Yoba'-38

(SHAO GYANG" JHAM: PAUG' )

切换到福音影视网-新版圣经

  • 1 Alao" AsAng wa la au: mae" Yoba' re mho: ru wa-
  • 2 Juyi mabo lo: dao: thoe: yang za: nga" tau" da zai" nho' pye' ru wa khoyaug i"?
  • 3 Lau: gai re" ru: phyid' cui: cui: wa, . Ngo myid' ra" dao: re phyid wa, .
  • 4 Mug: myid: aqao: apain re ngo de" ra" au: nao khai: mae i"? Nao ba: gyo" re
  • 5 ana" ci: qhu" la, . – Mug: zhaung mug: pyi re khoyaug ka" na: ru re nao ba: i"? Myid gaung: dao mae taui: re khoyaug she: khao" ra" i"?
  • 6 Ai: apain aqao: re pe" mae zhaug' tang: to" ra" i"? Bo" myhung jham daga" nghaui" caung" na mung:-
  • 7 Mo"so: zo: dau qe alhab' ngaui bau" hug' ko" re yham khaung jheim mae" laug baui re khag' vo; kai: ko" i"?
  • 8 Qid dae mo" baug: thug' li" ra" au: khoyaug kham: we' qo" jhid' to: genae" i"?
  • 9 Qid dae mo" re nhag' qhid' yang thab' to: mung: mug: caid' yang yag: thab' ra" ayo, mae-
  • 10 Nao ce: jo, qo joe" sho' li" ca" nae". Jain" yang: magai: lai nae". Ni" bau" nghao" ngaid beim" ru wa ai mae thao" nae".
  • 11 Qid dae mo" kyo: dam: re re: ngo to: mung: kham: we' kham: kyao" to" to" ra" ayo, akhin: mae khoyaug li" bao" ko" i"?
  • 12 Nao wa ni" data geim" mae" ne, seim re pyang: to" qu" i"? Mug: bo" wa mug: myid gam: sho' mae bao: na nae" ta" qu" i"?
  • 13 Tarha" macao" ra" mo, re qo" kyaug' tao" ke' sho' ne, seim mug: bo" re qo" bao nhao nae" i"?
  • 14 Ai: mathao mae mug: myid wa soxam: be; te' to" ra" myid au: naug: khai" we' dau: ra". Azai: akho alhab' geim" wa mai bau: xug' khye' re" ru: de: de: za: ngaid: ra".
  • 15 Tarha" macao" ra" mo; bo" bao wa sham: lo" mung: tau: qang: ci: ra" lo, jham re: gyug' lo" ba: ra".
  • 16 Nao wa qid dae qid baug: khug khyo vao: qu" va" i"? No; thao" ra" lo" thao" jo, qo mae su" lhang: qin" qu" va" i"?
  • 17 Shid no kham: dung: jham nao re phung" qhu" veko" i"? Shid: ra" bao qaung khyo joe" ra" khyo dang nao myao: qu" va" i"?
  • 18 Mug: myid: myo, nho dagye, geim" re nao myao: qu" va" i"? Alhab' re myao: qu" va" ngaid: re ta" wa, .
  • 19 Mug: bo" khug ngha: ra" jo, qo khyo joe" ra" khyo dang khai: tau mae i"? Mug: caid' jo, qo re: khotau mae ngaid: ra" i"?
  • 20 Gai gai: yao: nao wa mug: bo" mug: caid' khyo ngonhaung" re qo" dai" byid' ra". Yao: bam: yham khyo joe" ra" khyo dang jham re ba nae" ngaid: ra".
  • 21 Nao wa geco' ne, mae" khau mung: ni" kao qi: va" mathao mae ba nae" ngaid: ra".
  • 22 Gyu: bo: ra" bain" khug khyo nao vao: qu" va" i"? Qug: khai: thaung" qhug' ra" ayo, we' gye khaid' mung: ,
  • 23 Gye qhug' nae" ayo; tau: ngo qaung" to: mung: lag qu bain" re nao myao: qu" va" i"?
  • 24 Mug: bo" khoyo, khokhin: mae" tha" lai: lo" mung: ba thug' la wa khai: mae" mung: mug: myid: dao byo: sin" byang" ra" i"?
  • 25 Byu mana: ra" mug: myid we' byu mana: ra" seyo mae mug: qu nhao nae" re:
  • 26 Gao so yo mae jhug' dag nhao mung: mhin: nau" nhao nae" re:-
  • 27 Mug: qid: yug: lo" nae" khyo dang , mug: dam: we' tin" ra" lhe' caid' caid' nae" khyo re khoyaug phung" byid' i"?
  • 28 Mug: qid: yao: pho" wa khoyaug: i"? Nghin coe: re khoyaug myhung: ke' ra" i"?
  • 29 Qid khai" wa khoyaug: aung mae" thug' li" i"? Mug: gaung: nghin khai" re khoyaug: aung mae vin nhao: i"?
  • 30 Qid wa laug baui re" ru: khai" lo" mung: no; ra" qid phaung jham we' pe' khai" lo" byaug: ra".
  • 31 Nao wa kyi qo; lakhyain" re qo" sham" dang: nae" i"? Kuno; la: dau: phyid' cui: re qo" pheim nae" i"?
  • 32 Yo, gin re nao gai: kaid' thug' nae" i"? Bo" myhung wa yao: zo: jham re qo" jhui" au: she nae" i"?
  • 33 Mug: gaung mae" tarha" li re nao ba: i"? Ai: tarha" li myid gaung re ug nae" nao akhang" qo" byid: nae" i"?
  • 34 Mug: qid myo: sho' yang nao re nghoe' gam nae" tau: nhag' qhid' jham re nao amyin" qo" khyo" nae" i"?
  • 35 Lhe' caid' re nao qo" vhag' nhao mung: ai jham wa ngonhaung" na: na: bam va" ga: ta" yang: ye" lo" li" genae" i"?
  • 36 Nhag' lam: aung khug mae juyi laba lajhao re khoyaug ke' byid' i"? Ba: gyo: nae" nyain: re khoyaug byid' i"? Juyi bo mung: jham thaui: re khoyaug qo" nghe' qug genae" i"?
  • 37 Phaui: lhug thaui" lang" jab: lo" mung: myid zhai: kang: lo" re
  • 38 Mug: gaung: qid am jham re khoyaug vhe' khyo" ke' ra" i"?
  • 39 Nao wa lo:tin: jham: tau: zo: pho: qo" qho byid: nae" i"?
  • 40 Lo:tin: nau" jham yao: bam: khug ngha jao: mae qhaug' mung: thao" jam" gyid' mae" jhug' qu" yang: na ko" au: yao: bam re gyi: sho' qo" zho: nae" i"?
  • 41 Kuno, nau" wa zo: zai majo, mung: cao" lhang: qin" mung: Mo"so re zag: yao ko" ra" au: zo: pho: re khoyaug byid' ra" i"?
回到本卷目录 回到本版本目录 回到首页