1 AsAng re caung: khin" caung: nghaui" ge, AsAng wa gai: thao" yaug ngaid mung: yao" jeju re beim: ge,. Yao" jeju wa malam: lai: ajo; jo, veshao: wo".2 Mo"so: kheim: so' qi" khyo re khoyaug qo" ta" kyo: genae" i"?. Yao: re khin" dao: alhab' re khoyaug qo" ba byid: genae" i"?.3 Ayo, khao: ngo" mae dang main" rure zaui: so: mung: din" ra" khyo dang mae su" na yaug wa nga: lho" ra".4 Nao khyin: yu: ra" mo, na" gai ko" rure ngo the' myao nae" we' ni" amyu" ngaui bau: mung: ni" khyao kham khyao khae: re qo" bocaung: shao: ga:.5 Mo"so we" ni" amyu" re bao" thaug' ra" jeju ngo re qhu" byid: mung: khyaid' yu: khyo rere: byid: la,.6 Ngonhaung" wa phug' pho" qe we' daga" qobo kaid' lo: bam va". Shaid' nghung" lo: bam va".7 Egutu' mang: mae qhu" ra" mug' pho: ve, lho re ngonhaung" phug' pho" qe maba: gyo: ko". Myo: sho' lhang nhag' myain" yu: ru rere: mabeim: maso: ge yang: qid ne lao anhae mae tau: lhain: veko".8 Ngaid qere: qi" thao" ra" yao" kheim: so' qam: o: re bao: myhao" nae" tau: yao: dao: so: byid' to" ru we' dakhyo: yao: bam re khyaid' yu: ra".9 Qid ne lao re amyin" khyo" ke' lao" kyaug' ho: lo" mung: no; ra" lao: khaung: khyo" jhui" gau" lai: lo" ra".10 Manug nhung: ra" mo; lo, mae" yao: bam re khyaid' yu mung: gyevo qe: lo, khug mae" re: khyi: lhoe' yu va".11 Gyevo qe dayaug re: madang lo: sho' qid: yang nhai" bam" se' pye' ra".12 Alao" yao: bam wa yao" dao: re lam" jang" mung: yao" myo, nho nga: lao: re caung: khin" caung: nghaui" ko" ra".13 Khomyhao" mamyao" re yao: bam wa yao: kaid' qhu" ra" mau" re to" myhid' pye' mung: yao" juyi khyug' ra" akhyo re mamyid: qu" lo: ko" ngaid: ra".14 Gao so yo mae yao: bam myid: o: ra" khyo re za: qho mung: Mo"so re lag yu: qu" aveko".15 Yao: bam mho' ko" rure poe" byid' ra" ngaid qere: yao: bam re anyhaung ajhoe' boe" nhao: ra".16 Ai: gao so yo mae Moshe we' Arun: re qu" nhung: ako".17 Myidgaung go; ho" li" mung: Dathain: re myug: pye' ra". Abraham we' yao" byu qere bam" se' pye' va".18 Ai bam: bo: de, mo; dao mae myi: gyo" li" mung: nhag' lam: kaui mo, re nga" pye' ra".19 Yao: bam Horeb' bam khyid mae nung: jaung lho sheim: mung: ai re goe; pa" ako".20 Ai re" ru: yao: bam: myo, nho nga: lao: re vohau: mhin: zo" ra" nung: jaung alho we' tha" yu: pye' ko" ra".21 Egutu mang: mae mau" qi: kaid' qhu" ru Hama' jo, qo mae mug' pho: mau" kaid' qhu" ru ,22 Qid ne lao nhae qu" gyaug pho: zai" poe" ra". Yao: bam re khyaid' yu: ra" Mo"so re yao: bam to" myhid' pye' ko" ra".23 Yao: bam re se' jheim" pye' nae" myid: yaung: na: ra". Ngaid qere: Moshe wa Mo"so: qhid' kheim: to" ye, mung: yao: bam re mase' pye' nae" tau: nhag' yo: gyo" nhao: ra".24 Yao: bam wa Mo"so: dao: re malam" yaug yo cae: tae" ra" mang: din" rere: gaui mho: pye' ko" ra".25 Yao: yao" zaung khug mae tug' phaug' dao: jhau mung: Mo"so: mungdao: rere: manug: tae" gyo: ko" ngaid: ra".26 Aimung: yao: bam re gao so yo mae shid: gain: pye' nhao: ra".27 Yao: bam: zo: myid: qere re: Mo"so re maba mase" mung: yao: bam re labug: mang: mae shid: dam: nhao: ra".28 Yao: bam Bala'-pegura' mo"so mae ngha mung: su shid re ngaui" byid' ra" xeim: sho: re zo: ko" ra".29 Yao: bam: lo, qaug mau" mathao: yang AsAng nhag' yo: nae" rure lhau: zhung" ke' ako". Ai mung: yao: bam re no phyo: aja: ja" yang yhin" ra".30 Ngaid qere: Phinahaid' to" ye; li" mung: shaid' nghung: mo, re qobo dae byid' ra". Ai lao" no phyo: qam" baui" lo" byaug: ra".31 Yao: kaid' ra" mau" re xam" ci mung: yao: re daqae: mae" daqae: dang main: yaug ga: khyo" myid: yu ko" ra".32 Merike' qid thug' nhae mae AsAng re nhag' zai" yho" ke' ko" mung: Moshe wa yao: bam: mathao qobo qo" ra".33 Yao" nhag' lam: myid re anhaung" akhoe' kaid' ko" mung: yao" nhaid' thoe: yang ta" shaid' ke' ra".34 Mo"so mho: to" ru we' dakhyo: labug amyu" qere mase' ngaid: ra".35 Ai va" tho' mae yao: bam labug amyu" qe we' alhau: alhag' na mung: yao: bam: li re bocao" lo" ko" ra".36 Ai bam: sulho re bogoe; pa" mung: ai: ru wa yao: bam: tau: myi" nae" taui: kheim" boe" ra".37 Yao: bam: zo: dau zomyi: zolau: qere min: yui jethaung re qhaug' ngaui" ko" ra".38 Qobo mabo: ra" sa: re yao: bam zai" sheim: pye' ko" ra".Khanain: mo"so alho re vhe' sheim" ngaui" ra" sa: wa yao: bam: zo: dau qe: sa: ngaid: ra". Airu: kaid' ru: yang mang: din" re anyain: avho: boe" pye' ko" ra".39 Yao: yao" lo, qaug mau" zo" mathao mae yao: bam mashao malho" boe" ko" ra". Yao: bam: ave, asam" mathao yao: yao: shaid' nghung: ko" ra".40 Aimung: Mo"so yao" amyu" re nhag' lam: laung mung: yao" khyao kham khyao khae: re ca' pye' ra".41 Su: byumyu" lo, khyo yao: bam re qhaug' pye' mung: yao: bam re manug nhung: ra" mo, yao: bam re ug ko" ra".42 Yao: bam re yhin" pyam" mung: gyevo qe: lo, khug mae nha: to" ru qhug' veko".43 Yao: bam re myo: sho' lhang khyaid' yu ngaid qere: tau: lhain: nae" za: myid ko" mung: yao: bam: qobo: mathao mae yhin" ru qhug' ako".44 Yao: bam hug' yao: na: rure AsAng the' gyo: mung: yao: bam qug: khai: thaung" qhug' na ko" rure the' myao byid' ra".45 Yao: bam we' to" to" ra" dao: so: re myid: beim: mung: yao" qi" qhang: ra" jhid' myid: yang nhag' dam: myain" yu: ra".46 Yao: bam re sham" jhui" lo" ra" mo; aung khug mae nhag' myain: nae" nhag' myid ke' byid: mung: ,47 Ngonhaung" AsAng Mo"so we" ngon- haung" re khyaid' khyi: yu la, ni" yaung" lho" mang khyao: re qo" caung: khin" sho' labug: lo, mae" ngonhaung" re jhui" zhang" yu la, wo".48 Israel Mo"so AsAng wa gyag maqui: thain" madaui na: na shao: wo". Byumyu" cao jab wa ngaid va" wo" Amen ga: mho geshao: wo". Haleluya.