1 Yoba' tau: mung: dam: mho: ru wa2 Nga" dao: re gelho: tae" gyo: mung: ngo re nhag' tang" gela, .3 Ngo re dao: jhau nae" akhang" byid: gela, . Ngo dao: bin: ta" lao" jung" nug: re jung" ge, .4 Ngo nhag' yo" nyung: ru wa byu qe: mathao ngaid: i"? Ngo pe" mung: nhag' lam: malaung zai i"?5 Ngo re zhaug' qu" zo" mug' yang: naonhaung" nhaid' re lo; yang nghoe' ci ge, .6 Gai gai: yao: ai: akhyo re ngo beim: yang: mug' byaug va". Nga" gaung sho: gyaug: nin" byaug: kyi: va".7 Makhyang: mashab mo, kao daui: na ko" ru za: maka" pe" mung: kao qi: mo, na gai nga: lho" na ko" laug i"?8 Yao: bam: zo: myid: qe wa yao: bam: lhang" gam: mae na: bam mung: yao: bam: amyu" anyaug jham wa yao: bam: qhid' kheim: mae na: bam ko" ra".9 Yao: bam: yham jham re: gyaug pho: mae" loe, mung: yaug yo: na ko" ra". Mo"so: dae se: wa yao: bam mae mazao" ngaid ko" ra".10 Yao: bam: nung: jaung jham nung: myug: cao" yang: nung: nau" axao" na ko" ra". Yao: bam: nung: jaung jham re: nung: nau" maxao" yhain" ko" ngaid: ra".11 Yao: bam: zo: dau qe wa yao phung: ru: myo" laug: lo mung: yao: bam: zo shao jham lhau sab' qin" ko" ra".12 Yao: bam wa tang: she tang: pag' mung: nghaui" mung: deim ba: thoe we' ngaui bau: ngaui yao na: bam ko" ra".13 Yao: bam: suna bang: re ngaui pyo: yaug yo za: na: lai: lo mung: nyag tin" labaug shid zug' movo: mug: khyo gyo" lo" ko" ra".14 Mo"so re re: ngonhaung" mae" thug' lo" wa, . Ni" tarha" cao" khyao re ngon- haung" maba nug.15 Qam: mo" bo: Mo"so wa khoru" yaug ngaid: i"? Yao: re jhaung: mho' yang: pe" so' ha" qo" nae" i"? ga: ba: ta" ko" ra".16 Ngaid qere: yao: bam na gai: ru re maqo" sang ko" ngaid: ra". Tarha" maci: ra" mo; myi: baung: wa shid: lo" mung: yao: bam: adao mae qug: khai" ru joe" nae". –17 Mo"so nhag' yo" gyid' mung: yao: bam re yeim: gyo" lo" nhao mung:18 Yao: bam wa la hug' au: re boe, said we' la: yang ci: dao" lo" ra" vo, phaui: re" ru: boe" ru wa khonho" lhang ngaid va" i"?19 Mo"so wa yao: bam: zo: dau qe: tau: dae se: re qaung" to: venhaung i"? Yao: re dae co' phaug' ru we' mho" shid' veshao: .20 Yao: byo, qeim: na: ru re yao" myo; yang the' myao mung: Qam: mo" bo: Mo"so: nhag' yo" gyid' ru re phau" na veshao: .21 Yao: qo" na nae" zin na lho" khye' nge; ra" au: yao" zo: dau qe re lao" yao: pe" shui nho lo: nae" mangaid: .22 Myhao: ra" jo, qo mae na: ra" mo, re mho" shid' ra" Mo"so re ba jhao se" ra" khyo mae khoyaug qo" mho" shid' genae" i"?23 Dayaug wa qam: o: byang" mung: ngaui bau: ru we' shid: lo" ba: ra".24 Yao" thaung: lhao: mae nung: nug' we' byang" mung: yao" shoqug: shoqae mae qug: khyao we' byang" vin" ra".25 Dayaug wa na gai ru khonhae" re: maqhug' qu" yang: myid myo: myid laug: ru we' shid: lai: lo" ra".26 Yao: shid' zo: myid phaui: lhug mae daga" za: lang" jo, mung: vo, dai jham nghoe' gam: to" ru qhug' ko" ra".27 Naonhaung" ngo re magai: khyo: myid mung: ngo re nhaung" khoe' ko" ra". Nga" akhyo re juyi khyug' ko" ru re ngo the' myao: ba va".28 Naonhaung" zug' yham wa khai: mae i"? Tarha" maci: ra" yaug: zaung wa khai: mae jo; ra" i"? ga: mho: li" genae".29 Khyo su" qin" ra" mo, re mamyid' qu" ko" i"? Yao: bam: sagso: ve, lho re mamyid: nghae" qu" ko" i"?30 Makhyang" ra" yaug wa qug: khai: qhug' nae" ba na: tau: khyin: to" ru ngaid: ra". Nhag' lam: yo" laung: ba na khyo jhui" lo" ru qhug' ra".31 Yao: kaid' ra" mau" zo" akhyo yao" qhid' kheim: mae khoyaug ta" kyo: ko" i"? Yao" lo, mau" zo" we' daru: za: khoyaug lage, phaug' genae" i"?32 Yao: wa nyhab' shaung nae" khyo joe" mung: yao" lab re lhaug' zaung" mo, re: nha: to" li" genae".33 Lao: khaung" zho: yhid bam mae yaug yo: na: li" nae". Matho' nghe' qug lo" ra" mo, kaid' ru we' dakhyo: byu alhab' yao" ave, re cao" lo" genae".34 Ai ru: mung: naonhaung" dam: tau" ta" ru mae madang main: ru bo mung: dao: aseim akeim we' ngo re khoru: qo" nhag' tang" genae" i"? ga: mho: ra".