1 Yoba' we" nga" dao: tae" gyo: wa, . Ngo ta" gu: alhab' re gyo" xam" yu wa, .2 Ana" ngo nga" nhaid' phung" mung: nga" sho we' dao: ta" nae".3 Nga" nhag' myid din" ru we' dakhyo: nga" dao: re: din: nae". Nga" nhaid' qid wa bao bao za" dao: ta" li" nae".4 Mo"so: Solo wa ngo re phain: to: va". Qam: mo" bo: ra" Mo"so: so' yang ngo re daui: na nhao va".5 Nao ta" nae" akhyo bo: re dam: tau: mung: ta" la, . Nao ta" nae" jin" jin" seim" nyhang" to: wa, .6 Mo"so: qhid' kheim: mae nao we' ngo daga" na: . Ngo re: myid zhai: mae" phain: to: ru ngaid va".7 Ngo mae gyaug pho: mabo pe" gyaug maca". Nga" lo, ni" dao mae la" ru mangaid: .8 Gai gai: ni" dao: ngo the' gyo" ru we' dakhyo: nao ta" ra" dao: wa-9 Ngo wa shao gyang" ra" nhag' myid bo mung: zai" shaid' ru majo, ngo mae qobo maqo". Shao shao lho" lho" ngaid: .10 Mo"so wa ngo re qobo zhaug' nae" qho: ra". Ngo re gyevo re" ru: jho: ra".11 Ngo re kyam: xao" to: mung: ngo ye" lo" nae" khyo dang re tam" kyo" jhid' to" ra" ga: nao ta" va" ra".12 Ai: ru wa shaid' va" ra". Ngo dam: ta" nae" dao: wa- gai gai: yao: Mo"so wa byu tho' qi" ra".13 Mo"so we' pe" mung: tug' shai" dao: jhau: i"? Yao: zaui" ra" mau" zo" re ca: qu" ca" nae" mangaid: i"?14 Mo"so daja" akhyo re dalhang ta" re byu xaosu qe mabeim: ko" re shid' lhang ta" kyo" ra".15 Byu wa yab nug nghoe" ru joe" li" mung: yab jaung: mae yab: myhid' na: au: yab mo, myao mung: myi" mae" lomy- hung" myao:.-16 Mo"so wa no: khye' phung" byid: mung: yao: bam re mho" shid' byid' ra".17 Ai re" ru: byu qe: myid tau" da re tam" kyo" ru we' ngaid beim" nghao" ra" nhag' myid jhid' tam" pye' byid' ra".18 Yao" nhag' myid re mang: khung: mae" , yao" kao so' re shae gye mae" khyi: yu: ra".19 Byu xaosu wa yao" yab jaung: dao mae no phyo: qhug' na mung: yao" shoqug: shoqae jham khai" nho: na: ru we' mho" shid' ru qhug' ra".20 Yao: wa zo lao" manug: zo" ru we' yao" solo wa myho' ra" zo: pho: re ca' ra".21 Yao" gaung wa yeim lo" mung: shoqug: mae shoqid za: alham: lo" ra". Mamyao: thug' ra" shoqug: jham ana" the' myao thug' ra".22 Kao so' solo wa mang: khung: nhae khyo re: phyo' qheim" ba: ra" logyo: pho" lo, khyo joe" nae" jhao" ava".23 Ngaid qere: byu re dang main" ra" khyo ceim" shid' nae" tau: mug: logyo: dataung mae je: qi" ra" yaug dayaug wa qu" gam nae". Yao" anhae mae ye; na: jo; ngaid: re-24 Mo"so yao: re nhag' myain" na mung: mang: khung: khyo magyo" vao lo: sho' yao: re khyi: khyaid' yu wa, . Yao" tau: gaung tha" xeim: myao va" ga: mho: ra". Yoba ta" dao: bin va".25 Yao" gaung sho: wa zonau" ru: nau" li" mung: zoqae zolau: ru: dam: boe" li" nae".26 Mo"so re jhaung: mho' mung: jeju khae: yu zo" ngaui bau: ngaui lho" ru we' yao" myo, khung: re the' myao: li" nae". Byu re yao" dang main" jeju so' ha" yao: dam: tug' byid' li" nae".27 Alao" yao: wa shaid' va" wo". Dang main" ra" khyo re tau: mhaug' pye' va". Ngaid qere: dae co' phaug' ru maqhug' lo: za: ,28 Ngo re lab bug mae" khyaid' khyi: yu yaug nga" kao wa mug: bo" the' myao: li" nae" ga: mang: byu: qhid' kheim: mae nghaui" caung: thoe mung: li" nae" ngaid: .29 Ai re" ru: Mo"so wa byu re dalhang lhang kaid' ba: ra".30 Yao" solo re mang: khung: mae" lhoe' yu mung: kao daui: na shi" ra" mo; bo" bao we' bao byid' ra".31 Yoba' nga" dao: re gelho: za: tae" gyo: wa, . Sae za: na: to: wa, . Ngo ta" nae".32 Ngaid qere: ta" cang bo: re dam: phaug' ta" wa, . Ngo qobo loe, nae" ru re ngo o: ra" mathao mae dao: jhau wa, .33 Ta" ca" ru mabo ngaid: re nga" dao: gyo: wa, . Ngo nao re laba lajhao juyi mho" shid' nae" ga: mho: ra".