1 Alao" Yoba' dam: tau" ru wa-2 Ai: dao: dang: ra" ein: ngo ba ngaid qere: xaosu byu wa Mo"so: qhid' kheim: mae khoru: qo" dang main: nae" i"?3 Byu dayaug yao yao: we' jho" ngag nug: re dataung ja: mae" daja: re lao" re qo" ta" ngag nae" mangaid: .4 Juyi cao jab: ru we' qam: mo" bo: thao" ra" yaug re khoyaug yao" kheim: so' qam: o: re qo" aung nae" i"?5 Mo"so wa bam jham re mabeim: maso: qhui" pye' mung: yao" nhag' gyid' ru: yang tau: phaug' lhain" mhaug' pye' ra".6 Myid gaung re yao" jo, qo mae" deim" qhui" pye' ra". Ai mae" khaung zang jham wa laui" nain" ko" ra".7 Ba khye' re yao: pyang: ke' mung: mathug' li" lo: ngaid: ra". Kyi jham re re: nghoe' gam: nyham" pye' ra".8 Mug: gaung re yao: yao: lao" lhung" to" ra". Qid dae mo" bang: lhung" dao mae su" qin" ra".9 Yao: wa kuno; la: dau , bo" myhung we' kyi qo; lakhyain" jham we' qid bang" thao mae" kyi zhain re phain: to" ra".10 Yao: wa qi" qhang: ru we' matho' ba: se" ra" mau" re kaid' na: ra". Matho' nghe' qug lo" ra" mau" re kaid' na: ra".11 Nga" qhid' au: mae gyo" li" ngaid qere: ngo yao: re mathe' myao. Yao: su" lai: lo" ru re ngo mabeim" ke'.12 Yao: sham" qab: lo" nae" ga" ru re khoy- aug vae" tam" genae" i"? Nao pe" kaid' ein: yao: re khoyaug vae" myid: ko" i"?13 Mo"so nhag' yo" gyid' ru mayo shi: re , nhag' myid qi: mung: qam: bobyid' ra" mo, wa yao" qhid' kheim: mae nyham: khyo" pye' ru qhug' ko" ra".14 Ai: tho' mago" ngo yao: re khoru: ein: tau: mung: yao" qhid' kheim: mae pe" ja" dao: khyin: jhau nae" i"?15 Ngo wa dang main: ngaid qere: pe" mavae" tau: . Nga" tarha" agyi pho" re mho' bain" ra" dao: za: aqo" ta".16 Ngo khai: thoe re AsAng tau: byid: ngaid qere: yao: nga" dao: tae" gyo: byid nae" va" ein: ngo malam.17 Khoru: ga" re yao: wa la qam" yang ngo re gam: nghoe' to: mung: atae mamyao: ru ngo mae ajaid abyi boe" nhao: ra".18 Ngo so' lhau" tha" she nae" yao: maqaid ngaid: ra". Kho" thao" yug: no ru: ngo mae byang" vin" ra".19 Qam: o: kheim: so' mae ngha nae" ein: re yao: qam: o: je: bo: ra". Tarha" jho" mai qhi" nae" ein: re nga" thao sagso: kaid' nae" su mana.20 Ngo dang main: ngaid qere: nga" nhaid' ngo re qobo zhaug' li" nae". Ngo lam: lang" ngaid qere: ngo re tug' shai" jho genae".21 Ngo lam: lang" ngaid qere: nga" nhag' myid re ngo maqo" ba. Kao daui: na nae" lao" ngo ca' ra".22 Ngo dakheim: mho nug: ru wa- yao: wa dang main: yaug re re: , mashab makhy- ang: yaug re re: phyo' qheim" ba: ra".23 Nyag tin" labaug qug: khai: daja: ja: thaung" qhug' re qobo maqo" yaug thaung" qhug' ra" akhyo qi: jung" pye' ra".24 Mug: myid re makhyang: mo; lo, mae qhaug' byid: mung: tarha" agyi qe: myo, nho nga: lao: re sham nhao: ra". Mangaid: re ai: mau" re dao: phyid' nae" ru wa khoy- aug ngaid: i"?25 Nga" ba na ayo, wa tao: qao mo; tho' mae je: phyaid ra". Ai: ru wa tao" lai: lo" mung: agai re mathe' myao ngaid: ra".26 Ai wa phyaid: ra" lha jham re" ru: zo: nam re kya' yu: ra" zeim baung: re" ru: lai: lo" ra".27 Ngo wa no kyang: kyang" re" ru: no: mung: zhao: yao: myo, nho re qhu" mung: vae" ra" khyo joe" nae" ein: myid ngaid qere:28 Ngo kaug' qhui qhug' ra" mathao mae gyaug: nin" na: . Nao ngo re qobo mavhin nae" mangaid: ein: ru re ngo ba: na: ra".29 Khoru: ga: qe re: ngo re qobo vhin mung: ngo akeim aseim mae qam: ke' zai i"?30 Nga" gaung re gyu: qang" yang cid' mung: nga" lo, shao" shao" cid' shao: pye' ngaid yang: re:-31 Nao ngo re tham: bab: mae deim" khyo" ke' mung: nga" mai bau: lao" nga" gaung re ca' li" nae".32 Ngo yao: we' jho" ta" sho' nae" tau: tarha" la kin khyo daga" vao ye: nae" ru wa yao: wa ngo re" ru: xaosu byu mangaid: .33 Nga" shid' zo" au: dao mae lo, kai: mung: qo" tam" sho' nga" shid' zo" agyo: mae nyang nyhang" byid: nae" logyo: mana.34 Yao" vo: se: ngo mae" qab: yu mung: yao" gyaug pho" yang ngo re makyaug' veshao: .35 Alao" ngo yao: re magyaug mavae dao: qo" jhau nae". Ana" kam" ngo ta" nae" akhyo mabo ngaid: ra".