1 Alao" Yoba' dam: tau: mung: ta" ru wa,2 Ana" ngo ta" nae" dao: laung: wa , ngo phau" ra" qug: khai: wa ngo re kyang" ra" tho' je: la" ra".3 Mo"so na: ra" jo, qo ngo the' myao veshao:. Yao" la kin: qhid' kheim: khyo ngo qo" vao veshao:.4 Ngo wa yao" qhid' kheim: mae nga" akhyo ta" kyo: mung: yao: we' jho" ta" nae" dao: nga" nhaid' mae zai" pyang" nae".5 Yao: ngo re dam: ta" ra" dao: ba: gyo: mung: yao: ngo re ta" gu: re ngo xam" ci nae".6 Yao: wa ngo tho' qam: je: bo mung: ngo re khang: nhau: nae" i"? Mangaid: dang dang yao: nga" dao: re tae" gyo: byid' li" nae".7 Dang main" ra" yaug wa yao" qhid' kheim: mae byin gai: qham mung: tarha" agyi wa nga" mau" re sho' sho' za: ta" sho' byid' li" nae".8 Ana" kam" wa ngo do; ye" re yao: mana. Dam: tug' lo qe re: yao: re mathe' myao.9 Lo, vai: shaid' mau" kaid' re yao: re mathe' myao. Lo, yo shaid' mae gug' na: ra" mathao ngo mathe' myao.10 Ngaid qere: yao: wa ngo ye" lo" ra" khyo dang re ba: ra". Ngo ca: qu" lag yu: ru re hhang agyang" ru: ngo thug' ye, nae".11 Nga" khu bye wa yao" khu bye we' dakhyo: cao" su" na: . Yao: to" to" ra" khyo dang re ngo cao" yang: khyo nghung: nae" mangaid: .12 Yao: ta" to" ra" mung dao: re ngo malhoe". Yao" nhaid' mae" thug' ra" mung dao: re nga" aung khug mae xam" qaung" ci nae".13 Ngaid qere: nhag' myid din" ra" Mo"so re khoyaug qo" lhai: byid: nae" i"? Yao: myid: o: khyo: kaid' li" nae" ngaid: .14 Nga" tau: nyhang" to" ra" akhyo re yao: poe" byid: mung: ai ru: mung: khyo gau: myo: sho' wa yao: we' daga" za: ngaid: ra".15 Ai ru: mung: ngo yao" qhid' kheim: din: gyaug mung: myid: nghae" qu" ra" au: AsAng wa gyaug pho: yao: ngaid: ra".16 Mo"so wa nga" nhag' myid re shoe: lo" nhao mung: qam: mo" bo: ra" Mo"so wa ngo re gyaug: din sho' kaid' qhu" va" ra".17 Khoru: ga" re mug: caid' majoe" shi: re ngo re maqab: yu. Caid' no, tham: mae" ngo re makhyaid' yu lo: nhaung i"?