1 Ana" khai: yao: qu" wa, . Khoyaug tau: byid: nae" i"? Shao gyang" mo, mae khoy- aug re tau: qu" nae" i"?2 Nhag' yo" ru wa byu vhang: qe re phyo' qheim" ra". Qu" nhung: ra" nhag' myid wa juyi mabo yaug re shid nhao: ra".3 Byu vhang: agyi: zaug ru re ngo myao lao" yao" jo, qo re ngo phyo' sin" pye' nae".4 Yao" zo: dau qe: yaug yo: jao: wa va" byaug ko" ra". Vogaung" kham: dung: mae se' da: be, khyaid' qhug' ko" qe re: khyi: yu nae" byu mabo.5 Yao: yaid: to" ra" gaug re moe, shab' mo, wa zau: khyae khug mae" lao" khug' yu zo: ko" ra". Yao" jo, nho" zai yo jham re re: qid shab' mo; myug: pye' byid: ko" ra".6 Aqug: aqae" wa myid gaung mae" thug' li" ru mangaid: . Qug: khai: kyi" khyag' wa myid gaung mae" yaug: thug' li" ru mangaid: .7 Myi: jhang: jham wa mug: tho' khyo dao" do, lo" ru ru: byu wa qug: khai: kyin" nhaung" khug mae na: lhang: qin" nae" tau: khau: li" va".8 Ngo kam" wa Mo"so re myid: nghae" na nae". Nga" mau" zo" re Mo"so mae qhaug' nae".9 Mo"so wa qi" qhang: ru we' matho' myao: ba lo" ra" mau" re kaid' na: . Matho' nghe' qug' ra" mug' pho: mau" re zaui: so" ra".10 Mug: myid: dao mae mug: qu: sheim: byid: mung: yothaung: yo gug re jhug' dag nhao: ra".11 Yao: wa ai re" ru: masho: majhin mo, re lao" tau: to' ra". Kaug' qhui qhug' mo, re re: ngaui bau: yaug yo nhao: ra".12 Apyag' avhain: kaid' ra" mo; mau" zo" ma-aung myaug nae" tau: yao: bam: myid: yaung tau" da re phyo' qheim" pye' ra".13 Juyi bo: ra" mo, re yao: yao" juyi: yang pyam" ra". Mhug' 'vhain" zo" ra" mo, phyo" qham: to" ru re tau: mhaug' khyo" byid' ra".14 Yao: bam na" gaung mae mug: caid' ru qhug' mung: na" dao: gaung mae myi" ayo, re" ru soe' du" qin" ko" ra".15 Yao: wa yao: bam nyhang" seim" to" ra" shae gye mae" re: , qam: bo: ra" mo; lo, mae" sho: jhin mo, re khyaid' khyi: yu: ra".16 Ai re" ru: sho: jhin: ra" mo, nhag' nghae: jao: jo; ra". Makhyang" mashab: mo, wa yao: yao" nhaid' re pyid' to: ca" nae".17 Mo"so qobo ceim" shid' ru qhug' ra" yaug wa nga: lho" ra". Qam: mo" bo: ra" Mo"so: mho" shid' ru re maphug' makhyaid' dakaid'.18 Ai: AsAng wa zai" caid' byid: yang: dam: nyhang" thab' byid' ra". Qobo dae byid: mung: yao" lo; yang dam: zai" gai byid' ra".19 Yao: wa ngo re qug: khai: khyaug' ja: mae" khyi: yu: ru za: maka" nhaid' lhang thaung" qhug' ngaid yang: re: aqug: aqae" nao re zao" nae" mangaid: .20 Bao" khug' gyo" yang: shid nae" ru mae" re: gye khaid' ra" au: shae gye mae" re: nao re khyi: yu: li" nae".21 Jung" khyoe' gaui mho: ru mae" nao loe; lo mung: byo; qeim: ru qhug' ngaid qere: magyaug ca".22 Byo, qeim: ru we' bao" khug' khug' ru re nao qi: lhaui" pye' mung: myid gaung: dao mae" myang kha: zoqhid jham re magyaug ca".23 Khoru: ga" re din" yo mae" laug baui jham wa nao we' dao: so: to: mung: seyo mae" zoqhid jham wa nao we' zam" khug: ba nam bokaid' li" genae".24 Ni" yham yaug yo: ru re nao the' myao mung: ni" mug: myid khyo joe" lo" ra" au: nhag' lam: byo, nae" akhyo majo, nae".25 Ni" amyu" nyaug myo" laug: lo: ru we' ni" zo: myid: qe wa myid gaung: dao mae vohau: yo ru: ngaid: ru re nao the' myao: li" nae".26 Ayo, joe" lao" yaid: yu: ra" gaug dang: re" ru: nao wa kao qi" lo mung: mang khung: khyo vao lo" zai ngaid nae".27 Ce: mau" re ngonhaung" ca: qu" mung: ana" ta" ru we' dakhyo: jo main: ra". Tae" gyo" yu wa, . Ni" nhag' khug mae xam" ci wa, ga: mho: ra".