1 Nga" solo we" Mo"so re caung: khin" na wa, nga" gaung khyao nhag' myid alhab' we" yao" shao gyang" ra" mang re caung: khin" wa,.2 Nga" solo we" Mo"so re nga: yhe' na wa, yao" jeju re dato" myhid'.3 Ni" yug: no qobo alhab' re khyaid' pye' byid' ra". Ni" no phyo: alhab' geim" re no gai: pye' byid' na: ra".4 Ni" kao so' re mang: khung: mae" khyi: yu mung: jeju we' nhag' myain" ru re ni" au: dao mae kai" to: byid: va".5 Nao wa zeim baung: re"ru: qam: bau: dam: qae" li" mung: ni" suna bang: re gai: ra" jham: yang pyang" byid: va".6 Mo"so wa dang main" mau" zaui: yaug ngaid mung: deim" zag zo" ru qhug' na mo; shaid' khyo" yang dao: phyid' ra".7 Yao" akhyo re Moshe re re:, yao" ave, re Israel zo: myid: qe jhao" re: li" qhu" ava".8 Mo"so wa nhag' yin ce no, am vin yaug ngaid mung: jeju kaid' nhag' myid nhag' lam: qhang: ru we' nhag' khyag' ra" akhyao jham bo: ra".9 Dazab zab qobo vhin: na yaug mangaid: data geim" nhag' yo: magyo" lo: na yaug mangaid:.10 Ngo nhaung" qobo we' daru: za: qobo dae byid: yaug mangaid:. Ngonhaung" shaid' ra" yug: no we' daru: za: loge, phaug' yaug mangaid:.11 Mug: gaung wa myidgaung tho' myhao: ru we' dakhyo: yao: re gyaug phug' myao" ra" mo; adao mae yao" nhag' myain: myid wa gyai qi" qhang: ra".12 Ba thug' we' ba vao va" lin: ru we' dakhyo: ngonhaung" re ngonhaung" qobo we' va" lin nhao: ra".13 Yao: pho" wa yao: zo: qere nhag' myain" ru we' dakhyo: Mo"so re: yao: re gyaug phug' myao" ra" mo, re nhag' myain" ra".14 Ngonhaung" gaung dam: sho: khyi" pe" ngaid: ru re yao: ba: ra". Ngonhaung" myid zhai: phaui: lhug ngaid: ru re yao: beim" na: ra".15 Byu: ba na ayo, wa myo, gae re" ru: ngaid: ra". Din" yo mae yaug: ra" bin: jham ru: bu" li" ko" ra".16 Shang" zo" la hug' lao" abu" shu: lo" mung: yao" jo, qo re lao" yao: maba lo: ngaid: ra".17 Mo"so re gyaug phug' ra" mo; adao mae yao" jeju wa geco' ne, mae" mug: khothao" myid khothao" joe" sho' ajo; jo; ra".18 Yao" dao: so: re cao" ra" mo, we' khang" dao: re cao" pyang" na mo; adao mae yao" dang main" ru wa zo: qae: myid: xag' ajo; jo, nae" ngaid: ra".19 Mo"so wa yao" la kin re mug: gaung dao mae zhaug' to: mung: yao" kheim: so' wa mang: din" khao: ngo" mae ngae: byo: lo" ra".20 Qam: o: mo" bo mung: yao" mung- dao: re tae" gyo: zo" re" yao" amyin" dao: cao" pyang" na ko" ra" mug: logyo: qe we" Mo"so re nga: yhe' byid' na ge,.21 Yao: o ngaui: khyo: mau" vin ko" ra" mug: gaung: ajham ataung qe we" Mo"so re nga: yhe' caung: khin" na ge,.22 Mang: din" khyi" khao: ngo" mae khau myhung: nha: to" ra" xaosu byu qe we" Mo"so re nga: yhe' byid: ge, Nga" solo we" Mo"so re nga: yhe' caung: khin" na wa,.