1 Yoba' wa dao: zham" we' dam: ta" ru wa ,2 Nga" mau" zo" re lhau: qheim" ra" daui: na: ra" AsAng , nga" solo re yhin" ra" qam: mo" bo: ra" Mo"so daui: na: ru dang: ngaid: re ,3 Ngo kao daui: na yang: nga" nho mae Mo"so maid: zaui byid' ra" kao so' ngo mae adaui: na na wa -4 nga" nhaid' mae" madang mamain" ra" dao: mata" nae" nga" sho wa mhug' sham" pyag' ra" dao: mata" mamho lo: na nae".5 Naonhaung" nhag' myid khyo" dang main" ga: khae: yu: ru wa ngo we' va" lin shao: . Ngo shid: ra" ba na joe" sho' nga" nhag' myid din" ra" ru re ngag: pye' zai mangaid: .6 Ngo wa dang main" tarha" re zaui" zag: ci nae". Kao daui: na: dalo: gyo: mae nga" nhag' myid wa ngo yao: re qobo qo" vhin nae" mangaid: .7 Ngo re gye kaid' ra" yaug wa tarha" macao" ra" yaug ru: , ngo we' tug' shai" ra" yaug wa madang mamain" ra" yaug ru: ngaid shao: .8 Makhyang" ra" yaug wa qo" zo: qo" shaug' ngaid qere: Mo"so wa yao" solo re qab: yu: pye' re yao" myid: nghae: jao: wa pe" ngaid ra" i"?9 Yao: qug: khai: thaung" qhug' ra" au: Mo"so wa yao: zag: yao thoe re tae" gyo: byid: nae" i"?10 Ai: yaug wa qam: mo" bo: ra" Mo"so mae qo" ngaui bau: yaug yo nae" i"? Mo"so re malam: lai: qo" mho' bain" na nae" i"?11 Ngo naonhaung" re Mo"so: mau" zo" ci: qhu" nae". Mo"so: tau" da jham re ngo nyham" to: zug' to: nae" mangaid: .12 Naonhaung" yao: ai: akhyo re myao: na gau pe" mung: dao: seim jhau: na ko" i"?13 Ce ru wa makhyang: mashab: ra" yaug re Mo"so byid' ra" jhaung qhu" gae bam , se' da: be, khyaid' kaid' ra" yaug khae: yu nae" khyao kham khyao khae: wa –14 Yao" zo: myid: qe myo: laug ko" qe re: shae zo za: boe" genae". Yao" amyu" aboe: jham wa vae: moe; qid shab' ru phau: genae".15 Yao: mae dang shi" ra" gu: re shid zug: nyham" shaung: li" nae". Yao" cug' mo" jham kaug' myain" qhu: thoe gai: mung nae" mangaid: .16 Yao: wa ngaui re phaui: lhug ru: qaung" to: mung: mai bau: xug' khye' re myid au: naug: bam ru: zhang: zam" to: ngaid qere:,17 Ai: mai bau: xug' khye' jham re dang main" ra" mo, qhug' ve; li" nae". Ai: ngaui re qobo maqo" yaug gae: myho" yu: li" nae".18 Yao: kaid' ra" yham wa thaung said' re" ru: khyae lhaug' mo, kaid' ra" zaung khyae: re" ru: boe" nae".19 Jo, nho" qo" ra" yaug shid: gyang: gyo" re nyhab' shaung: ru qhug' nae" mangaid: . Myo, danyag mae yao: mana: byaug lo: nae".20 Gyaug: din: ru wa qid moe bug re" ru: yao: re cao" khe' myhi: li" nae". Myi" mae ngaid lao" wa la qam" yang ci: dao" lo" li" nae".21 Ba thug' la lo mung: yao: wa yao" jo, qo maqo" na: tang: nae". La mo" thaui: mae bobo: lo" li" nae".22 Mo"so wa nhag' mamyain: lo: yao: re qobo dae byid: yang: yao" lo, khug mae" phao: thug' lo" nug: li" nae".23 Byu jham wa yao" akhyo re lo, pyo' pyo' mung: jung" khyoe' mung: yao: re khe' thug' pye' li" genae".