1 Myiqe: mae khau: ra" xaosu byu wa kao lang" ru we' qug: khai: kyin" nhaung" we' byang" vin" ra".2 Bin: re" ru: bu" li" mung: khyug' pye' ru qhug' ra". Bao qaung re" ru: qui" lo" mung: thang: jo; ru mangaid: .3 Ai ru" ra" yaug re AsAng zhaug' qu" mung: nao we' tarha" jho" tau" nae" ngo re jhui" vhao" venhaung i"?4 Mashao magyang" ru mae" shao lho" ru re khoyaug qo" kaid' thug' nae" i"? Khoy- aug re: qo" gai: kaid' thug' nae" mangaid: .5 Byu: yo, gin ba na khyug' to: mung: yao: qo" na nae" lho" khye' re nao qug: xam" to" ru we' yao: maqo" lhoe" lai: ra" ayo, akhin: re nyhang" to: va" mathao mae6 Lao jhao: pho" re" ru: yao" ba na re zai" lhai: ke' mung: yao: dug no" ru qhug' veshao: ni" myo, khung: yao: mae" lhang: phaug' lo" wa, .7 Sag' gae lao" myid: nghae: jao: jo; shi" ra". Thau: lhang" pye' qe re: lo, bo, dam: taid' li" mung: nyug lao qam" ra" anyaug avho' jham mathang mano: taid' na: li" nae".8 Yao" agyi: wa myid gaung mae axug' boe" lo" mung: sag' sho: wa myid gaung phaui: lhug bam mae gyoe; lo" ngaid qere:,9 Qid ngaui" mathao mae lo, bo, dam: taid' li" mung: again" ru" ru dam: gain" li" nae".10 Byu xaosu wa shid mung: qeim" lo" ra". Xaosu byu kao so' thao" lao" khai: mae na: ra" i"?11 Tham: mae" qid kin" lo" re" ru: , qid gyaung: jham kin" kyaug' ho: lo" ru ru:-12 Byu wa yab: myhid' lo" mung: madam: qo" to" li" lo: . Mug: khothao" myid khothao" joe" sho' yao: mato" li" lo: , yab pyo" lo" ra".13 AsAng wa ngo re mang: khung: mae nyham" to: la, . Ni" nhag' yo" gyid' ru lai: lo" sho' ngo re nghoe' to: byid: la, . Ngo re myid: beim: nae" ayo, to" to: byid shi: la, wo".14 Byu wa shid lao" dam: gai: daui: li" shi: nae" i"? Ngo tha" lai" lo" ra" ayo, akhin: joe" sho' myaung: qhaid' taung" mau" zaui: jid: nai: yang: na: na nae".15 Ngo re khai la, . Ngo dam: tau: nae". Yao: yao: phain" phaug' to" ra" yaug re nhag' myain: shi: la, .16 Ana" kam" wa nga" khyid khu re nao nghe' qug mung: nga" qobo re xam" to: va" mangaid: i"?17 Ngo lhoe" lai: ra" akhyo jham re ni" thaung mae soxam: ce' be; te' to: va" mangaid: i"?18 Myid byo; byo' ra" bam wa gain: lo" ba ra" mangaid: i"? Laung: mo" baui jham re: yao" jo, qo mae" qui" lo" byaug ko" ra".19 Qid wa laug baui jham re aje, amain" kaid' pye' ra". Qid je" li" re phaui: lhug jham bomyung: lo" byaug ko" ra". Ai we' dakhyo: AsAng xaosu byu qe: nhag' nghae: jao: phyo' pye' ra".20 AsAng wa byu re deim" goe; to: mung: yao: wa na: lai: lo" ra". Gekai: lai: myo, nho nga: lao: re byid: mung: getau khyo nhao: ke' ra".21 Yao" zo: dau qe nga: yhe' ru qhug' ko" qe re: yao: maba lo: ngaid: ra". Nyham khyo khyo" ke' ru qhug' ko" qe re: yao: mabeim: lo: ngaid: ra".22 Yao" gaung khyao mae" zau" kyao" no: ru za: thaung" qhug' ra". Yao" nhag' lam: aung khug mae kaug' nyung yang: za: na: na: ga: mho: ra".