1
Yoba' dam: tau: yang: mho: ru wa2
Khomyhao" joe" sho' nga" nhag' lam: re lhau: zhung: mung: dao: khyo: khyo" nga" qam: re khyoe' na shi: genae" i"?3
Daxe lhang joe" sho' naonhaung" ngo re khyoe' veko". Ngo re atug' aqhui kaid' mung: naonhaung" maqho' ko" i"?4
Gai gai: yao: ngo shaid' nghung" ngaid re nga" qobo wa ngo mae za: ade, shao: .5
Naonhaung" gai gai: yao: nga" tho' je ko" mung: ngo phau" ra" aqho' axag' mathao ngo re qobo vhin nug ko" ngaid yang: re: ,6
Mo"so wa nga" akhyo re lhau: phyo' pye' mung: yao" myho: yang ngo re nghoe' gam: to" ru re beim: ge, .7
Ngo wa bao" yu gela, ein: zag: yao qe re: tau: byid: nae" byu mana. Ngo zag: hug' ngaid qere: tarha" agyi khag' mana ko".8
Ngo maqo" lai lo: sho' nga" khyo re jhid' kag' kyo" to: mung: ngo ye" lo" ra" khyo mae mug: caid' ru to" to: veko" ra".9
Nga" myo, nho nga: lao: khyoe' mung: nga" au: mae" lhugmaug re khyaid' khyo" byid: veko".10
Ngo re ceim" phyo' qheim" ko" mung: nga" kao wa bin: byaug va". Ngo myid: nghae" khyo re sag' zo: gae re" ru: naid: lhaui" pye' veko".11
Yao: ngo re nhag' lam: qu" laung mung: gyevo dayaug re" ru: ngo re jho: pye'12
va". – Yao" gye mo, thaui: jham wa joe" li" mung: nga" qhid' kheim: gyab lao: dung: dau" mung: li" ham: na veko".13
Nga" mao: nhaung: qe re: ngo mae" va" lin: lo" ra". Nga" zam" cao: qe bang" vo boe" byaug veko".14
Nga" amyu" zo: qe ngo re to: co' mung: nga" zam" byin cao: qe ngo re to" myhid' pye' veko".15
Nga" jeim jham , nga" yham byu qe wa ngo re bang" vo: re" ru: , re: gemang: gedin" byu re" ru: jho ko" ra".16
Nga" jeim re ngo khai ngaid yang: re: matau: byid: . Ngo yao: re mho' bain: ca" byaug: ra".17
Nga" yham sang myhi" wa nga" kao so' la re , nga" zo: jham wa nga" no kyang: kyang: thoe re gyo" ca' pye' ko" ra".18
Zoshao qe re: ngo re maphug' makhyaid' kaid' mung: ngo to" ye; li" lao" qi: jung" pye' ko" ra".19
Nga" ba nam sang: cao: qe wa ngo re ca' mung: ngo jhid' de; ra" mo, wa nga" gyevo boe" veko".20
Nga" shoqid wa shoqug: mae lham" byaug va". Nyain cin dam: we' za: ngo aloe, lo".21
Nga" ba nam sang: cao: qe we" Mo"so: lo, wa ngo mae zao" thaung: mung: ngo re nhag' myain: gela, nhag' myain: gela, wo".22
Mo"so ngo re yhin" pyam" re" ru: pe" mung: naonhaung" yhin" pyam" ko" i"? Khoru: mung: nga" sho: re zo: mung: nhag' madag ko" i"?23
Ana" ngo ta" ra" dao: re tung" xam" to: geshao: . Tung" dang: khug mae tung" to: vegeshao: wo".24
Apyaid ato: soxam: ngaid veshao: laung: mo" baui mae jo, to' ceim: yang co' tung" mung: xa sheim" te' to: ge, .25
Ngo re khyi: yu: ra" AsAng wa kao daui: na: ru re ngo ba: ra". Thao phyao: lo" thao" mae yao: wa myid phaui: lhug bam mae" thug' li" nae".26
Nga" shoqid ajaid abyo; ru qhug' ngaid qere: nga" sho: de; gaung yao: Mo"so re the' myao nae" ngaid: .27
Nga" gaung sho: we' yao: , yao: re nghao" qu" mung: bang" vo ru: mangaid: lo: nga" myo, jid' yang zhaug' qu" na nae". Ai: akhyo: mathao mae nga" aung khug: noce' mae no: khai" na: kyi: .28
Naonhaung" kam" wa ngonhaung" yao: re khoru: ceim" pyam" nae" i"? ga" ako". Yao: re qobo vhin nae" khyo khoru: qho gelang: yha" ga: ta" na veko" mung: -29
Shae gye re gyaug ge, . Khoru: ga" re nhag' yo" gyid' ra" shae: yang qobo dae phau: ba: ra". Qobo dae byid: nae" ayo, akhin: jo; ru re ba beim: se" ge, ga: mho: ra".