Yoba'-34

(SHAO GYANG" JHAM: PAUG' )

切换到福音影视网-新版圣经

  • 1 Elihu: dam: xo' ta" ru wa ,
  • 2 Myao ba se" ra" juyi bo mo, we" nga" dao: re tae" gyo: mung: gyo" xam" yu ge, .
  • 3 Nhaid' sho wa zo: pho: re tau" qu" ru re" ru: no: khye' wa dao: re gyo" shao: yu: ra".
  • 4 Ngonhaung" wa yao: yao" ave, re ca: qu" mung: gai yo: ra" akhyo re khyin: yu gelang: .
  • 5 Yoba' wa dang main" na gau ngaid: . Mo"so wa nga" mau" re seim" nhao: ra".
  • 6 Nga" so' ha" byo, sho' ngo gai: mhug' ta" nae" i"? Ngo mazai" shaid' ngaid qere: magai: byaug lo" ra" mau byin: no: dae phau: venhaung wo" ga: ta" va" ra".
  • 7 Yoba' we' dau: ru dayaug yaug na nae" i"? Qid re shaug' re" ru: jung" khyoe' ru re myug: pye' na: ra".
  • 8 Makhyang: mashab: mo, we' zam" mung: tarha" macao" ra" mo, we' daga" su" qin" ra".
  • 9 Byu wa Mo"so mae nhag' dag: na mung: pe" so' ha" nae" ga: Yoba' the' ta" ke' ava".
  • 10 Ai mung: nyain: gai mo, we" nga" dao: re tae" gyo: ge, . Zai" shaid' ru wa Mo"so we' re: qobo wa qam: mo" bo: ra" AsAng we' va" lin shao: wo".
  • 11 Byu kaid' ru we' dakhyo: dae co' phaug' li" nae". Byu wa yao" ave, we' dakhyo: main: qi" ra" qobo phau: nhao: ra".
  • 12 Gai gai: yao: Mo"so wa tarha" lhoe" nae" mangaid: . Qam: mo" bo: ra" AsAng wa dang main" ra" khyo" dao: phyid' ra".
  • 13 Mo"so re mug: myid yo: so: khoyaug qhaug' byid' i"? Na mae: na jo, mae" jo, re khag' phain: to" i"?
  • 14 Mo"so wa byu re maqu" o ngaui lo: mung: byu: kao so' solo re qab: pye' re-
  • 15 Daui madaui alhab' re dalhang: dae so' thao" lo" mung: xaosu byu wa myid phaui: lhug khyo dam: tug' lo" byaug: li" nae".
  • 16 Nao wa au: naug: sozo: du" re myid: qu" shi: wa, . Nga" dao: re re: tae" gyo" qu" shi: wa, .
  • 17 Tarha" re manug: ra" yaug wa gai: ug nae" i"? Dang main" ru kheim: so' bo: ra" yaug qobo gai: vhin nae" i"?
  • 18 Nao wa makhyang: ngaid: ra" ein: jhaung zug: re gai: mho nae" i"? Naon- haung" wa mashab ko" ngaid: ra" ein: zug: agyi qe re gai: mho nae" i"?
  • 19 Mo"so wa zug: qe: myo, nho nga: lao: re matau: ru we' myaung sho: mo, mae dai zug: qe re je: phug' myao" ru mangaid: . Mo"so wa daui nam gug' nyhug' re phain: myhung: to: va".
  • 20 Daui nam wa dazab za" ayo, mae shid: lo" ba: ra". Gae gaung: myi: mae byu wa nin" ru we' gai byaug: lo" ra". Qam: o: kheim: so' bo: ra" yaug re: khag' lo; yang mazao" ru qab: lhaui" pye' qhug' ba: ra".
  • 21 Khoru: ga" re: byu ye" lo" ra" khyo dang re Mo"so cao" qu" na: ra". Byu: khyid khu alhab' geim" re myao: na: ra".
  • 22 Tarha" macao" ra" mo, gug' na nae" mug: caid' shid zug' bao qaung daja:
  • 23 dalam: re: majo, . – Mo"so: qhid' kheim: mae tarha" dao: jho" ta" ra" au: apaug' apyae alhang lhang myid' ca: qu" maca".
  • 24 Qam: o: kheim: so' bo: ra" mo, re lao" re: mamyid' ca: qu" lo: khyug' khyo" mung: yao: bam: jo, qo mae getau: byu re qo vhin: ra".
  • 25 Ai ru: mung: yao: bam: mau" zo" re ba yang: myi" ayo, mae phyo' qheim" khyo" pye' ra".
  • 26 Yao: bam yao" qobo: mathao mae volo mo, phaung: myo, qao: tae mae qobo dae byid' ra".
  • 27 Yao: bam wa Mo"so re ha: lhaui" pye' mung: mau" zo" re gelho: mamyid: qu" lo: kaid' ko" ra".
  • 28 Ai ru: mung: masho: majhin: mo; ngug thoe wa Mo"so jhao" joe" mung: pyam" yhin" phau" na: ra" mo; ngug thoe re yao: the' gyo" na: ra".
  • 29 Mo"so ngaui pyo: nhao: ru re khoyaug qo" nhaung" khoe' genae" i"? Yao: myo, khung: lhang: phaug' re byu damyu" ngaid qere: dayaug khyo" re: khoyaug yao" myo, nhao nga: lao: re qo" the' myao: pa" nae" i"?
  • 30 Ai re" ru: myaung sho: mo, re deim: so: zag' makaid' nae" tau: makhyang: mo, re deim" nyham: khyo" ke' ra".
  • 31 Mo"so ngo re mho" shid' ru phau: va". Thao phyao: mashaid' manghung: lo: nae".
  • 32 Ngo maba: ra" ru re mho" shid' la, . Qobo the' zai" shaid' va" mung: thao phyao: mashaid' manghung: lo: na naeva" ein: Mo"so re gai: mho' bain: nae" mangaid: i"?
  • 33 Yao: to" to" ra" khyo: macao" qaid: ra" mathao nao o: khyo: cao" yang: lage, xe' li" nae" mangaid: i"? Mangaid: lao" nao yao: khyin: yu gai: mangaid: i"? Nao ba: gyo" ra" khyo: ta" qu" wa, .
  • 34 Nhag' gyang" ra" mo, ngo re dao: jhau geshao: . Juyi laba lajhao bo mo, wa nga" dao: tae" gyo: geshao: .
  • 35 Yoba' wa maba: gyo" ra" khyo: ta" shaid' va" ra". Yao: ta" dao: wa juyi dao: mangaid: .
  • 36 Yoba' wa tarha" macao" ra" yaug re" ru: dao: tau" ra" mathao lo" thao" joe" sho' lag yu ca: qu" ru phau: veshao: .
  • 37 Qobo kaid' ru za: maka" tau: lhain" ra" qobo bo: ra". Ngonhaung" phaung gaung: mae lo, pyo' pyo' mung: Mo"so re pyi qho: ra" dao: zai" myo" ke' ra" ga: mho: ra".
回到本卷目录 回到本版本目录 回到首页