1 Yao" jeju re caung: ge, AsAng: mang khyao: re mho' yao ge, Yao" mau" zo" re byumyu" qere ta" kyo: ge,.2 Mo"so re nghaui" caung: thoe we' caung: ge, yao" mug' pho" mau" re ta" kyo: ge,.3 Yao" shaogyang" ra" mang mae ngaui bau: zhao: yao: na ge,.4 Mo"so we' yao" kheim: so' qam: o: re cao" qho: ca: qu" na ge,. Yao" myo, nho nga: lao: khonhae" re: cao" qho: na ge,.5 Yao: kaid' qhu" lai: lo" va" mug' pho" ve, lho we' mau" zo" , yao" nhaid' mae" thug' ra" tarha" jham re myid: beim ge, wo".6 Yao" daui mung yaug Abraham: zo: myid: qe we' khyin: yu qhug' ra" Yuda' zo: myid: qe we".7 AsAng wa ngonhaung" Mo"so ngaid: ra" myidgye, geim" mae tarha" dao: phyid' nae" kheim: so' qo" ra".8 Yao" dao: thang" re khonhae" re: mato" myhid' beim" na mung: , ai re byujao xag' qug dataung joe" sho' xam" ci: ge,.9 Abraham: we' to" ra" dao: so: we' , Isag' mae byid' to" ra" dao: so: re cao" pyang" na: li" nae".10 Khanain: mang: re khyao kham khyao khae: boe" nae" tau: ngo byid: nae" ga" dao: so: wa ,11 Yaku' we' to" to: mung: ai: gu: wa Israel qe: malam: lai: lo" ra" dao: so: ngaid: ra".12 Yao: bam wa byu mamyo" ru we' byu bang" boe" na shi: ko" ra".13 Yao: bam wa davo mae" davo khyo damang: mae" damang: su" byaung" lhang: qin" ako".14 Yao: bam re pyam" yhin" nae" rure yao: maqaid ngaid: ra". Yao: bam: mathao jhaung zug: qere lao" pyam" ra".15 Ngo xau gyain" to" ra" mo, re dathe' zao" ge, nga" lapa qere re: dazai" nhaung" ge, ga: mho: ra".16 Ai: au: ai: mang: mae bao" khug' mo" gyo" mung: zo: nam alhab' re tam" kyo" pye' ra".17 Gau: qhid' nhau: yang: byu dayaug re nhao: ke' ra". Yoseb' re jeim boe" nae" aung" ke' ru qhug' ra".18 Yao: re kyam: lhaung" xao" mung: jo, to' yang yhin" pyam" veko".19 Yao: re Mo"so lag yu: ra" dao: mabin: loe" loe" wa ayo, byang" sho' phau" na: ra".20 Jhaung zug: wa yao: re kyam: mae" pheim: ke' mung: myain yo nhao: ra".21 Yao" khaung: mhao: qere taui: nug: re taui: nae". Yao" agyi lau: de; qere mho" shid' nae".22 Yao" yham re ug: gam nae" nha: to: mung: yao" jo, nho" dai kham: dao mae zug: nhao: ra".23 Israel wa Egutu mang: khyo joe" gyo" ye: mung: Yaku' wa Hama' amyu" qe na: ra" jo, qo mae yena: ra".24 Mo"so wa yao" amyu" qere myo" je" lo nhao mung: yao: bam: gyevo qe tho' qam: je: bo nhao: ra".25 Yao" byumyu" qere qu" gyid' mung: mho" pyag' ju" phyo' genae" tau: yao: bam: nhag' lam: re jhain" ke' byid' ra".26 Yao" jeim Moshe we' yao: khyin: yu: ra" Arun: re yao: nhao: ke' ra".27 Yao: bam: qhid' kheim: mae yao" ve, lho aja: ja: re ci: qhu" mung: Hama' jo, qo mae mug' pho: mau" re kaid' qhu" ra".28 Mug: caid' re nhao: ke' mung: caid' no, mo" gyo" ra". Yao: bam wa mungdao: re maqo" ngag lo: ko" ngaid: ra".29 Yao: ai: qid re sa: boe" nhao mung: ngo: jham shid: byaug ko" ra".30 Mang: geim" mae" polhag' jham byang" lo mung: jhaug zug' qe, khug khyo re: vao: byaung" lo" ko" ra".31 Amyin" khyo" ke' lao" yao khaung: we' mho' jham damang" geim" mae byang" lo" ko" ra".32 Mug: ce' atha" lag qu khyo" ke' mung: yao: bam: mang: din" geim" mae sag' khyug' laung: mhain" myi: shae vhag' boe" byaug: ra".33 Yao: bam: sabyi' naui jham we' pho' ham" gae jham re zao" mung: mang: geim" mae" sag' gae jham re be, mhain" khyo" pye' ra".34 Yao: amyin" khyo" ke' lao" matho' nghe' qug lo" ra" khyag' phaung" jham bai bai mung: myo" laug: thug' li" ako".35 Mang: din" geim" mae" ao: pho' myiqui: jham rere: , qhovo: qhoshi: jham rere: zo" khyaid' shao: pye' ko" ra".36 Ai: thao yao: bam: qam: o: aqhid ngaid: ra" mang: geim" mae" yaug gai zo: qhid' alhab' re se' pye' byid' ra".37 Yao" byumyu" qere ngaui hhang we' jhui" thug' lo" mung: yao" amyu" mae qam: nang" ra" byu dayaug re: mabo ko" ngaid: ra".38 Egutu byu qe wa yao: bam re gyaug ko" ru mung: yao: bam thug' lo" byaug ko" ru re damang: geim" ngaui bau: ko" ra".39 Ba sham boe" nae" tau: mae na" re jham thaui" yang lao" lhung" nghoe' byid: mung: myi" mae myi: bao bao byid' ra".40 Yao: bam mho' ko" mung: ngho' yhau" jham re khyo" byid: mung: mug: gaung mae" cinmain" rere: khyo" byid' ra".41 Laug pyo' re phung" ke' mung: qid yug: thug' li" nhao: mung: ai wa gao so yo mae qid gyaung: ru: yug: lo" ra".42 Pe" mung: ein: re yao" jeim Abraham: mae byid' to" ra" shao lho" dao: so: re myid: beim" ra".43 Khyin: yu: ra" yao" amyu" qe re ngaui bau: zhao: yao taung" jhui" thug' pyaung" lo: ra".44 Yao: bam wa yao" dao: so: re xam" ci mung: khang" dao: tarha" re cao" genae" tau: labug amyu" qe: mang: re yao: bam re byid: mung: su pe" zaui" to" ra" agau re vao: sang: yu nhao: ra". Haleluya.