1
Alao" Yoba' dam: tau" ru wa ,2
Ngo thaung" qhug' ra" qug: khai: re lag: qu" geshao: . Ngo qhug' khae: yu: ra" kyi" khyag' qug: khai: re jao mae lag nae" qaung" to: geshao: .3
Ai ru: ngaid: re labyid ma coe tho' la: nae".4
Gug: mang: dae gam ug: Mo"so bag: myo: khe' kam" ngo re zao" zaug mung: nga" solo wa myo: no; ru: pho: ava". Mo"so qhu" ra" gyaug: din: pho: wa nga" qhid' kheim: bam zao: jo; ra".5
Seyo: myao: wa mhin: nau" jao: mae myang nae" i"? Nung: jaung wa zo: pho: jo; ra" au: myang nae" i"?6
Mamyho' ra" ja: mae xo: make' lo: gai: zo: nae" i"? Qo,au"akaug' wa min bo nae" i"?7
Lo; yang lao" manug: the' tin: . Ngo ma-o: ra" ja: re ca' yang: re: ngo zo: va".8
Ngo mho' ra" ja: qo" veshao: . Ngo myid: nghae" o: ra" ja: Mo"so byid veshao: .9
Ngo myid: nghae" o: ja: jham wa Mo"so wa ngo re phyo' qheim" pye' veshao: . Yao" lo, yheim" qang: ke' mung: ngo re mho" shid' veshao: .10
Ai ru: ngaid re ngo wa yaug yo nae". Nyung nug ngaid qere: zang: qhao" nae". Ngo re pe" o: mado shao: . Shao gyang" ra" yaug: dao: re ngo mangag nae".11
Ngo myid: nghae" lao" na nae" nga" qam: o: khai mae i"? Ngo qam: vhin: zang: qhao" na: re pe" so' ha" qo" nae" i"?12
Nga" qam: o: wa laug baui ngaid: ra" i"? Nga" gaung sho: wa gyid: ne ngaid: ra" i"?13
Ngo wa ngo yao" gaung khyao re pe" maqo" kaid'. Nga" juyi re: gain: byaug va" mangaid: i"?14
Ba nam qe sho: jhin qhug' ra" yaug re nhag' myain: ko" re gai: ra". Ai ru: mangaid: re yao: wa gug: mang: dae gam ug: Mo"so re gyaug phug' nae" nhag' myid baui" lo" byaug zai ngaid: ra".15
Nga" mao: nga" nhaung: qe wa qid gyaung: re" ru: sham" nag mung: lao: khaung: mae yug: ra" qid re" ru: yug: qui" baui" byaug genae".16
Ai: qid gyaung: qid yug: khai" lo" mung: gyu: khai" ru" ru boe" byaug: ra".17
Zin vao kheim: joe" lao" ai jham qang" lo" mung: laung: ra" mathao mae kin" kyaug' ho: lo" li" genae".18
Ai: qid yug: ra" qid gyaung: jham wa yug: lai" lo" mung: zo" zo" mae" yug: gain: lo" li" genae".19
Temain: amyu" zo: mo, zhain jham wa qid qho ko" ra". Sheba' mang: bao: qid qo" nae" ga: myid: nghae: mung: joe" li" ko" ra".20
Ai ru: myid: nghae: ko" mathao qho' phau: mung: yao: ai: jo, qo khyo joe" lao" myo, nho sham: byaug ko" ra".21
Ana" naonhaung" wa akeim aseim za: ngaid ko" ra". Naonhaung" gyaug pho: myao lao" gyaug: nin" ko" ra".22
Ngo re jhaung qhu" byid: gela, , naon- haung" jo, nho" mae" ngo re phoe' byid: gela, ,23
Gyevo: lo, mae" ngo re khyaid' yu gela, , sulhe" lo, mae" khyi: yu gela, ein: ngo mho: ra" i"?24
Ngo re mho" shid' gela, , ngo sae za: tae" to: nae". Ngo shaid' ra" akhyo re ceim" shid' gela, .25
Dang main" ra" dao: wa kheim: so' qi" ra". Naonhaung" jung" khyoe' ra" dao: kheim: wa khai: mae jo; ra" i"?26
Ngo dao: jhau nae" ein: aseim" re naonhaung" qobo vhin nug ko" i"? Nhag' nghae: jao: majo, lo" ra" yaug ta" ra" dao: wa la shao shao ngaid: ra".27
Gai gai: yao: naonhaung" wa cug' zo: nau" re yhin" pyam" ko" ra". Ba nam pho" tau: mae dung: gyain: dau: ko" ra".28
Ana" nga" gaung re qu" qu" ge, . Naon- haung" qhid' kheim: mae ngo mhug' vhain" dao: ta" ra" i"?29
Lo" ge, se, . Qobo mathug' veshao: . Ngaid va". Dam: lo" ge, se, . Nga" khyo wa dang main" ra" khyo ngaid: . Ce: mau" mae ngo dang main" ra".30
Nga" sho mae qobo de; ra" i"? Gai: ru magai: ru re maba: kho' khaui: nae" ru ngaid: ra" i"?