1
Yoba' wa dao: zham" khyo" xo' yang: dam: ta" ru wa2
Ngo wa na: lai: lo va" zin na lho" khye' jham re" ru: qo" na shi" qa: we". Mo"so gug: gam: ra" ba na mae dalhang dam: ngaid: qa: we".3
Yao" myi: baung: nga" au: dao mae bao: na mung: yao" bo" bao re pao yang: mug: caid' qe re: qo" du: su" lhau: .4
Nga" kao ngai shi" yo, nga" yham mae Mo"so ba nam kaid' ra" ayo, re" ru: dalhang dam: ngaid shao: wo".5
Ai: au: qam: mo" bo: ra" Mo"so ngo we' daga" na shi: mung: nga" zo: dau jham re: ngo re lhang" kham" na: bam ko".6
Ngo su" ye" lo" ra" khyo dang mae nung: nug' yug: ra". Laung: mo" baui mae" nga" tau: xau qid yug: thug' ra".7
Vogaung" kham: dung: khyo ngo thug' ye" lo" re khyo dang mae ngo zaung nae" jo, qo nyhang" to: ko" re ,8
Zoqae qe wa ngo re the' myao mung: vho' byaug ko" ra". Kao qi: mo, wa to" ye; byaung" na ko" ra".9
Zug: nau" qe wa dao: mavae" jhau mung: yao: yao" nhaid' re lo, vo" yang nghoe' ci ko" ra".10
Agyi khaung: mhao: qe wa sae za: tae" na ko" ra". Yao: bam: sho wa o mae de; byaug ko" ra".11
Byu qe wa nga" dao: thoe re the' gyo: ko" au: min byid: ko" ra". Ngo re the' myao lao" caung: khin" ko" ra".12
Khoru: ga" re ngo wa myaung sho: mo, re re: khug ngha jao: maqo" ra" cug' zo: jham re re: bao" khyi: yu va".13
Byo, qeim: ru qhug' lo" na: ra" yaug wa ngo re min jhaung: byid: mung: cug' mo" myhi" nhag' myid re ngaui bau: yaug yo nhao va".14
Ngo wa dang main" ru re mai bau: toe' mung: ai wa nga" ve, mai bau: ngaid va". Tarha" cao" khyao nga" bau: qhang , nga" au: thab' ngaid: ra".15
Ngo wa myo, jid mo; myo, jid' , khyid qeim mo; khyid boe" na: .16
Myaung sho: mo; yao: pho" ngo ngaid mung: ngo re maba: ra" yaug: mau" re ngo tae" gyo: byid: va".17
Makhyang: mashab: ra" yaug: zaui re nag: khyug' pye' mung: yao: lhaid' yu: to" ra" zai re yao" nhaid' mae" lao" she: yu va".18
Ngo ta" nae" ngo wa ngo yao" said' mae so' she: thao" nae"." Nga" ba na ayo, jham wa ma coe nho" myo: laug: li" nae".19
Nga" agyi: jham wa qid yae mae cin" byo: sin" li" nae". Nghin wa damyi geim" nga" akaung ako' jham dao mae khyo" gyo" genae".20
Nga" myo, nho nga: lao: wa malam: lai: abu" bu" na: li" nae". Nga" la: re: nga" lo, re qam: pyang" li" nae".21
Su geje wa nga" dao: re tae" gyo: mung: ngo byid' ra" tau" da re lao" zo" sae za: tae" to: ko" ra".22
Ngo bin ta" thao mae yao: bam pe" mata" lo: ko" ngaid: ra". Nga" dao: wa yao: bam: adao mae qid zo, ru: gyo" vao va" ra".23
Mug: qu re lao" na: re" ru: yao: bam ngo re lao" mung: la jham: yu: re myid: nghae" na: re" ru: nhaid' ho" ci ko" ra".24
Ngo yao: bam re zhaug' qu" ra" au: yao: bam ngo re malam" myid bo ko" ra". Yao: bam wa nga" myo, nho nga: lao: re makhyoe' ko" ngaid: ra".25
Ngo yao: bam cao" ye: nae" khyo re ceim" shid' mung: zug: mo" qe: tao" mae zaung: na: jo; gyezo: mo, thaui: mo" we' daga" na: ra" jhaung zug: re" ru: re: nhag' ngai: na mo, nhag' tang" byid' ra" yaug re" ru: ngo kaid' boe" na: .