1
Ngo wa nga" myo, jid' we' dao: so: to" to: va" ru mung: zomyi: zo: qe re khoru: gai: jhug' qu" lo: nae" i"?2
Mangaid: lao" tho' zhao" myhao mae" Mo"so wa pe" nam: so' ha" byid: nae" i"? Qam: mo" bo: ra" AsAng wa pe" jo, nho" dai kham ma byid zai i"?3
Makhyang: mashab mo, wa byo; qeim: shaid' khyo tarha" macao" ra" mo, wa gain: thao" lo" genae" mangaid: i"?4
Mo"so wa ngo ye" lo" nae" khyo dang re myao: na: gau mangaid: i"? Nga" khyid khu jham re nghe' qug: na gau mangaid: i"?5
Mhug' ra" shaid' khyo the' cao" re mhug' sham" ra" dao: ngo the' ta" va"6
ngaid: re – Main: ra" jao mae ngo re lag qu" shao: . Mo"so wa ngo dang main" ru ba veshao: .7
Ngo khyo nghung: the' su" nghung" re , nga" nhag' myid myo, jid' the' myao: ra" khyo the' cao" re , nga" lo, mae nyain: vho" ru the' zai" te' re ,8
Ngo sin" ke' ra" amyug: ashi: re su pe" zo: geshao: . Nga" qhovo: zo: jham su pe" yang phain" pye' vegeshao: .9
Ngo wa su pe" yham sang myhi" re cao" jhug' qu" mung: yham kyo: cao" kham: dung: nhae gug' goe; na: ngaid re ,10
Nga" yham sang myhi" su pe" laug lhang re ye: lao" lhang shao: . Su pe" yang nga" yham sang myhi" re jung" geshao: .11
Ai: ru wa nyain: vho: mau" ngaid: ra". Dao: phyid' gai: ra" mau" ngaid: ra".12
Ai: ru wa gain sho' nga" ra" myi: , nga" jo, nho" dai kham re sham" khyo" pye' ra" myi: ngaid: ra".13
Nga" jeim pho" jeim myhi" qe we' jho" ta" sho' nae" akhyo bo: re ngo matae" gyo: , makhae: yu ngaid: re wa ,14
Mo"so to" ye; li" ngaid re ngo khoru: kaid' nae" i"? Ngo re ca: qu" au: ngo khoru: ta" nae" i"?15
Ngo re myhung: ke' ra" Mo"so wa yao: bam re re: , myhung: ke' ru mangaid: i"? Daso za" Mo"so wa nga" shid' yaug re myhi" aung mae" khau myhung: li" nhao va" mangaid: i"?16
Ngo wa masho:majhin mo, myid: nghae" ru re tam" kyo" qu" ra" i"? Cug' mo" myhi" myo, jid' re zai" qheim" qu" ra" i"?17
Cug' zo: nau" qe re zo: pho: danhaid' kholao" mabyid: lo: . Ngo yao: za: jhain: pye' qu" ra" i"?18
Myaung sho: yaug wa yao: pho" na: ru ru: ngo we' daga" na: qi" lo va". Ngo khau myhung: ra" ba mae" mung: cug' mo" myhi" re bao" thaug' lo va".19
Mai bau: xug' khye' maqo" yang: shid: lo" ra" byu dayaug yaug we' mai pho' phyao: myhung: maqo" myaung sho: yaug re ngo the' myao mung:20
Yao" gaung khyao ngo re min mabyid' ru we' nga" yao mug' yang yao: re malam lo: na: ngaid: re-21
Vomo" kham: dung: mae ngo re qid' mung: mo, na: ra" mathao mae cug' zo: nau" qe re the' pyam" ngaid: re-22
Nga" lo, wa kin" khung" mae" byid: gyo"23
shao: . Nga" lo, gyug: veshao: . – Mo"so qobo dae byid: nae" ru re gyaug mung: yao" kheim: so' qam: o" yang mazai" shaid' lo:24
na: na va". – Ngo wa hhang re ngha mung: hhang agyang" re nao wa nga" khug ngha jao: ngaid: va" ein: ta" ru we'-25
Ngo na gai mung: jo, nho: myo: sho' qo" qaung" to: yang: ngo bau" nghao" ngaid: re ,26
Bao qhi: ra" ba mo" khye' we' bao gyang: su" na: ra" lho" re ngo tau: qu" zo" re" ,27
Nga" nhag' myid to" li" mung: nga" lo, re ngo nae: qu" ngaid re ,28
Tho' zhao" myhao mae" Mo"so re ngag: ha: pye' ru boe" mung: ai re: dao: phyid' nae" main: qi" ra" yug: no qobo ngaid: ra".29
Ngo re manug nhung: ra" yaug byo, qeim: lo" au: ngo ngaui bau" ra" i"? Yao: qug: khai: kyi" khyag' thaung" qhug' ra" au: ngo bau" nghao" qin" ra" i"?30
Ngo wa su: kao re nhang: kheim: ke' mung: yao" kao so' re qab: yu nae". Nga" nhaid' thoe: yang mho' mung: shaid' nghung" ru mangaid: .31
Nga" asang: zo: sho: re gyi: gyi: baug baug mathe' zo: ga: yang: nga" yham byu qe mae khoyaug vae" ta" genae" mangaid: .32
Bang" vo qe khyo dang mayab genae" tau: ngo wa gyaung: su: mo, re kham: phung" to: va".33
Ngo wa Adam: re" ru: ngo yao" qobo nghoe' to: mung: ngo yao" nhag' myid mae nyham" vho' to" qu" ra" i"?34
Volo byu mo, phaung mo" re gaung yug yang: ba nam sang: cao: qe jung" khyoe' genae" ru re gyaug mung: taung gaung khyo mathug' qin" lo: sae za: na nae" mangaid: .35
Byu dayaug yaug nga" dao: re tae" gyo: vegeshao: . Nga" soxam: ceru ngaid: ra". Mathao" magain qam: mo" bo: ra" Mo"so wa ngo re tau: byid: shao: . Ngo re qobo zhaug' ra" yaug tung" ra" tung" khye' re ngo the' myao shao: .36
Gai gai: yao: ai: tung" khye' re nga" lo, sin mae vo, ci nae" au: thab' re" ru: thab' ci nae".37
Nga" akhyo alhab' ngo yao: re ta" kyo: mung: zug: re" ru: ngo yao" qhid' kheim: khyo vao ye: nae".38
Nga" mug: myid ngo re qobo vhin: ru we' zag: yao: mung: khyaung: jid yang: daga" za: nyung: ngaid re39
Zaui: so" aphug' magain lo: myid mae" amyug: ashi: re ngo zo: mung: ai: asang qe re kao dau: je; ngaid: re ,40
Saung so gaug: atha" zau: gae yaug veshao: . Yho" atha" geim lau myo, yaug veshao: ga: mho: ra". Yoba' ta" dao: bin va".