1 Ai re" ru: Yoba' wa yao: dang main: beim" ra" mathao mae ai sam yaug wa yao: re pe" mata" lo: sae za: na ko" ra".2 Alao" Rama' amyu" Buzi kaung mae" Barakhela' yao: zo: Elihu: wa nhag' lam: laung: ru we' Yoba' wa Mo"so tho' mae yao: she, dang main: beim" ra" mathao: yao: re nhag' lam: qu" laung: na: ra".3 Yoba' ba nam sam yaug wa yao: mae qobo mamyao ko" qe re: yao: re dao: phyid' ko" mathao yao: bam re re: nhag' qu" yo" laung: ra".4 Elipha' wa yao: bam tho' kao ngai mung: Yoba' dao: bin: ta" sho' lao" na: ra".5 Ai bam ta" nae" gu: bin: ta" va" ru re the' myao yang: nhag' qu" gyid' ra".6 Alao" Rama' amyu" Barakhela' yao: zo: Elipha' ta" ru wa ngo wa kao ngai: , naon- haung" wa kao qi: va" mo, ngaid ko" ra". Ai ru: mung: ngo wa gyaug mung: pe" mata" lo: na va".7 Ba na ayo, myao" va" yaug wa dao: gai: ta" ra". Kao qhang mo, juyi laba lajhao mho" byid: vegeshao: ein: nug: ta" va".8 Ngaid qere: xaosu byu mae solo bo: ra". Mo"so kao qhang nhao mung: nyain: ba jhao se" bo: ra".9 Kao qi: mo, mae khonhae" re: juyi bo: ru mangaid: . Kao qi: mo, alhab' wa dang main: tarha" re ba: gyo" ru mangaid: .10 Ai mung: nga" dao: re tae" gyo" qu" ge, . Ngo wa ngo yao: myid: ru re qhu" nae".11 Naonhaung" ta" ra" dao: the' gyo: nae" tau: ngo lao" na va". Naonhaung" jho" ta" ngag ko" dao: re ngo tae" gyo: va".12 Gelho: za: tae" gyo" qu" re Yoba' re khag' mata" aung ko". Yao" dao: re khag' re: maqo" phyid ko" ngaid: ra".13 Naonhaung" wa ngonhaung" yao: juyi laba lajhao qo" the' myao va"" ga" nae" akhyo mabo ngaid: ra". Yoba' re nyham: khyo" ru wa byu mangaid: Mo"so ngaid: ra".14 Yoba' wa ngo re qang yang: ta" ru mangaid: . Naonhaung" ta" ru we' dakhyo: ngo ta" zai mangaid: .15 Yao: bam wa sae za: tae" to: mung: pe" maba: ta" lo: ko" ngaid: ra". Yao: bam ta" nae" dao: dakheim: re: mabo lo: ko" ngaid: ra".16 Yao: bam sae za: tae" to: mung: pe" re: maba: lo: ko". Ngo re: ye; jo; mung: lao" na gai nae" i"?17 Amung: ngo wa ngo yao" tau: dam: ta" nae". Ngo re: ngo yao: myid: ra" khyo: ta" nae".18 Ngo wa ta" nae" dao: byang" vin" ci: . Ngo mae bo: ra" solo wa ngo re jhain" na: ra".19 Nga" aung khug wa xug' jhid' to" ra" sabyi' qang: we' dau: ra". Baug: go; lo" na: shoqid am ru: boe" na: .20 Ngo nhag' jo, yo nae" tau: dao: jhau naeva". Ngo nhaid' phung" yang: dao: jhau naeva".21 Khag' myo, nho nga: lao: re re: matau , khag' re re: caung: khin" ra" dao: khyo" majhu".22 Su pe" re caung: khin" ra" dao: we' maba: jhu". Ai ru: kaid' re ngo re phain: yaug Mo"so wa ngo re ajao" yao: qab: lhaui" pye' li" nae".