1 AsAng wa Yoba' re dam: mho: ru wa-2 Nhaid' dao phyo mho" ke' ra" yaug wa qam: mo" bo: ra" Mo"so we' gai: jho" ngag nae" i"? Mo"so we' tug' shai" nug: yaug dao: tau: veshao: ga: mho: ra".3 Amung: Yoba' wa Mo"so re dam: tau" ru wa ,4 Ngo pe" khyag' mathaid' yaug AsAng re dao: gai: tau: nae" i"? Nga" lo; yang nga" nhaid' re jhid' to: nae".5 Dalhang ngo the' ta" va" mung: mavae" dam: ta" lo: . Shid' lhang the' ta" ngaid qere: madam: vae" ta" lo: ngaid: kyi: .6 Alao" Mo"so wa la hug' thaui: mae" Yoba' re mho: ru wa ,7 sulhe: pho" re" ru: phyid' cui: cui: wa, . Ngo myid' ra" akhyo re phyid wa, .8 Nao gai gai: yao: Nga" tarha" dao: re lhau: phyo' nae" i"? Nao dang main" ru qo" sho' Ngo re qobo vhin nae" i"?9 Ni" lo, lam: Mo"so: lo, lam: ru" ru ngaid: i"? Yao: re" ru: mug: dam: thoe qo" ke' nae" i"?10 Phung bao we' nga: bo: ru ve; ci wa, . Kheim: so' qam: o" yang shaung yhaung" ci wa, .11 Nao nhag' yo" ra" ru re khyo" pye' wa, . Ngaid beim" nghao" ra" mo, re qu" xam: yang: lhau: phyo' pye' wa, .12 Ngaid beim" nghao" ra" mo, re qu" xam" ci mung: nyham: khyo" pye' wa, . Tarha" macao" ra" mo, re yao: bam: na jao: mae" shao" pyao: pye' wa, .13 Yao: bam re phaui: lhug bam mae nyham" pye' wa, . Yao: bam: myo, khung: re mug: caid' khug mae nghoe' to: wa, .14 Ai ru: ngaid lao" ni" lo, yo lo, nao re qo" khyaid' yu: li" nae". Ngo re: ni" akhyo re bongaui bau: khae: yu nae".15 Qu" wa, . Nao we' daga" phain: ke' ra" xao: byin cao: (behmug) myao: wa nung: jaung re" ru: mhin: zo" ra".16 Yao" phung wa phyid' dam: mae , yao" qam: o: wa vae: gyi: jham mae bo: ra".17 Yao" sho: myi: shaug' gae re" ru: laui" nain" ra". Paung daung: sho: gyi: jham wa apaug' apyae bo: ra".18 Yao" shoqug: shoqae jham wa gyid: ne khyaung: ru" ru ngaid: ra". Yao" nae cae: qug: jham wa jo, to' thaung: we' dau: ra".19 Mo"so phain: ke' ra" gug' nyhug' jham mae gekai: lai: gug' nyhug' ngaid: ra".20 Gug' nyhug' gug' du: jham lhau sab' na: ra" bam jham wa yao" tau: zo: pho: re poe" thug' byid' na: ra".21 Yao: wa je jid: we' jam phaung: yaug: ra" tham: nheim" qid jo; ra" jo, qo mae lhaung" na ba: ra".22 Ai: thao" paung" jham yao: re nghoe' gam: to: mung: qid zo: gyaung: yae mae" jam gae jham: yang lhang" kham: to" ra".23 Qu" wa, . Qid je" li" ngaid qere: yao: magyaug ngaid: ra". Yodain: qid yao" nhaid' mae yug: zao" ngaid qere: sae za: tae" to" ra".24 Yao: lha" na: re myao: re qo" taui" yu nae" i"? Yao" nho mae nho shoe" taui: qo" jhui byid: nae" i"?