1
Alao" Temain: amyu" Elipha' tau:2
mung: , . – Juyi bo yaug wa yao" tau: so' ha" qo" kaid' thug' ru we' dakhyo: qam: o: bo: ra" yaug wa Mo"so: tau: pe" so' ha" qo" kaid' nae" i"?3
Nao dang main" ra" mathao mae qam: mo" bo: Mo"so ngaui bau: nae" i"? Nao mae qobo made, ngaid: re ai: ru wa yao" tau: mae so' ha" ngaid: ra".4
Nao re gyaug mung: mho" shid' nae" i"? Nao we' tarha" ta" nae" vao lo nae" i"?5
Nao kaid' shaid' ra" qobo gyai qi" ra" mangaid: i"? Nao lhoe" shaid' qobo magai: gain lo: ngaid: ra".6
Nao wa mao: nhaung: qe ngha: to" ra" jo, nho" re tarha" mavao sham" yu: ra". Masho: majhin: mo; mai bau: re lhaid' khyaid' yu: ra".7
Myaung: qhaid' na: ra" yaug re shaug' qid mabyid. Vae: moe; yaug re zo mabyid: zho: ngaid: ra".8
Qam: bo: ra" yaug wa mug: myid re qo" ug: ra". Myo, nho nga: lao: lu yaug wa ai: mae gai: na nae" akhang" qo" ra".9
Cug' mo" qe re gaung cin nhao: ke' mung: cug' zo: nau" qe: lo, re khyug' va" ra".10
Ai ru: mung: lha" mae myi" ava". Gyaug: din: ra" nhag' myid we' za: thaung" qhug' qhug' mung: na: ra".11
Caid' no; jo, yang: nao magai: qid yug moe dang" yang lheim" vao lo" ra".12
Mo"so wa mug: gaung: dao mae ana: mangaid: i"? Kyi jham wa khoqhi" myhao: ru mae de, ko" mangaid: i"?13
Ai mung: nao wa Mo"so re qo" ba: i"? Cag' no; ra" jham thaui: khug mae khoru: qo" kho' khaui: nae" i"?14
Jham no, thaui" yang go: kyo" to: mung: yao: mathe' myao ngaid: ra". Mug: gaung tho' zhao" myhao mae su" qin" ra" ga: ta" na: ra".15
Khyo nghung: mo, cao" su" ra" khyo xug' gau: re nao cao" na shi: nae" i"?16
Yao: bam wa ayo, majoe" shi: re gyoe; gyo" mung: yao: bam: aqao: apain wa moe dang: mae boyug: lo" ko" ra".17
Ai bam wa Mo"so re ngonhaung" mae" thug' lo" wa, . Qam: mo" bo: Mo"so wa ngonhaung" mae pe" qo" kaid' nae" i"? ga: ta" na ko" ra".18
Ngaid qere: Mo"so wa yao: bam yham dang: re na gai ru byang" vin" nhao: ra". Makhyang: mashab mo; myid: yaung tau" da wa ngo we' va" lin shao: .19
Dang main" ra" mo, ai: akhyo re myao mung: ngaui bau: ko" ra". Qobo made, mo, yao: bam re qi" jung" pye' ko" ra".20
Gai gai: yao: ngonhaung" gyevo wa byo; qeim: lo" va". Yao: bam na gai: ra" jo, nho" nga" lo" byaug va".21
Mo"so re ba se" mung: zam" khug wa, . Ai ru: kaid' lao" na gai dai lho" nae".22
Yao" nhaid' mae" thug' ra" mho" shid' dao: re khae: yu mung: yao: ta" ra" mung dao: re nhag' khug mae xam" ci wa, .23
Qam: mo" bo: ra" AsAng jhao" dam: lhang: lo: ngaid re gang" tang: na nae". Shaid' nghung" ra" mau" re ni" yham mae qab: lhaui" pye' wa, .24
Hhang re myid phaui: lhug re" ru: , Ophira' hhang re qid zo: gyaung: mae" laug je, re" ru: qo" qaung" to" li" nae".25
Ai ru: lao" kheim: so' qi" ra" AsAng wa nao mae hhang zai ru: , nao ci yhung" ra" ngaui jhi boe" nae".26
Nao wa kheim: so' qi" ra" AsAng mae nhag' dag: na mung: Mo"so re qhug' goe; pa" nae" akhang" qo" li" nae".27
Nao jhaung: mho' ru re yao: tae" gyo: byid' li" nae". Dao: so: to" ru we' dakhyo: pyang" lhoe" byid' li" nae".28
Nao myid: nghae: tau" da: khyo: boe" lo mung: nao su" ye" lo" ra" khyo dang bo" bao bao byid' li" nae".29
Su pe" gyoe; gyo" lo" ngaid qere: nao re tau: to" nae" ga: mho: li" nae". Nhag' lam: nyham: khyo" ra" yaug re khyaid' khyi: yu: li" nae".30
Qobo mashao" yaug re lao" khyaid' yu: li" nae". Nao kaid' ra" mau" shao lho" ra" mathao yao: khyaid' yu: ru qhug' li" nae" ga: ta" ra".