1 Nao wa mao jaung: re ngo: nho: gyang" yang qo" lao" nghoe" yu nae" i"? Yao" sho re taui" yang qo" thung" she nae" i"?2 Yao" nho re ne" yang qo" jhui nae" i"? Yao" nhaid' lhain: mae deim" yang qo" thug' kyao" nae" i"?3 Yao: nao re maqaid maqui" mho' bain" li" nae" jho: i"? jhu" caung" ra" dao: re ta" li" nae" jho: i"?4 Yao: dapyaid dato ni" mau" zaui: nae" yao: we' nao dao: so: to: nae" gai: boe" nae" i"?5 Ngho' we' lhau sab' ru ru: yao: we' lhau sab' qaid nae" i"? Yao: re ni" myi: zo: qe: byin cao: toe' nae" i"?6 Ni" zam" byin cao: qe yao: re phyo' zo" li" genae" i"? Gau mung myho" khyo" mo, jho" lag: gae genae" i"?7 Yao" au: re ngo: thug' lakhyug: yang re: , dae jho: dae khu mae" fag' jham qo" thad' genae" i"?8 Yao: re the' tin" qu" wa, . Yao: lham: tug' khaid' li" nae". Thao phyao: yao: re khaid' nug lo: nae" mangaid: .9 Yao: re khaid' ra" yaug wa pe" myid: nghae" jao: jo, nae" i"? Yao: re the' myao: re lao" nhag' lam: qu" thao" nae" mangaid: i"?10 Yao: re qo" nhug' peim: sho' khoyaug re: mavae" ko" ngaid: ra". Ai ru: mung: nga" qhid' kheim: mae khag' qo" ye, genae" i"?11 Ngo jeju tug' beim: sho' ngo re khag' jeju kaid' qu" ko" i"? Mug: gaung gyid' mae jo, mae: jo, na mae: na wa nga" re" ngaid: .12 Mao jaung" gaung khyao: qam: o: gai lho" ra" adau atam" jham re ngo manyham" to: .13 Yao" mai bau: re khag' qo" qhid' byid: genae" i"? Yao" bo: qae nhae khyo khag' qo" te' ye: genae" i"?14 Yao" myo, khung: kham: dung: re khag' qo" phung" genae" i"? Yao" zaui jin jham wa qu" gyaug sho' ru ngaid: ra".15 Gang: gang: te' te' za: soxam: be; to" ru ru: yao" gaung mae" akye' jham wa dakye' we' dakye' te' te' za: de; ru wa yao" nga: yu jao: ngaid: ra".16 La lao" maqo" vao lo: sho' dakye' we' dakye' te' te' za: de; ra".17 Dakye' we' dakye' maqo" gai: qhid' lo: sho' jho" xo' taui" to" ra".18 Yao: ag' co" co" ke' re: bao qhi: ru thug' li" ra". Yao" myo, jid' wa ne, seim mug: bo" we' dau: ra".19 Yao" nhaid' mae" myi: shae thug' li" mung: myi: jhang: wa shi ga: dao" ra".20 Zhau: na: ra" ug' mae" angaui" thug' ru ru: yao" nho mae" angaui" thug' ra".21 Yao: so' she: ru wa myi: gyoe: re myi: qo" te' mung: yao" nhaid' mae" myi: shae thug' li" ra".22 Yao" lang zang: mae qam: o: zaung: ra". Yao" qhid' kheim: mae gyaug: din: ru wa go" jhu" na: ra".23 Yao" sho: khyi" jham wa apaug' apyae ngaid mung: tang koe; ra" ru mung: madaui malab ngaid: ra".24 Yao" kheim wa laug baui re" ru: qao: ra". Laug lhang o: gye, re" ru: qao: jhe; ra".25 Yao: to" thug' li" re qam: gai mo, lao" re gyaug: nin" ko" ra". Saung" gyaug: byaug ko" mung: ago ru: boe" ko" ra".26 Shae: yang qam" re shae maqo" kham nae". Lhae , myo: , go we' gye sin: zaug nae" mangaid: .27 Jo, to' re khofo re" ru: , gyid: ne re sag' qeim: re" ru: jho: ra".28 La: myo" yang yao: re qo" khe' ke' zai mangaid: . Bag din" , myo: , laug baui jham re khofo re" ru: toe' pye' ra".29 Thaung kang re vo, phaui: re" ru: jho mung: lhae taid' yang qang: re yao: qi: pye' ra".30 Yao" vae: qid wa gyai tho' ra" ug' cug' je, we' dau: ra". Lakya: re" ru: tham: bab: bam" re kyo' shao: na: ra".31 Ug' zhau: ru ru: qid dae re qo" zhau nhao: ra". Qid tham: re sheim nae nam bo: ra" thaug' bain: re" ru: poe" pye' ra".32 Yao: su" lai: lo" ra" khyo dang wa bao qhi: jo, mung: qid dae wa phyu: lo" ru ru: ngaid: ra".33 Myid gaung: dao mae yao: we' qo" jho" mai qhi" nae" gug' nyhug' mana. Gyaug myid mabo lo: sho' yao: re phain: to" ra".34 Tho' zhao" mae" na mae" na jo, mae" jo, re maphug' makhyaid' kaid' ba: ra". Yao: wa bau" nghao" ra" mo, alhab' adao mae zug: ngaid: ra".