1 Dam: dalhang Temain: amyu Elipha' dam: mho: ru wa-2 Nao we' dao: jho" jhau: re nao nhag' myid: qam: shain: lo" nae" laug?. Ngaid qere: dao: majhau lo: qo" na nae" i"?3 Nao wa byu myo: sho' re mho" shid' va". Lo, pyain" ra" mo, re lhaui" tang byid: va" ra".4 Ni" dao: thoe: yang lang" lo" ra" mo, re qam: pin" byid: va". Pyain" au" byaug: ra" paid' laug re nao qam: pin" byid: va" ra".5 Ana" kam" wa nao yao: thaung" qhug' mung: nhag' lam: byo; ava". Nao re zao" thaung: mung: myid: mug' nghae" na: ava".6 Nao phug' myao" ra" nhag' myid , lam jang" ra" myid , myid: nghae" ra" nhag' myid , shao lho" ra" myid , tarha" cao" ra" nhag' myid khai: mae i"?7 Beim: so: wa, . Qobo maqo" ru khoy- aug byo, qeim: ru qhug' ko" ra" i"? Dang main: yaug wa khai: mae thao" lo" ra" i"?8 Ngo the' myao: ru we' dakhyo: yug: no re sin" ra" yaug we' makhyang" ru re sin" ke' ra" yaug wa ai re yao: dam: yaid: yu li" genae".9 Mo"so maid: ke' lao" ai jham byo; qeim mung: so' she: ru gain: lo" qhug' ko" ra". Yao: nhag' yo" laung: ra" so' we' nhag' myid mug' byaug veko".10 Lo:tin: kyid' ru: , gyaug pho" ra" lo:tin: myang thoe we' lo:tin: nau" jham: zaui gyug' byaug veko".11 Zo: pho: majo; ra" mathao mae lo:tin: mao: shid byaug mung: lo:tin: zang we' lo:tin: nau" jham wa byo: sin" lo" veko" ra".12 Dao: thoe dathoe ngo re vho' nyham" ta" mung: nga" no: khye' wa ai: dao: so' so' ru re the' gyo" ra".13 Byu jham yab mo" myid' na ko" ayo, mae myi" mae" lamyhung" mathao gu: myid: nghae" na: au:-14 Nga" shoqug: shoqae jham alhab' laui" nhain" li" mung: ngo gyai yao: gyaug: din: pye' va".15 Ai: au: alo dalo nga" qhid' au: mae apyi avhang: su" lo" mung: ngo gyo, shi: qid ga" lo" kyi: .16 Ai: alo wa ye; na mung: yao" akhyao re nyang" bao bao ngo mamyao. Bao qaung za: ngo the' myao: . Sae za: tae" na thao ngo the' gyo" ra" thoe wa ,17 Shaid' ba: ra" yaug wa Mo"so tho' mae je: dang main: nae" i"? Xaosu byu wa phain:18 AsAng tho' mae je: shao lho" nae" i"? – Yao: wa yao" o: kaung jham re malam" ngaid: ra". Mug: logyo: jham re lao" jab byang" ru mabo ga: jho: ra".19 Ai ru: ngaid: re myid phaui" yang kaid' mung: myid gaung mae na ko" ra" byu jham re pe" ta" cang bo: i"? Yao: bam re bothaung: yang lao" aung: ra".20 Dane; ba mae za: byo, qeim ba: ko" ra". Khag' pe" shui manho: ru: malam: lai: gain:21 thao" lo" li" genae". – Yao: bam: myo, nho ham" hung: byaug: baui" lo" mung: yao: bam wa juyi mabo lo: shid: lo" ba ko" ra".