1 Ai: akhyo jham alhab' re nga" myo; yang the' myao va". Nga" no: khye' mae the' gyo: yang: ba: gyo: va".2 Naonhaung" ba: ra" gu: re ngo ba: ra". Ngo naonhaung" tho' nyham: gyo" ru mangaid: .3 Gyag maqui: AsAng we' dao: jho" jhau nae" Mo"so we' byin jho" qham nae" akhang" qo" veshao: .4 Naonhaung" wa mhug' vhain" ra" dao: za: ba: ta" mo, ngaid ko" ra". Ci yhung: magai: ra" mocid' pho: su qe ngaid ko" ra".5 Naonhaung" dao: dakheim: re: majhau lo: na: qu" ge, . Ai ru: na ko" re dang dang juyi bo mo, ru: ngaid genae".6 Ngo ta" nae" akhyo re tae" gyo: ge, . Nga" nhaid' thoe: yang byin qham: ru re nhag' khug ke' to: ge, .7 Naonhaung" wa shui manho: ra" nhag' myid mabo lo: Mo"so shaid' mae ta" nug ko" i"? Mo"so shaid' de; na mung: mhug' vhain" dao: ta" nug shi: ko" i"?8 Naonhaung" wa yao" myo, nho nga: lao: zai" lu nhao mung: Mo"so shaid' ye, mung: jho" ngag nug shi: ko" i"?9 Naonhaung" re ca: qu" qere pe" the genae" i"? Byu re pyag' sham" ru ru: Mo"so re gai: pyag' sham" genae" i"?10 Naonhaung" avho' anyham: khyo" yao" myo, nho re tau ko" ngaid re dang dang naonhaung" mho" shid' ru qhug' genae".11 Naonhaung" yao" phung bao re maqu" gyaug ko" i"? Qu" gyaug pho" ra" ham" hung: re maqu" din ko" i"?12 Naonhaung" ta" ra" na ji: jo, khyao: dao: wa phaui: lhug tho' seim" ra". Naon- haung" khug ngha: ra" vokham" wa myid au: naug: vokham" ngaid: ra".13 Sae za: na ge, . Ngo yao: za: dao: jhau nae". Ngo mae pe" boe" re boe" veshao: .14 Ngaid qere: ngo wa ngo yao" sho: re nhaid' mae bin" ci yang: nga" kao so' re re: lo, mae zhab' ci: yang: lo" nae".15 Ngo nhag' nghae: jao: majo, lo: ngaid yang: re: yao" qhid' kheim: mae qobo bain: dao: ta" shi" nae".16 Ai ru: kaid' ngaid re nga" khyaid' yu: khyo ngaid: li" nae". Makhyang: mashab' ra" yaug wa yao" qhid' kheim: khyo qo" gai: vao zai mangaid: .17 Nga" dao: re gelho: za: gyo" xam" ci ge, . Ngo ta" ra" ru re tae" gyo: ge, .18 Nga" mau" re ana" nyhang" seim" jin" to: va". Ngo dang main" ru re ngo yao: ba gau.19 Ngo re qobo qo" ceim" shid' nae" ru khoyaug na: i"? Qo" ceim" shid' ko" re ngo sae tae" to: mung: shid: ru re khae: yu nae".20 Qobo dae byid' ra" shid' ja: re khyo" pye' byid: la, . Alao" ngo nao mae" myo, khung: lhang: phaug' lo" nae".21 Qang: to" ra" lo, she: yu byid: la, . Gyaug pho" ra" ja" yang dakyaug' tin" la, .22 Nao khai: re ngo tau: byid nae". Mangaid: lao" ngo khai: re AsAng tau: byid: la, .23 Ngo makhyang: mashab: ru we' qobo wa khonho" myo" laug: jo; ra" i"? Ngo lhoe" shaid' ra" yug: no qobo re ceim" shid' la, .24 Ni" myo, nho re nyham" pye' mung: ngo re gyevo re" ru: jho: ru pe" mathao mae i"?25 Mhin zao" la re zai" nhaung" nae" i"? Mhin: kyaug' re cao" khe' zai i"?26 Nga" akhyo re gyai qug' ra" khyo" nao tung" xam" to: nhaung. Ve, qae" ta mae zai" shaid' ra" yug: no re ana" ngo re phau: nhao nhaung.27 Nao wa nga" khyid re kyam: xao" to: mung: ngo ye" lo" nae" khyo dang khao: ngo" re xam" ci: ra". Ngo ye; na: jo, qo lhang" gam: khyae kyae" lhang" to" ra".28 Ai re" ru: phau" ra" yaug wa qeim" ze" lo" ra" mai bau: re" ru: nhug: yang zo" khyao: khyo" ra" mai bau: xug' khye' re" ru: qam: shain: ra".