1 Ce: akhyo jham: mathao mae nga" aung khug: nhag' lam: nin" li" mung: yao" jo, qo mae" qui" lo" byaug: ra".2 Yao" nhaid' mae" thug' ra" dao: thoe re gelho: za: tae" gyo: ge, .3 Mug: gaung gyid' mae yao" thoe pyo: sin" ke' mung: mug: myid gye, thao" sho' mae lhe' caid' vhag' nhao: ra".4 Lhe' caid' vhag' lai: lo" thao mae thoe thug' ra". Yao: wa yao" phung bao we' mug: dam: dam: nhao: ra". Mug: dam: dam: lao" mug: qu nae" ru re yao: matam" ngaid: ra".5 Mo"so wa yao" thoe we' mug' nae" ru myang: ra". Ngonhaung" matho' ba byid' ra" mau" qi: re zaui" na: ra".6 Myid gaung: dao mae gyo" wa, ga: gyu: re re: mug: ce' jham re yao" kheim: so' qam: o: mathao mug: qu la qam" re khang" to" ra".7 Yao: phain: to" ra" xaosu byu qe alhab' ba genae" tau: mae byu yaug nge, kaid' ra" mau" re tam" kyo" to" ra".8 Alao" zoqhid jham wa yao: yao" khyaung khug vao mung: yao: bam: khug ngha jo, qo mae qhug' na: bam ko" ra".9 La sham" wa qid bang: khyo" re: gyo, ngin" ru wa qid meim shaid' mae" thug' lo ko" ra".10 Mo"so maid: ke' lao" qid khai" boe" mung: qid dae geim" wa qid khai" lo" ra".11 Nhag' qhid' thaui: mae" mug: ce' gyo" nhao mung: lhe' caid' yang nhag' qhid' jham qui" lo" nhao: ra".12 Ai jham wa yao" qao: mae su" lhang: qin" mung: yao: mho: to: va" ru we' dakhyo:-13 Aqug: akhai: dae byid: nae" re: na gai gaug qo" nhao nae" re: mug: myid gye, geim" mae mau" zo" zaui" pyang" ra".14 Yoba' we" nga" dao: re gyo" yu wa, . Yaug yo za: na mung: Mo"so: mug' pho: re myid: nghae" qu" wa, .15 Ai: mau" zo" jham Mo"so khoru: nyhang" to: mung: nhag' qhid' thaui: mae" lhe' caid' bao: li" ru re nao ba: i"?16 Juyi laba lajhao jab byang" ra" Mo"so: mug' pho" mau" ga" ra" nhag' qhid' jham wa mug: le; phyo: mae" yang" ra" akhyo nao ba: i"?17 Qid bang" la: yang myid gaung laung: lo mung: ni" ve, mai bau: khoru: lam nyoe" li" ru re nao ba: i"?18 Sheim" yu: ra" gyid: qab qhu" re" ru: gang" tang: jo; ra" mug: nyug lasung" re Mo"so we' qhain: mung: bo: lao" khao" i"?19 Ngonhaung" khoru: ta" nae" mho" shid' la, . Ngonhaung" wa mug: caid' mae nab: jo, yang: ngonhaung" pe" re: maba: myid: qu" lo: .20 Ngo ta" ra" dao: Mo"so re ta" kyo: genae" i"? Kho khoru: byu wa Mo"so re vae" ta" re byo, qeim: ra" khyo joe" li" nae".21 La hug' lo yang: mug: gaung re hug' kyang" shao: pye' mung: bao: li" ra" bo" bao re byu qe maqo" qu" ko".22 Qid meim shaid' mae" hhang re" ru: bao: qhi: thug' li" ra". Mo"so gyaug pho: phung bao bao: qhi: jo; ra".23 Qam: mo" bo: ra" AsAng re ngonhaung" tho' qo" ca nae" mangaid: . Kheim: so' qam: o: re: tarha" pyam" ru re: dang main" ru: yang re: gekai: lai ngaid: ra". Khag' re re: mayhin" pyam".24 Amung: xaosu byu qe yao: re gyaug phug' ko" ra". Au: naug: gai: ga" mo, dayaug lao" re: Mo"so re maqo" qu" ga: mho: ra".