1 Mo"so re gyaug phug' mung: tarha" dao: re nhag' kao" vao" ra" yaug wa nga: lho" ra".2 Ai: yaug: zo: myid: qe wa mug: myid dao mae qi" qhang: li" genae". Nhag' lam: din" ra" mo; zo: myid: qe wa nga: lho" genae".3 Yao" yham wa na: dai na: qo" li" mung: yao" dang main" ru wa malam: lai: gang" tang: jo; li" nae".4 Nhag' lam: din" ra" mo; tau: mae mug: caid' mae bo" bao bao: li" ba: ra". Nhag' khyag' sho: gu: ba mung: dang main" ra" mo, re bo" bao bao byid: nae".5 Nhag'myain" myid bo mung: jhid' shai byid: yaug wa na: gai: li" nae". Tarha" dao: phyid' ra" ba mae aung doe; ru qhug' nae".6 Byu gai wa khonhae" re: jeim: nae" mangaid:. Yao: re khonhae" re: myid: beim" na genae".7 Yao: wa magai: ra" lau dao: the' gyo: nae" rure maci" ca" ngaid: ra".8 Yao" nhag' myid wa gang" tang mung: yao: re tau: lhain" ra" mo; qobo dae phau" ru the' myao sho' yao: magyaug ca" ngaid: ra".9 Yao: wa mabyag lo: za: myaung sho: mo, re byid: gae: ra". Yao" dang main" ru wa malam: lai: ajo; jo; ra". Yao" khyug' wa nga: lho" ru we' to" ye; li" nae".10 Tarha" macao" ra" yaug wa ai re myao mung: nhung: li" nae". Zaui qao: bin" zag mung: ngaung" khyoe" byaug: lo" li" nae". Tarha" macao" ra" yaug o ngaui: ru byo; qeim: baui" lo" li" nae".