1 Alao" Temain: amyu" Elipha' dao: tau: mung: dam: ta" ru wa-2 Juyi bo: ra" yaug wa la we' gai: tau" nae" i"? Yao: yao" vae: dug: mae ba thug' la: yang gai: zai" pyang" nae" i"?3 Pe" khyag' mathaid' ra" dao seim we' byin gai: phye" nae" i"? Pe" so' ha" maqo" byid' ra" dao: we' gai: mho" shid' nae" i"?4 Nao wa Mo"so re gyaug phug' ra" ave, mae so' ha" maqo" ga: myid: ra". Jhaung: xe: mho' ra" pa" caung: mau" re tam" kyo" ra".5 Nao wa nao yao" nhaid' yang qobo re ta" shid' kyo" ra". Pyag' sham" ra" yaug: dao: re ba: ta" ra".6 Ngo wa nao re qobo mavhin. Nao yao" nhaid' wa nao re qobo vhin: ra". Ni" nhaid' dao: thoe yao: sagso: boe" va" ra".7 Nao wa sao qhid' khau yaug ngaid: i"? Bam jham re maphain: shi: re nao re phain: i"?8 Mo"so we' yaug yo cae: tae: byin qham: qu" va" i"? Juyi re nao mae alhab' qo" xeim: qaung" to: va" i"?9 Ngonhaung" maba: ru nao pe" ja: ba: i"? Ngonhaung" maca: qu" ru nao pe" nam re ca: qu" i"?10 Ni" pho" tho' kao qi" ra" au: phyu zaui ne mo, ngonhaung" mae na: bam: .11 Nao mae Mo"so byid' ra" yaug yo ngaui bau" ru nang" ra" i"? Nao mae zug' nyham" to" ru daja: ja: jo; i"?12 Nao yao" nhag' myid khyo" cao" mung: pe" mung: khyo nghung" lo" i"? Pe" mung: myo, jhin" lo" qu" na: i"?13 Ni" nhag' myid wa Mo"so we' tug' shai" nhaid' dao: thoe: yang zai" shaid' ava".14 Byu xaosu khoru" yaug ngaid mung: shao lho" nae" i"? Myiqe: mae khau: ra" yaug wa khoru: gai: dang main: nae" i"?15 Mo"so wa yao" shao lho" ra" mo, re lao" malam" ngaid: ra". Mug: nyug lasung" re: yao" qhid' kheim: mae shao lho" ru mangaid: .16 Ai ru: ngaid re anyain: avho: ru mae lhau" na mung: yug: no qobo re qid re" ru: shaug' na yaug re je: malam" ngaid: ra".17 Nga" dao: re tae" gyo: wa, . Ngo myao: ra" akhyo jham yo: kyo: nae".18 Ai: ru wa phug' pho" qe: ta mae" many- ham" to: lo: . Juyi bo mo, yo: kyo" ra" akhyo jham ngaid: ra".19 Yao" amyu" damyu" za: ai: mang: din" re maqo" ug mung: labug: amyu" khag' re maqo" zao" tin: ko" ngaid: ra".20 Makhyang: mashab: ra" yaug wa apyaid ato qug: khai: kyi" khyag' phau" ra". Su re pyam" yhin" ba: ra" yaug: tau: tau" phyid' to" ra" ayo, jo; ra".21 Yao" no: mae gyaug pho" dao: thoe the' gyo" na: ra". Yao: na gai dai lho" au: phyo' zo: yaug wa yao: jhao" joe" li" ra".22 Mug: caid' no, khug mae" yao: qo" thug' nae" nhag' nghae: jao: majo, ngaid: ra". Shae wa yao: re lao" na: ra".23 Zo: pho: cao" qho: lhang: qin" mung: khai: mae myao nae" i"? Yao" tau: jaung: to" ra" caid' no, tang" ra" ba na ayo, jo; ru yao: ba gau ngaid: ra".24 Qug: khai: kaug' qhui: ru wa yao: re kyaug' nhin" na: ra". Gye khaid' seim" jin" na: ra" jhaung zug: re" ru: yao: re aung: pye' ra".25 Ai: yaug wa Mo"so re tug' shai" mung: qam: mo" bo: Mo"so: qhid' kheim: mae yao" gaung re ngaid beim" ra".26 Au: qao: ru we' co' kyaung" yu: ra" go re ci yang: Mo"so re khe' fa nae" tau: tao" ye" lo" ra".27 Yao" myo, khung: xau nyain: boe, yang: nghoe' mung: vae: dug: re: xau: nyain yang: akain acae" ngaid: ra".28 Ngaid qere: byu sheim lao" manae: ra" vo , khag' re: mana kae" lang" lo" na: ra" yham mae yao: wa na: na: ra".29 Yao: wa gai: qo" gai: jo, nae" mangaid: . Yao" zai yo jham re: mug: myid: dao mae gai: byo: joe" nae" mangaid: .30 Yao: wa mug: caid' khug mae" qo" thug' lo: zai mangaid: . Myi: shae wa yao" anyaug jham re mhai: kyaug' pye' li" nae". Mo"so: so' hoe" ke' yang: byaug: lo" li" genae".31 Yao: wa yao" gaung re mhug' sham" pye' yang: aseim akeim re malam" shao: . Aseim akeim wa yao" o: kaung phug' boe" li" nae".32 Ayo, akhin: majoe" shi: re ai jham boe" dang nae". Yao" amyu" aboe: jham wa nyug lao qam" genae" mangaid: .33 Sabyi' naui jham re" ru: mamhang" ashi: re re: , Zhainlun: gae jham re" ru: yao" abu" jham re shu: lo" pye' nhao: li" nae".34 Makhyang: mashab' mo; phung: wa cae: jhug tag ngaid: li" nae". Khug vag: zo" ra" mo; jo, qo wa myi: nga" lo" li" nae".35 Yao: bam wa magai: ra" tau" da re gaung laui mung: yug: no qobo re khau ke' ko" ra". Yao: bam aung khug: nhag' myid mae mhug' pyag' ru re gaung laui ba: ako" ga: mho: ra".