1 Nga" solo we" Mo"so re nga: yhe' wa,. Nga" AsAng Mo"so we" AsAng wa gyai qi: gyai qhang yaug ngaid: ra". Myo, nho nga: lao: we' phung bao re nao lao" yang" ci: ra".2 Bo" bao re mai bau: re" ru: ve; ci mung: mug: nyug lasung" re lao" khao" to" ra".3 Yao" na jao: re qid dao mae de" to" ra". Jham thaui: re daung ru: ci mung: la re daung fo' kaid' yang: dao" qin" ra".4 Yao" logyo: jham re la qam" re" ru:, yao" daui mung mo, re myi: re" ru: boe" nhao va".5 Myid gaung: qao: tae re zhaug' tang: to: mung: ai wa khonhae" re: qui" laui" lo" nae" mangaid:.6 AsAng wa mug: myid re mai bau" yang nghoe' to" ru" ru qid dae: yang nghoe' to: mung: qid jham wa bam jham: adao mae yhe' to" ra".7 Nao qeim: ke' lao" ai jham phao: lo" byaug ko" ra". Ni" mug: dam: thoe mathao mae yao: bam phyaid za: phao: lo" ko" ra".8 Bam jham myhao: li" mung: lao: khaung: jham nyham: gyo" lo" ko" ra".Nao to" to" ra" jo, qo mae malam: lai: jo; jo, ko" ra".9 Qid jham dam: tug' lo mung: myid gaung re manghoe' nhai" lo" nae" tau: maqo" gai: lhoe" ra" mug: kyo: re to" to: byid' ra".10 Mo"so wa lao: khaung: qid thug' qid baug: jham re yhug' ke' mung: ai jham wa bam jham: agyo:mae yug: lo" ko" ra".11 Ai wa gug' nyhug' jham: shaug' qid boe" mung: seyo: myao: lae" jham qid shab' baui: sho' qhug' shaug' ko" ra".12 Ai: qid yae nhae mae mug: le; phyo: mae" ngho' jham khug ngha: na mung: sag' gae akaung jham mae dao" de; qin" zo"re" myang: yhai: na ko" ra".13 Mug: gaung: yham mae" bam jham: dao mae mug: qu: sheim: byid: mung: myid gaung wa ni" lo, mau" zo" yang zo: nam shaug' pho: pyang" to: byid' ra".14 Myid gaung mae" zo: nam shaug' pho: qo" the' yu vegeshao: ga: gug' nyhug' jham: tau: mhin: zo: laung la rere: xaosu byu qe tau: gaugzo rere: myid gaung mae" thug' li" nhao: ra".15 Sabyi' qang: wa byu: nhag' myid re zhao: yao nhao: ra". Yao" myo, khung: wa xau yang: qhui qhui mung: li" ra". Zo: shaug' yang byu re qam: bo nhao: ra".16 Mo"so wa sag' gae jham re yao: qho" yhaug' to: mung: Lebanon: bam mae" shaug' gae jham re: qid gyi: gyi: qhug' shaug' ko" ra".17 Ai: agae jham mae ngho' jham asaid' said' ko" ra". Hhuje; gae jham mae vin qu jham khug ngha: na: ako".18 Bam myhao mae yo: jham: na jao: laug khyaung laug aug' jham mae pyu , jolha: jham: na jo, qo boe" ra".19 Zin gin xaung: gin re lho" mo" khye' yang phag' byid' ra". Ba re: yao: vao lo" nae" ayo, akhin: re ba: ra".20 Mo"so wa myi" ayo, ga: gin: phag' to: mung: mug: caid' yo, mae seyo mae" myang kha: zoqhid jham thug' li" ko" ra".21 Lo:tin: nau" jham sho: qho zo: nae" ga: kyid' mung: Mo"so mae" gyo, zo" na: bam ko" ra".22 Dam: ba thug' li" lao" yao: bam phao: lo" mung: yao: bam: khug ngha jao: mae lo" ab' na: bam ko" ra".23 Alao" byu qe wa mau" zaui: nae" thug' ye" lo" mung: myi" thao joe" sho' mau" zaui: so: ko" ra".24 Mo"so we" mau" khonho" myo" laug: jo; ra" i"?. Ai gu: alhab' re juyi laba lajhao khyo" kaid' to" ra". Myid gaung wa nao phain" to" ra" zai yo jham byang" jo; ra".25 Qid dae mo" khug mae matho' nghe' qug lo" ra" gug' nyhug' cao jab aqi: angai jham yain" qin" ako".26 Ai mae lha jham ye: ye: lo lo gau" qin" mung: phain: myhung: to" ra" mao jaung: nung: nau" jham re: na: ra".27 Ai: gug' nyhug' gug' du: jham re ayo, joe" lao" zo: nam byid: zho" li" nae" ga: AsAng re myid: lao" na: bam ko" ra".28 AsAng wa yao: bam re zo: nam byid: mung: qhug' zo" na ko" ra". Ni" lo, zhab' pheim: ke' lao" gai: ra" zo: nam byang" ru qhug' ako".29 Nhaung thao" phaug' lo" lao" yao: bam myid myo: ko" ra". Yao: bam: kaoso' re qab: yu lao" shid mung: phaui: lhug khyo dam: tug' lo" byaug ko" ra".30 AsAng so' hoe" ke' ru: yang yao: bam re phain: ke' mung: Mug: myid yo so: re dam: nyhang" byao: yu: ra".31 Mo"so: myo, nho nga: lao: wa pyaid daedu jo; na shao:. Mo"so yao" lo, mau" mae ngaui bau" na shao:.32 Myidkin re yao: qu" ke' mung: nin" laui" li" ra". Bam jham re zao" tin" ke' lao" myi: khug' thug' li" ra".33 Ngo kao daui: na: ra" dalo: gyo: mae Mo"so re caung" na nae". Ngo daui: na shi" ayo, akhin" gu: mae nga" Mo"so re caung: khin" caung: nghaui" na nae".34 Ngo sao qhid' nghaui" ra" thoe wa nhag' dag pho: ngaid mung: Mo"so mae ngo ngaui bau: zhao: yao: li" nae".35 Qobo gaung ngaid: ra" mo, myid gaung: dao mae" gain: thao" lo" geshao:. Tarha" macao" ra" mo, thao phyao: madam: gai: na lo: genae". Nga" solo we" Mo"so re nga: yhe' na wa, wo"...Amen. Haleluya