1 Mo"so wa gai: ra" yaug ngaid mung: yao" jeju re beim: ge, Yao" jhid' kao: myid wa jhid' bain: gain gin makhin: ngaid: ra".2 AsAng: yang khyaid' yu: ru qhug' ra" mo, gyevo: lo, mae" lhoe' yu: ru qhug' mung:-3 Ba thug' ba vao qid bang: qid meim mang: khao: ngo" mae" jhui" zhang" yu: ru qhug' ra" mo, ceru: ga: mung: ta" na geshao:.4 Yao: bam wa cae: jhug tag: seyo mae su" lhang: qin" ko" ru mung: na nae" vo khyo joe" ye: nae" khyo dang mamyao ko" ngaid: ra".5 Vae: moe;qid shab' phau: mung: nhag' lam: thao" byaug: ako".6 Qug: khai: qhug' ra" au: Mo"so re zag: yao: ke' mung: qug: khai: kyi" khyag' khug mae" khyaid' xoe: yu: ra".7 Yao: bam: na jao: vogaung: khyo joe" sho' khyo jhao" gau: khyo" jhui" lo: ra".8 Byu qe mae kaid' byid' ra" nhag' myain" ru we' mug' pho: mau" re pao yang: Mo"so: jeju re caung: khin" geshao:.9 Khoru: ein: re myid: nghae" ra" Solo rere: gai lho" ra" ja: we' gyi: nhao: ra".10 Ai bam wa Mo"so: dao: re ngag: ha: pye' ko" mung: ,11 Myhao: thao" ra" Mo"so: tau" da re maphug' makhyaid' ko" mathao mae mug: caid' khug shid zug' bao qaung mae zaung: jo, zo" re" qug: khai: we' re: jao co: we' re: taui" to" ru qhug' genae".12 Mo"so wa yao: bam: nhag' myid re qug' ra" mau" mae deim" zag: khyo" pye' ru mung: yao: bam tha" lang" re tau: to" nae" byu mana ngaid: ra".13 Qug: khai: thaung" qhug' ra" au: Mo"so re zag: yao ko" mung: qug: khai" jao: mae" khyaid' khyi: yu: ra".14 Caid' no, khug mae" we' shid zug' bao qaung khug mae" phoe' yu mung: myag: taui" to" rure pheim: ke' byid' ra".15 Byu qe mae kaid' qu" ra" nhag' myain" ru we' mug' pho: mau" mathao mae Mo"so: jeju re caung: khin" qu" ge, wo".16 Gyid: kham: dung: jham re be; phyo' pye' mung: jo, to' kham: kyao" jham re adau atam" nag: khyug' pye' ra".17 Nhag' magyang: mo, shaid' nghung" ru we' qobo mau" kaid' na ko" ra" mathao mae mamyain: makhyaid' qhug' na ko" ra".18 Yao: bam wa zo: ja: re ca' gemung: shid nae" kham: dung: we' jhao" li" na veko" ra".19 Yao: bam wa qug: khai: kyi" khyag' khug mae" AsAng re hug' yao: ke' ako". Aimung: qug: khai: khug mae" khyaid' yu: ra".20 Mo"so wa mungdao:re ke' ke' mung: yao: bam re lab bug mang: khung: mae" khyaid' lhoe' ke' ra".21 Mo"so wa xaosu byu qere kaid' qhu" ra" mug' pho: mau" we' yao" nhag' myain" jeju mathao mae caung: khin" caung: nghaui" geshao:.22 Yao: bam wa caung: khin" xeim: re caung da" mung: zhao: yao: ra" thoe we' yao" mau" zo" re yo: kyo" na vegeshao:.23 Qid dae mae lha jui: yang: gau" qin" mung: qid mang: dao mae qho zo" ra" mo, wa ,24 No; thao" ra" jo, qo mae AsAng: mug' pho: mau" re myao: ako".25 Yao: amyin" khyo" ke' lao" la qam" hug' lo mung: bang: lhung" to" lo: ra".26 Mug: gaung joe" sho' vo; to' ke' mung: no; thao" ra" khyo dam: gyo" lo" ko" ra" mathao: yang yao: bam wa nhag' lam: thao" byaug: ako".27 Yhid yid yaug re" ru: apyi ajhae su" qin" mung: ba jhao: ra" nyain mabo lo: ko".28 Yao: bam wa qug: khai: qhug' na: khug mae" Mo"so re hug' yao: ke' ko" mung: yao: bam re qug: khai: khug mae" phoe' thug' khyi: yu: ra".29 La qam" re tam" pye' mung: bang: lhung" re: tae" yo: lo" ra".30 Aire" ru: yo: lo" ra" mathao yao: bam ngaui bau: ko" ra". Yao: bam joe" nug: ra" gau: khung: khyo gug: gam taung" jhui" lo" ra".31 Mo"so wa xaosu byu qe re kaid' qhu" mug' pho: mau" we' yao" nhag' myain" jeju: mathao mae caung: khin" caung: nghaui" geshao:.32 Volo mo, phaung gaung: mae Mo"so re nga: yhe' mung: kao qi: va" mo; ham phaung mae AsAng re caung: khin" geshao:.33 Qid gyaung: jham re: din" yo boe" lo" nhao mung: qid thug' qid baug: jham re kin" lo" nhao: ra".34 Byu qe: qobo mathao mae myid jin" bo: ra" jo, qo re myid gao: poe" pye' ra".35 Gao so yo re tham: nheim" kyaug' ho: ra" jo, qo mae qid thug' ra" jao: boe" nhao: ra".36 Ai: jo, qo mae moe, shab' mo, na nhao mung: yao: bam wa yao: yao" na jao: re vai" ko" ra".37 Yao: bam wa yo myo: mung: sabyi' khyae kaid' mung: qhovo: qhoshi: the' jham" yu ko" ra".38 Yao: bam min jhaung: byid: mung: gyai na: je: na: myo" li" ko" ra". Gug' nyhug' jham re: myo: laug je" li" nhao: ra".39 Ai: thao mae pyam" yhin" ru we' kaug' qhui: ru qhug' ko" mathao mae yao: bam nang" lo" mung: gyoe; gyo" lo" ko" ra".40 Zug: qere qho' phyo' mung: khyo dang majo; ra" din" pyaid' yo mae su" lhang: yain" qin" nhao: ra".41 Myaung sho: mo, re qug: khai: mae" lhoe' yu mung: yao: bam re yao phung: re" ru: myo" je" li" nhao: ra".42 Dang main: mo, wa ai re the' myao mung: ngaui bau: ko" ra". Makhyang: mo, alhab' re: sae za: tae" byaug ko" ra".43 Juyi bo mo, wa ceru re myid: qu" geshao: , Mo"so: nhag' myain" jeju re ba: gyo" li" genae".