Yoba'-28

(SHAO GYANG" JHAM: PAUG' )

切换到福音影视网-新版圣经

  • 1 Gai gai: yao: ngaui dau: jao: dung: khung: we' kyang" yu: ra" hhang thug' nae" jo, qo re: jo; ra".
  • 2 Jo, to' re myid gaung mae" dau" thug' yu: ra". Laug baui re phaid' mung: gyid: ne qo" ra".
  • 3 Byu wa mug: caid' re qo" phoe' pye' ra". Mug: myid akhug lo" thao" joe" sho' thau: ra" mug: caid' we' shid zug' bao qaung mae bo: ra" laug baui jham ca: qu" na: ra".
  • 4 Byu na jao: mae yao: dung: khung: dau: mung: adao mae su" lai: qin" ra" mo, ai: akhug mae na mo, mabeim: ko" ngaid: ra". Byu: agyid' mae yao: bam kacui: ru: laui: zo" re" na: na ko" ra".
  • 5 Myid gaung wa qhovo: shi: yaug: thug' byid' ra". Akhung mae wa myi" yang kyang" shao: na: ra".
  • 6 Yao" laug baui mae laug ne bo: ra". Yao" phaui: lhug bam mae hhang bo: ra".
  • 7 Khoja" ngho' jham re: maba , zeim baung" myo, jid' yang maqo" myao: khyo dang jo; ra".
  • 8 Ai: khyo dang re zoqhid jham mazab: qu" ko" ngaid: ra". Lo:tin: jham re: masu" lai: qu" ko" ngaid: ra".
  • 9 Byu wa laug baui jham re be; kho' mung: bam jham re bam khyid joe" sho' tau: mhaug' pye' ko" ra".
  • 10 Laung: mo" baui mae yao: wa qid khyo: dau: mung: phug' de; ra" ja: alhab' re the' myao: kyao" ra".
  • 11 Yug: byi: sin" ra" qid nyhang" tang" jhid' mung: vho' nyham" to" ra" ja: jham re phoe' thug' ba: ra".
  • 12 Ngaid qere: juyi re khai: mae the' myao nae" i"? Laba lajhao: apain aqao: wa khai: tau mae jo; ra" i"?
  • 13 Byu xaosu jham ai: juyi gau jho re maba ko" ngaid: ra". Kao daui: na: ra" mo; jo, qo mae mathe' myao ngaid: ra".
  • 14 No; thao" ra" jo, qo wa ngo mae mabo ga" ra" , qid dae mo" lao" ngo mae re: mabo ga: mho: ra"."
  • 15 Ai re hhang agyang" yang juyi qo" tha" yu nae" mangaid: . Ngaui re jao mae lag byid: qe re: juyi aphug' re qo" myhi: tha" nae" mangaid: .
  • 16 Ophira' hhang phug' thao" ra" Onig' laug: yang re: , Nila: laug we' re: ai re qo" vai: ru mangaid: .
  • 17 Hhang: yang re: , laug qhi pye" yang mamyhi. Hhang agyang" yang kaid' ra" xaui: ja: ve, ja: jham we' maqo" gai: jho" tha" yu ngaid: ra".
  • 18 Tain: da: we' pau: lhai: re pe" ta" cang mabo. Juyi wa laug ne tho' je: phug' de; ra".
  • 19 Khusha" mang: mae Utaphaya" ai re maqo" myhi ngaid: ra". Hhang agyang" we' re: maqo" vai: yu ngaid: ra".
  • 20 Ai mung: juyi wa khai: mae" thug' li" ra" i"? Ba jhao se" ra" apain aqao: wa khai: mae ngaid: ra" i"?
  • 21 Ai: ru daui nam alhab' myo, jid' mae" vho' nyham" byaug: ra". Mug: le; phyo: mae" ngho' jham re: qho qe re: mamyao ko".
  • 22 No; thao" ra" jo, qo we' shid zug: wa juyi lau dao: re no: mae gyo" qu" va" ga: mho ko" ra"."
  • 23 Mo"so za: juyi: akhyo re ba se" ra". Yao: wa juyi: apain aqao: re ba: ra".
  • 24 Yao: wa mug: myid yoso: thao" sho' lhang: qu" mung: mug: gaung gyid mae na mae: na re the' myao: ra".
  • 25 Yao: la qam" re lag: qu" mung: qid phaung jham re tu" ka" qu" na: ra".
  • 26 Yao: wa mug: qu nae" akhyo re nyhang" to: mung: mug: dam: dam" ru we' lhe' caid' re to" to: va" ra".
  • 27 Juyi re yao: myao mung: ci: qhu" na: ra". Juyi re ca: qu" mung: zhaug' tang: to: va" ra".
  • 28 Xaosu byu jham re re: Mo"so re gyaug phug' ru wa juyi ngaid: ru we' yug: no qobo re jao" pye' ru wa ba jhao se" nyain: ngaid: ga: mho" shid' to: va" ra" khyo mho: ra".
回到本卷目录 回到本版本目录 回到首页