1 Xaosu byu wa myid gaung dao mae bau kyoe: sho: no, mau" zaui: zo: ca" mangaid: i"? Yao" ba na ayo, wa o: kaung qe: ba na re" ru ngaid: ra" mangaid: i"?2 O: kaung kaung yaug ba vao re lao" mung: lao jhao: vao yaug wa lao jhao: phug' re lao" ru we' dakhyo:-3 Ai re" ru: ngo wa qug: khai: re ba na lho" khye' myao" sho' phau" na: . Na myain yaug mayo: ru wa nga" tau: kung" to: venhaung.4 Khonhae" she, myi" re lai: phyid' mung: yab so: to" nae" i"? ein: nyung zo" re" yab va". Mug: bo" sho' ngo aphaug' alhain: za: kaid' na: .5 Laug daung: we' vhag' wa nga" gaung re nghoe' gam: ra". Nga" shoqid wa go; gyae: mung: vhag' yug: na: ra".6 Nga" ba na ayo, wa qo, gin: jao: paug' tho' phyaid: ra".7 Nga" kao so' wa la shao shao ngaid: ru re myid beim: wa, . Thao dalhang gai nae" ru re ngo mathe' myao.8 Ngo re myao: ra" yaug wa thao mae mamyao lo: nae". AsAng wa ngo re li" kam" qu" re ngo mana lo: .9 Nhag' qhid' qui" byaug: baui" lo" re" ru: mang: khung: khyo gyo" vao lo" mo, re: madam: gai: thug' lo lo: .10 Yao: yao" yham khyo lo" ngaid qere: yao" na qao: wa yao: re malham: ba: qu" lo: ngaid: ra".11 Ai mung: nga" nhaid' magai pyid' to: nae". Nga" nhag' myid myaung: qhaid' ru we' dao: jhau nae". Ngo nhag' kyo: myid: gyae: ru we' dao: ta" nae".12 Ngo wa qid dae mo" ngaid: ra" i"?. Mao jaung: ngaid: ra" i"? Ai ru: ngaid mung: zaung" lhaug' nae" nha: to: ko" i"?13 Nga" yab jaung: ngo re yaug yo nhao nae" we' nga" yab jo, qo nga" dao: cae: tae: nhao veshao: ein: ta" re ,14 Nao wa yab mo; yang ngo re kyaug' nhin" ra". Lomyhung" we' re: gyaug: din nhao: ra".15 Ngo wa nga" shoqug: pyain" au" lo" nae" tho' mae kao so' thao" mung: shid nae" ru re je mung: myid: nghae" lao" na: .16 Ngo wa qam: o: nang: va". Malam: lai: daui: na zai mangaid: . Ngo wa ngo yao: za: na nug: ra". Nga" ba na ayo, angaui" za: ngaid: ra".17 Nao wa xaosu byu re nga: yhe' tau: to' mung: yao" akhyo myid: nghae" ca: qu" nae" we'18 Ne, seim khao: ngo" yao: re li" qu" kam" na na mung: ayo, khao: ngo" lag yu: na: ru wa byu wa khoru" yaug ngaid: ra" i"?19 Khonhae" khoyo, mae" maqu" gam lo: myo, khung: lhang: phaug' nae" i"? Ngo khata: re myug sho' ngo re za: khonhae" joe" sho' to" to: nae" i"?20 Byu re qu" gam: na: ra" AsAng we" ngo qobo qo" ru dang va". AsAng: qhid' kheim: mae khoru: kaid' zai i"? Ngo yao" gaung re ca' pye' ru joe" sho' pe" mung: ngo re shepye' jo, qo boe" nhao: i"?21 Nao pe" mung: nga" qobo re makhyaid'. Nga" yug: no re malhoe' ke' i"? Khomyhao" mangaid: re phaui: lhug bam mae ngo lang" jhao" lo" mung: nao ngo re li" cao" qho ngaid qere: ngo mana: byaug lo: nae" ga" ra".