1 Yo: jham khoyo, re anau" xao" ra" ayo, re nao ba: i"? Cid' phaug' jham anau" jhui" ra" ayo, re nao xam" i"?2 Gaung la" ra" ayo, ba na jham qug: qu" mung: khau nae" ayo, akhin: re ba:3 i"? – Yao: bam wa phyid' dam: nghaug' sho' qam: phin: mung: anau" xao" pye' yang: yao: bam: zokhau no yo: lo" ra".4 Anau" jham wa qao" li" mung: din" yo mae qi" li" ko" ru we' getau khyo lae" lo" mung: yao: myhi" jhao" madam: lo lo: ko" ngaid: ra".5 Seyo: myao: lae" jham re khag' nha: lhae" ke' i"? Seyo: myao: lain: taui: re khag' qo" pheim genae" i"?6 Din" yo re yao: khug nae" yham ngo poe" ke' mung: din" pyaid' yo mae yao" na jao: ngaid: ra".7 Vogaung: mae" byu qe: thoe re yao: pe" shui manho kaid' ra". Khe' thug' ra" yaug: thoe re yao: maba: gyo" xam: ngaid: ra".8 Bam nyug lao phyo: wa yao" gyo, zo: jao: ngaid: ra". Nyug: nau" ra" mhin: zo: laung la jham re qho zo: ko" ra".9 Nung: lae" wa ni" mau" zaui: mung: ni" nung: yham mae vao laung" qaid nae" i"?10 Nung: lae" re taui" yang: yo qo" phaug' nae" i"? Mangaid: lao" ni" thao cao" mung: yo kyo' kya: te' qaid nae" i"?11 Nung: lae" wa qam: bo: ra" mathao yao: re lam nae" i"? Nao kaid' ra" mau" zo" yao: re qhaug’ gai nae" i"?12 Ni" gaug re gaug nao: jao: mae tai: qaung: mung: ni" gaug jhi mae she: ke' nae" nao yao: re lam gai nae" i"?13 Nang: ngho' wa daung phab' na: ra". Ngaid qere: nhag' myain" ra" daung mug' ngaid: ra" i"?14 Yao" au" re myid gaung mae khyo" to: mung: phaui: lhug wa ngho' au" jham re nyoe: nhao: ra".15 Su: khyid: yang the' zab kho' nae" we' zoqhid jham zab: kho' pye' genae" re: yao: magaung yug ngaid: ra".16 Yao" anau" jham re yao: we' matin" ru ru: thin thin kaid' mung: pe" gaung mayug. Aseim akeim au" khyo" pye' mung: yao: pe" shui manho ngaid: ra".17 Khoru: ga" re Mo"so wa ba jhao se" ru mabo nae" tau: phain: ke' ra". Ba se" ra" nyain: sozo: yao: re magae byid: .18 Ngaid qere: yao: daung phyid: lhu: ci mung: to" ye; na: re myao: we' myao: jui: yaug re jung" qi ba ra".19 Nao wa myao: re qam: o: ke' byid' qu" i"? Yao" lang zang: mae dao mug' nao yaug nhao: i"?20 Khyag' phaung" re" ru: xao geim tau" nhao: qu" i"? Yao" nho myang thoe wa gyaug pho: ngaid: ra".21 Yao: wa din" yo mae khyid: yang byaid yang: yao" qam: o: mae ngaid beim" nghao" zo" re" gye mo, thaui: we' qhug' nae" tau: to" ye" lo" ba: ra".22 Gyaug pho: re pe" dao" manghae" gyaug myid mabo yang: shae lhae re re: yao: majao" ngaid: ra".23 Myo: daung" we' bao qhi: ra" lhae we' go yao" adao mae khyaug khyag ga: laui" myang: na: ra".24 Nhag' lam: qi: mung: au: qao: myid we' myid zhai: re myug: pye' ba: ra". Labo" maid thoe gyo: lao" yao: sae za: qo" na nae" mangaid: .25 Labo" maid lao" yao: Ahe" ha" ga: mung: mang: khaid' ru we' gye zug: qe: amyin" dao: re , gye mo, mo" thaui: zag: hug' thoe re va: va: mae" yao: ba: na: ra".26 Zeim baung: wa nao mho" byid' ra" juyi yang daung phyid: lhu ci mung: qid bang: khyo ang ang ba: dao: nae" i"?27 Nao amyin" khyo" yang: zeim baung: amyhao khyo dao" do, mung: myhao: ra" jo, qo mae asaid' kaid' ra" i"?28 Yao: wa laung: mo" baui dao mae na mung: bam nyaug laug phyo: dao mae khug ngha: ra".29 Ai: jo, qo mae" yao" zo: pho: re qu" na mung: yao" myo, jid' wa va: va: mae" ai jham re the' myao: ra".30 Yao" anau" jham re: sa: shaug' ko" ra". Sho: mao jo; ra" khyi" yao: na: na nae" ga: mho: ra".