1 Nga" solo wa kao re nghang" ra". Mho' bain" ra" dao: mathang mano: ta" na nae". Nga" nhag' lam: ngai: ru we' dao: ta" nae".2 Mo"so re ngo ta" nae" ru wa ngo re qobo davhin la, . Nao we' pe" mung: jho" ta" sho' ca" akhyo ta" kyo: la, .3 Nao ngo re pyam" yhin" ru wa ni" tau: dae de; ra" i"? Nao phain: to" ra" zai yo re nao yao: ca' pye' gai nae" i"? Byu pyag' vhain" qe: tau" da re qam: byid' ru maboe" i"?4 AsAng wa xaosu: myo, jid' de; i"? Byu qe myao: ra" khyo: myao: i"?5 AsAng: ba na ayo, xaosu: ba na ayo, re" ru: ngaid: i"? AsAng: zin na wa xaosu yaug gai: zin na re" ru: ngaid: i"?6 Ngo zaui" shaid' qobo re ca mung: qobo the' myao sho' pe" mung: qho: na: i"?7 Ngo makhyang" ra" byu mangaid' ru we' ni" lo, mae" khyi: yu nae" yaug mana: ru re nao ba: na gau ,8 Ni" lo; yang ngo re phain: to: mung: nao ngo byaug sho' nai: mhain" venhaung.9 Myid au: naug: ru: nao ngo re kaid' to" ru re beim: wa, . Dalhang myid phaui: lhug dam: boe" nhao nae" i"?10 Nung: nug' re" ru: nao ngo re vhe' khyo" pye' mung: nung: nug' pe' khai" ru: ngo re gin"khai" kaid' pye' nae" i"?11 Sho: we' shoqid: yang ngo re nghoe' gam mung: shoqug: sho: gyi: jham: yang lao" zham: to: va".12 Kao so' we' jeju nao ngo re byid' to: va". Nao lhaug' zaung" gam caung: ra" jeju: mathao nga" solo qo" gang" tang: na va".13 Ce: mau" boe" ru re ni" aung khug mae zug' to" ra". Nao myid: tau" da: ru we' dakhyo: ngaid: ru re ngo ba va".14 Ngo qobo kaid' ru re nao xam" to: mung: ngo zai" shaid' nghung" ru re lhoe' ke' nae" nao ma vang" ngaid: ra".15 Ngo tarha" maci ngaid: re ngo byu xa: vo: qoe, shao: . Ngo dang main ngaid qere: ngo yao" myo, khung: lao" mavae" ci: qhu". Ngo thaung" qhug' ra" sho: jhin qug: khai: re myid: qu" mung: myid: nghae" mug' na: .16 Ngo to" ye, lao" AsAng wa lo:tin: re" ru: ngo re cao" khe' mung: ni" mug' pho" akhyo ngo re qhu" ava".17 Ngo e qobo vhin nae" sagso: nao cao" khai shi" ra". Ni" nhag' yo" ru wa nga" dao mae je: myo" lo mung: mang: khaid' ru wa dalhang: thao dalhang ngo thaung" qhug' na: .18 Ngo re nga" myhi" aung mae" pe" mung: jhui" thug' yu: i"? Ai ru: mangaid: re ngo kao mabo mung: khag' the' myao genae" mangaid: .19 Mana: byaug lo" ra" yaug re" ru: ngaid mung: nga" myhi" aung mae" mang: khung: khyo vo; ye" ru qhug' nae" ngaid: ra".20 Nga" ba na ayo, wa alang" zo: za: angaid: . Mug: caid' we' shid: ra" bao qaung nghoe' to" mang:-21 Gae gaung: myi: re" ru: caid' no; jo; ra" khyo , shid: ra" bao qaung we' mhain thaung: zho: khag' za: ngaid mung: -22 Bo" bao lao" mug' caid' tang: no; ra" mug: khyo ngo lo" mung: madam: gai: tug' lo lo" mug: khyo mavao shi: re ngo so' tha" she: ru qhug' shao: , ngo yao: re za: nha: to: gela, wo" ga: mho: ra".