1
Alao" Nemain: amyu" Zopha' dam: ta" ru wa-2
Ngo dam: ta" nae" akhyo wa nga" nhag' lam: zhau: thug' li" ra" mathao ta" nug: ra" qam: o: qi" bo: li" mung:-3
Ngo qho' phau: sho' qobo vhin: ra" dao: ngo the' gyo: mung: nga" laba lajhao nyain: nhug' peim: yang: ngo dam: ta" ru ngaid: .4
Sao qhid' aqhid: ta byu re mug: myid: dao mae na nhao: ra" ayo, mae" qhid mung: ,5
Makhyang: mashab: ra" yaug ngaui bau: yaug yo: ru wa dazab za: ngaid: ru re genhae" geco' ne, mae" jo, gau ngaid: ru re nao maba i"?6
Yao" phung bao mug: gaung joe" mung: yao" au: wa mug: gaung: jham thaui: myhi sho' ngaid qere:-7
Yao" poe' re" ru: yao: byo, qeim: lo" mung: yao: re myao: qu" va" mo, yao: khai: mae" byu ngaid: ra" i"? ga: yang: myid' li" genae".8
Yab mo, re" ru: yao: baui" lo" mung: yao: re dam: the' myao: lo: nae" mangaid: . Myi" gae gaung: mae" lamyhung" re" ru: byaug: lo" li" nae".9
Yao: re myao: qu" va" myo, jid' wa thao dalhang yao: re magai: qu" myao lo: nae". Yao" na jo, qo wa thao phyao: yao: re mamyao lo: nae".10
Yao" zo: dau qe wa masho: majhin: mo, re jhu" mung: qaung" to" ra" jo, nho" re yao" lo; yang dam: byid' li" nae".11
Yao" shoqug: shoqae wa qam: gai: ra" yo, re" ru: ngaid qere: yao: we' daga" phaui: lhug bam mae yab: lo" li" genae".12
Yug: no qobo wa yao" nhaid' mae cug myho' mung: yao" sho gyid' mae ai re nyham: zo" re" ,13
Phoe' pye' nae" o: byid ru we' yao" nhaid' khug mae ngam: ci: ngaid qere: ,14
Yao: zo" ke' ra" zo: pho: yao" vae: dug: mae tha" lhag' lo" mung: yao" aung khug mae mauibab: daug boe" li" nae".15
Yao" jo, nho" myug: ke' to: ngaid qere: dam: phoe" pye' li" nae". Mo"so wa yao" vae: dug: re aung gyui nhao: li" nae".16
Yao: wa maui bab: daug re shaug' mung: lao byug thoe: yang: shid: li" nae".17
Gyaung: zo: gyaung: zang ga" ra" nung: nug' we' byo: yhid yug: ra". Qid gyaung: jham re yao: the' myao lo: nae" mangaid: .18
Yao: qam: ke' zaui: so: mung: qo" ra" jo, nho" re yao: maqhug' zo: lo: dam: byid' pye' li" nae". Dam: byid' pye' ca" jo, nho" ngaid mung: qam: qo" ngaui bau: jao: majo, ngaid: ra".19
Yao: wa masho: majhin: mo, re khang: nhau: be, khyaid' kaid' pye' mung: yao: makaid' ra" yham re lhaid' yu: ru we'-20
Yao" aung khug nhag' myid mae ngaui bau: yaug yo: khyo re maba: ra" mathao yao: o: ngaui: ru daja: re: gai: dang nae" mangaid: .21
Yao" so' kho' o: byid ra" nhaid' mae pe" re: gai: tang: to: nae" mangaid: . Ai ru: mung: yao" jo, nho" dai kham wa gai: gang" tang: jo, nae" mangaid: .22
Jo, nho" dai kham qo" na: ra" au: lao" re: qug: khai: qhug' mung: masho: majhin: mo, alhab' yang lo, nyhug' ceim" li" genae".23
Yao" vae: dug: byang" li" na: au: mae Mo"so: nhag' lam: gyid' ru wa yao" dao mae joe" mung: yao: zo" ra" zo: pho: dao mae re: mug: qu: ke' byid' li" nae".24
Jo, to' sin: re jao" mung: phao ngaid qere: gyid: bo" la" yang bag: kyao" li" nae".25
Myo: khe' re phain" re yao" gaung mae kyao" jo; ra". Qhid qhid bao: ra" shae yao" kyid mae" thug' li" nae". Gyaug din ci" ru wa yao" dao mae joe" nae".26
Yao: qaung" to" ra" jo, nho" wa mug: caid' ru za: ngaid: ra". Byu mamaid: ra" myi: yao: re nga" li" nae". Yao" zaung mae jo, mae" jo, madang lo: sho' nga" lo" li" nae".27
Mug: gaung wa yao" qobo re ceim" shid' li" nae". Myid gaung wa yao: re qobo vhin: li" nae".28
Yao" yham na gai: ru wa byaug: lo" mung: nhag' yo" gyid' ra" ba na mae yug: lo" li" nae".29
Ai: ru wa Mo"so makhyang: mashab mo, re byid' ra" jhaung qhu" ngaid: ra". Yao" tau: mae nyhang" to" ra" jo, nho" dai kham ngaid: ra".