid' ra" byu , yao" cug' zo: nau" qere bao" khyaid' yu nae" ru dayaug re: mana shao:.13 Yao" amyu" anyaug gain: thao" lo" shao: thao phyao: na: li" mo, yao" mang re to" myhid' pye' geshao:.14 Yao" phug' pho" qe: qobo re Mo"so myid: beim: byid: veshao:. Yao: myhi" qobo rere: makhyaid' byid: veshao:.15 Ai: qobo wa Mo"so: qhid' kheim: mae de: de: myao: ra". Myid gaung: dao mae yao: bam myid: beim: nae" so: xam: majo, nae" tau: phyaug' pye' byid: shao:.16 Khoru: ein: re ai: yaug su re nhag' maba: khyag' ngaid: ra". Yao: wa myaung sho: moe, shab' mo, re shid nae" qhi" joe" sho' yhin" ra".17 Yao: wa nhang: nug yaug ngaid mung: nhang: kheim: phau: veshao:. Yao: wa min byid: nae" ru ma o ngaui: ru we' dakhyo: khag' yang re: min mabyid: geshao:.18 Mai bau: re ve; ruru: nhang: kheim: re ve; ci shao:. Qid re" ru: yao" vae: dug: khug khyo re: xau re"ru: shoqug: khug khyo yug: vao lo" shao:.19 Ai: ru wa gaung mae ve; ci: ra" mai bau: re" ru yao" phyid' dam: mae cui" ci: ra" phyid' cui: re" ru: boe" veshao:.20 Ngo re gye kaid' ra" mo, we' nga" akhyo magai: ra" dao: jhau mo, wa Mo"so mae" ai ru" ra" aphug' qhug' the' yu vegeshao:.21 Mo"so we" ni" mangkhyao" mathao mae ngo re lhaug' zaung" la,. Nhag' myain" ra" jeju wa gai: ru ngaid mung: ngo re khyaid' yu la,.22 Ngo wa qug: khai: qhug' mung: moe, shab' na: nga" aung khug: nhag' myid wa zau" nho: na: kyi:.23 Myi" thao zo" mae" bao qaung: ru: ngo qui" lo" na va". Khyag' phaung" jham re" ru: baui" shao" ru qhug' na va".24 Zo: shaug' zang" ra" mathao mae nga" paid' laug nin" na mung: nga" gaung sho: ngaung" khyoe" lo" na va".25 Su pe" yang gaui mho jo, qo ngo boe" na:. Yao: bam ngo re myao lao" khyoe' ra" khyo" au: nghoe" nghoe" ko" ra".26 Nga" AsAng Mo"so we" ngo re bao" yu la, nhag' myain" jeju khyo" ngo re khyaid' yu la,.27 Mo"so we" ai jham wa ni" lo, mau" zo" ngaid mung: ai: ru AsAng kaid' ru ngaid: ga: yao: bam ba vegeshao:.28 Yao: bam nhang: ko" qere: AsAng wa min byid' ra". Ngo re yhin" ra" mo, qho' phau: vegeshao:. AsAng: jeim pho" kam" wa ngaui bau: shao:.29 Nga" gyevo jham wa qho' gyaug ga" ra" mai bau: ve, mung: mai pho' yang nghoe' to" ruru: myo, nho sham: ru: yang gaung re nghoe' gam: ci vegeshao:.30 Ngo wa AsAng re thoe mo" ke' mung: jeju beim: so: nae". Byu myo: sho' phaung gaung: mae caung: khin"nae".31 Khoru: ga" re yao: wa myaung sho: mo; kao re dao: phyid' ra" mo; lo, mae" khyaid' yu: ra". Yao" lo, yo shaid' mae ye; na: jo; li" nae".