1
Ana" kam" wa ngo tho' kao ngai: ra" mo, wa ngo re jung" ko" ra". Yao: bam: yao: pho" qe re ngo qu" ca' yang: nga" yao lhaug' ra" lakha: jham re" ru: lao" jo, qo mabyid: .2
Yao: bam qam: o: gain thao mae nga" mau" re khoru: qo" zaui: genae" i"?3
Myaung sho: moe, shab' ko" ra" mathao yao: bam mo, je we' mazam" ko", geco' ne; mae" cae: jhug tag: ra" seyo mae gyo, zo: ko" ra".4
Thao" jam" se khaung: mae zo: nam qho mung: khin" dau" vho' re khau" yu ko" ra". Bao pu gyi: wa yao: bam: zo: pho: ngaid: ra".5
Byu na: jao: mae" yao: bam re khe' thug' ke' mung: khug' mo; cang tau: re" ru: cao" zag: hug' ko" ra".6
Yao: bam wa bam nyug lao phyo: gyo: mae re: , laug aug' laug khyaung tau mae na: na ko" ra".7
Thao" jam" khug mae nyung: jhau zo" re" zau: jam" khug mae ham: na ko" ra".8
Makhyang: mashab: ra" yaug: yao: zo: qe ngaid ko" mung: khyi" khao: ngo" mae khe' thug' ru phau: ko" ra".9
Ana" kam" ngo wa yao: bam: ji: dao: ke' jao: jung" khyoe' jao: boe" venhaung i"?10
Yao: bam ngo re qu" ca' yang: va: va: mae ye; na ko" ra". Nga" myo, khung: mae khata: phoe" gyain: nae" lao" pe" shui manho ko" ngaid: ra".11
Mo"so wa ngo re yao" la" yang bag: yhin" pyam" ra" mathao mae yao: bam wa nga" qhid' kheim: nhaid' kho' taui: re lhag' ke' ko" ra".12
Pe" khyag' mathaid' ra" mo, nga" lo, yo shaid' mae to" ye, ko" ra". Nga" khyid re deim" zhain: mung: ngo re lhau: phyo' nae" seim" ko" ra".13
Ngo ye" lo" nae" khyo dang re dau" phyo' mung: ngo tha" thu: lang: shao: ga: qam: ke' kaid' to: ko" ra".14
Yao: bam re ta" peim: nae" byu mana. Dung: khung: lae mae yao: bam byaung" vao mung: alhab' re lhau: phyo' pye' ru we' ngo jhao" daga" za: byae: tao" li" ko" ra".15
Gyaug pho" ra" ru nga" adao mae joe" mung: la qam" re" ru: nga" myo, nho nga: lao: re cao" khe' yang: nga" na gai dai lho" ru wa jham thaui: re" ru: qui" dao" lo" va".16
Ana" kam" nga" nhag' lam: shoe: lo" va" qug: khai: kyi" khyag' ru wa ngo re cao" myhi: lo va".17
Myi" mae nga" shoqug: shoqae jham wa kyao" zau" no mung: sho: gyi: jham lao" din" no mung: maqo" yab ngaid: gyi: .18
Mo"so: kheim: so' yang nga" ve, mai bau: dang" lhain" lo" mung: no dae wa lang gab: re" ru: ngo re cui" te' ci: ra".19
Ngo re tham: bab: bam" mae deim" lhang" ke' mung: ngo wa phaui: lhug we' myi: qe, ru: boe" va".20
AsAng re ngo zag: yao qe re: matau: byid: . Ngo ye; jo, qe re: maqu" mageim kaid' ra".21
Ngo re qi: sho' dae byid: mung: qam: bo: ra" lo; yang yhin" pyam" va" ra".22
Ngo re la dao mae jui: nhao mung: ci: dao" lo" nhao: ra". Aug' la thaui: mae bodao" lo" nhao: ra".23
Shid: lo" ru we' daui mae" daui jham: tau: jaung: to" ra" jo, qo khyo ngo re jhui" ye" lo" nae" ru re ngo ba: ra".24
Mo"so: lo, yheim" qang: ke' au: mho' bain" tam" qe re: aje ngaid: ra". Yao: phyo' qheim" ra" au: zag: hug' ngaid qere: pe" so' ha" nae" mangaid: .25
Qug: khai: thaung" qhug' ra" mo; tau: ngo bokaug' ngug: qu" va" mangaid: i"? Myaung sho: mo; tau: ngo nhag' bomyid: khyag' qu" va" mangaid: i"?26
Ngaid qere: gai: ru re ngo myid: nghae" na qe re: qobo za: aboe" ra". Mug: bo" re myid: lao" na: re mug: caid' caid' lo: ra".27
Nga" aung khug: nhag' myid mae yaug yo: ru maqo" ngaid: ra". Qug: khai: kyi" khyag' nae" ayo, wa ngo re the' myao va" ra".28
Bo" bao sham: byaug mung: mug: caid' khug mae su" lhang: qin". Volo byu qe: agaung: mae ye, mung: ngo mho' yao: na: .29
Ngo wa zag ne jham: mao: nhaung: re: ngho' jham: zam" byin cao: boe" va".30
Nga" gaung sho: no; byaug mung: nga" shoqug: shoqid jham tang: gyoe; lo" byaug va".31
Ai mung: nga" tang: she thoe wa nyung: ra" thoe nga" khulhao: thoe wa ngug thoe za: athug' li" ra".