1 Alao" Nemaid' amyu" Zopha' tau: mung: ta" ru wa ,2 Dao: myo: jhau: re matau: byid: lo: gai nae" i"? Nhaid' za: ba: ta" yang: qobo loe, nae" i"?3 Nao dao: myo: jhau: ra" mathao byu qe sae za: gai: tae" na nae" i"? Nao su jung" re nao re qho' phyo' nae" ru na genae" mangaid: i"?4 Nao wa nga" dao: dang: main" ga: Mo"so: qhid' kheim: mae ngo shao lho" ga: mho va" ra".5 Mo"so ta" veshao: . Nao re qang yang: yao: nhaid' phung" veshao: .6 Nao ba: ra" tho' mae yao: wa ja: cao jab je: ba gau ngaid: mathao nyham" to" ra" juyi nao re phoe' thug' qhu" veshao: . Nao thaung" qhug' nae" yug: no qobo yao: myho" khyo" na: ru re nao ba wa, .7 Nao Mo"so: na qao: re qo" ca: ba nae" i"? Mo"so: na: qao: re nao ca yang: alhab' qo" gai: ba nae" i"?8 Mug: nyug lasung" tho' je: myhao: ru re khoru: gai: ba nae". Movo: mug: tho' je: no; ru re nao pe" ba: i"?9 Ai re ka" lao" mug: gaung tho' je: myhao: ru re khoru: gai: qo" kaid' nae" i"? Qid dae mo" tho' mae je: lae: ra".10 Mo"so wa cam" taui: mung: ca: pyam" ru re khoyaug qo" tam" genae" i"?11 Mo"so wa mashab makhyang: mo; nhag' myid re myao: ba: ra". Yao: bam mabeim: maso: zai" shaid' ra" qobo re myao: ba gau ngaid: ra".12 Ngaid qere: myao: lae" wa byu gai: boe" re she, byu vhang: wa juyi nhag' myid qo" yu: li" nae".13 Nao wa ni" nhag' myid nyhang" tha" mung: Mo"so jhao" ni" lo, yheim" qang: ke' yang:14 Nao kaid' ra" magai: ru re to" pye' mung: ni" yham mae makhyang: mashab: ru re makhae: yu ngaid: re:15 Apang alhag' ataug' atung" myo, nho we' nao nghao" qu" mung: gaung yug sho: byo, maca" lo" qhug' na: li" nae".16 Nao thaung" qhug' ra" qug: khai: kyin" nhaung" re nao to" myhid' pye' mung: yug: lai: lo" ra" qid re" ru: nao jho: li" nae".17 Ni" kao so' wa na" dao: gaung tho' mae bao: li" nae". Ana" mug: caid' ngaid qere: ne, seim re" ru: gyao" lo: li" nae".18 Nhag' nghae: jao: jo; ra" mathao mae nao qam: ke' mung: ana" aseim akeim ngaid qere: gug: gug: za: qhug' na: li" nae".19 Nao yab: jo; re khoyaug re: nao re qo" kyaug' genae" mangaid: . Byu myo: sho' mo, wa ni" myo, nho nga: lao: re qho genae".20 Makhyang: mashab: ra" mo; myo, jid' wa qam: nang" lo" li" nae". Maqo" phao: loe, nae". Yao: bam: myid: nghae" jao: wa qid ngaui" re" ru: ngaid: ra" ga: mho: ra".