1 Qam: mo" bo: ra" Mo"so wa pe" mung: ayo, akhin: re gin maphag' to" laug i"? Yao: re ba se" ra" mo, pe" mung yang: yao" ba nam jham re maba: kho' khaui: ko" i"?2 Byu daqhae: wa dang: laug: re qhui" pye' mung: su pe" caid' yao jham re lhaid' yu mung: yao" tau: zam" na ko" ra".3 Cug' zo: nau" qe: myao: re keim" lo" mung: cug' mo" myhi" jham: nung: re angha khyo" yu: yu ba ko" ra".4 Masho: majhin: mo, re khyo jhui" nghung: ko" ra". Myaung sho" ra" mang: byu qe daga" za: ham: na ko" ra".5 Seyo: myao: lae" re" ru: yao: bam wa seyo khyo ye" ru we' zo: pho: qho nae" tau: no' no' to" mung: thug' ye: ko" ra". Yao: bam: zo: dau qe yao" tau: mae gao sao yo mae zo: pho: the' myao ko" ra".6 Din" yo mae" yao: zo: nae" tau: gaug yaid: yu mung: tarha" maci: ra" yaug: sabyi' khyae mae agyo" gaug ko" ra".7 Ve, mai bau: maqo" mung: gaung cin dam: myi" re lai: lo ko" ra". Gyo, yo, mae ve, nae" mai bau: maqo" ko" ngaid: ra".8 Bam dao mae" mug: qu: yang yao: bam ajhug' abab ngaid mung: khug nae" zaung maqo"mung:laugaug'jhammaekhugko"ra".9 Daqhae: wa pho" mana lo" ra" cug' zo: nau" yao: myhi" nug' kao: byid: ko" ra". Myaung sho: mo, zai yo jo, nho" re angha khyo" yu ko" ra".10 Ai re" ru: yao: bam wa ve, mai bau: maqo" gaung: lam: shopyaid' su" qin" ru we' vae: moe; qid shab' zo" re" su pe" gaug dang: bovo, ko" ra" .11 Su pe" yham mae xau pyag' mung: vae: moe; qid shab' ru we' sabyi' pyag' xam mae sabyi' bopyag' na ko" ra" .12 Byu qe vo khug mae shid: lo" na mo, no kyang: kyang" na ko" ra" . Mo"so wa yao: bam: jhaung: mho' thoe re mayhin: byid: ngaid: ra" .13 Daqhae: wa mug: bo" re ma-o ko". Yao: bam ai: akhyo re maba: gyo: ko" . Amung: bo" bao khyo maba: cao" ko" .14 Byu se' yaug wa mug: bo" lao" to" li" mung: qug: khai: qhug' mo, we' masho: majhin: mo, re se' pye' ko" ra" . Myi" mae ngaid lao" khug' mo; boe" ko" ra" .15 Su: myi: shaid' nug yaug wa mug: caid' re lao" na: ra". Yao" myo, khung: nghoe' ci mung: khag' re: ngo re the' myao genae" mangaid: ga: ta" ko" ra" .16 Mashab makhyang: mo, myi" ayo, mae supe" yham re caid' phung" ko" ra". Yao: bam wa na" gaung re ngaid lao" vho' gug' na mung: mug: bo" re khonhae" re: mathe' myao ko" ngaid: ra" .17 Yao: bam wa ne, seim re shid zug' bao qaung re" ru: jho mung: gyaug pho" ra" shid zug' akhyo re ba ko" ra" .18 Yao: wa qid dao mae myung: gyae: mung: myid gaung: dao mae nhang: kheim: phau: mung: sabyi' khyae khyo magai: qo" te' ye: ko" ngaid: ra" .19 Mug: qid wa kin" lo" ra" khyo" re: ba zho yang: ho: lo" ra" khyo" kyaug' ho: lo" re" ru: makhyang: mashab' ra" yaug wa mo: vo: mug: mae byaug: lo" li" nae" .20 Yao: myhi" wa yao: re to" myhid' pye' li" nae". Vo, dai jham wa yao: re myho' myho' za: zo" pye' genae". Thao phyao: yao: re khoyaug re: beim: lo: nae" mangaid: . Makhyang: mashab: ra" yaug wa sag' gae re" ru: gyug' gyang: lo" ru thaung" qhug' nae".21 Ai: yaug wa bug daung: myhi" re vha" zo: mung: cug' mo" myhi" re bao" thaug' na nae" mangaid: .22 Qam: bo mo, re lao" yao" qam: o: khyo" nag: khyug' shi: nae". Shid: lo" na va" mo, re re: qo" zai" lhoe' li" nae".23 Yao: wa yao: bam re khug ngha jao: byid: mung: yao: bam ai mae khug: na genae". Yao" nhag' myid wa yao: bam re cao" qu" na: ra".24 Yao: bam wa tau: to' ru qhug' ngaid qere: dazab lao" byaug: lo" li" genae". Yao: bam nyham: khyo" ke' ru we' getau alhab' we' dakhyo: gain: thao" lo" genae". Gaug nhae jham re" ru: yaid: pye' ru qhug' genae".25 Ai ru: mangaid re ngo mhug' na: ru re khoyaug qo" ceim" shid' genae" i"? Nga" dao: thoe re khoyaug qo" ba: phyid genae" i"? ga: mho: ra".