1 Yoshia wa Yerusalem: vomo" mae Mo"so: tau: lai loe, poe kaid' ra". Yao: bam sao qhid' khye' daxe: byid ba au: lai loe, poe2 xeim: dau: se' ako". – Khin jaung jham re yao: bam: aya: mae nha mung: pa" jhaung: yham caung da" mau" vin nae" tau: qo byid'3 ra". – Israel byu qe re mho" shid' byid' ru we' Mo"so: tau: shao gyang" ra" Levi' byu qe re khai mung: Israel jhaung zug: Davi yao: zo: Sholomun kaid' to" yham khug khyo shao gyang" bain" vo; ke' to: ge, . Thao phyao: lo, sin tau qo mavhin lo: nae". Naonhaung" Mo"so we' yao" byumyu"4 Israel re caung da" na ge, . – Israel jhaung zug: Davi we' zo: Sholomun tung" to" we' dakhyo: phug' pho" qe: byu kaung khyo" cao" yang: yao" mo, zhain yao: caung da"5 na ge, . – Yao: boe: yao: we' tin" ra" naon- haung" mao: nhaung: aboe: cao" yang: shao gyang" jo, qo mae ye; na zo" Levi' byu qere: khag' re: khag' yao" aboe: cao" yang: yao" mo, zhain yao: ngaid: na geshao: . –6 Moshe khyo" Mo"so mho: to" khyo: yao: yao" mao: nhaung: qe re caung da" nae" tau: lai loe, poe xeim: dau: se' mung: yao: yao" gaung shao kyang" ge, ga: mho: ra".7 Dam: Yoshia wa qham: na ko" mo, byu qe: lai loe, poe xeim: dau: kaid' nae" yao caid' phaung mae" yao caid' nau" sam tug we' nung: lo: sam taung byid' ra". Ai wa8 jhaung zug' jo, nho" mae" ngaid: . – Yao" khaung: mhao: , zug: qe re: byid: nug: kao bau: myid: yang byu qe , khin jaung jham , Levi' byu bam re byid' ako". Pa" jhaung: yham ug Hilikia , Zekharia , Yehiela bam wa khin jaung qe re lai loe, poe xeim: dau: ga: yao caid' shid' taung: khyaug' yo we' nung: lo: sam yo dau: phoe' byid' ako". –9 Khonia we' yao: nhaung: Shemaia , Neth- anela re: , Levi' ade, qe Hashabia , Yeiela , Yozabad re: , Levi' byu qe re lai loe, poe xeim: dau: kaid' nae" tau: yao caid' ngo" taung we' nung: lo: ngo" yo dau: phoe' byid' ako".10 Ai ru: jhaung zug: amyin" we' dakhyo: ai caung da" mau" seim" nyhang" kyab' mung: khin jaung qe yao: yao" jo, qo tau ,Levi' byu qe wa yao: yaug yao" mo,11 thaui: khyo" ye; na: ako". – Yao: bam wa ai: lai loe, poe xeim: dau: re se' mung: khin jaung qe yao: yao" lo, nyhug' yang sa: pyi" sin: yang: Levi' byu qe wa sho: qid12 qhid' ako". – Moshe: jham: mae tung" to" khyo: Mo"so jhao" xeim: tang byid: nae" tau: mang: byu qe: akaung aboe: khyo" cao" yang: yao: phung: phung: re gae byid: nae" ga: phaid' ngaui" xeim: kho' jaung:13 to" ako". – Li jo; we' dakhyo: lai loe, poe xeim: dau: re myi: mae kao: ako". Shao gyang" xeim: dau: jham re yae: , xau ug' , ug' mo" pye: mae jho' mung: mang: byu qe14 jhao" mye, za: gae: myho" byid' ako". – Ai: thao yao: bam wa yao: yao" tau: we' khin jaung qe: tau: nyhang" ako". Arun" zo: khin jaung qe wa phaid' ngaui" xeim: to' byid: nae" tau: myi" thao joe" sho' seim" na ko" ra". Ai: mathao Levi' byu qe wa yao: yao" tau: re: , Arun" zo: khin jaung qe: tau: re:15 seim" nyhang" ako". – Davi we' jhaung zug' lapa qe Asab , Hemon , Yeduthun bam khyo" mhai" to" we' dakhyo: nghaui" caung" ra" Asab zo: myid: qe wa yao: bam: na jao: mae na: na: ako". Kham: zaung" mo, re: kham: khao: ngo" mae ye; na: bam: ako". Yao: bam: mao: nhaung: Levi' byu qe wa yao: bam: tau: seim" nyhang" byid' to: veko" mathao yao: bam: mau" yho" nae" khyo mabo.16 Jhaung zug: Yoshia khang" to" we' dakhyo: lai loe, poe kaid' zo: nae" re: , Mo"so: ngaui" phain dao phaid' ngaui" xeim: to' nae" re: , Mo"so re caung da" nae" mau" ai: daba: gu: mae bin: seim" jin"17 to: veko". – Daga" zang" qham: na: Israel zo: myid: qe wa ai: ayo, lai loe, poe we' bai" phaui: mabo: cinmain" zo" ra" poe re18 nhaid' ba lam: lam: kaid' na: ako". – Lapa Samuela ta mae" ana" ba joe" sho' ai ru" lai loe, poe Israel mang: mae maqhug' zo" qu" shi: . Yoshia we' khin jaung qe , Levi' byu qe daga" na: ra" Yuda mang: mae" mo, , Israel mang: mae" mo, , Yerusalem: vobyu qe seim" nyhang" ra" lai loe, poe ru: Israel jhaung zug: khag' re: maseim" nyhang" qu"19 shi: ko". – Yoshia tao" zaung daxe: she' zin au: ai: lai loe, poe kaid' zo" ako".20 Yoshia pa" jhaung: yham nyhang" bin thao Egutu jhaung zug: Nekho wa Uphared qid yae Kharakheme vo re se' aung: yu nae" tau: do, lo: ra". Yoshia wa ai re tam" nae"21 ga: ye" lo" ra". – Egutu jhaung zug: khyo" logyo: nhao: ke' mung: Yuda jhaung zug: we" nao ngo we' pe" tin" ru i? Ana" ba ngo nao re gye se' ru mangaid: . Ngo we' gye boe" na mo, re gye se' nae" ein: ngo thug' lo: ru angaid: . Ngo mye, za: zaui: nae" ru Mo"so mho: ra". Ngo we' daga" bona: Mo"so nao re wa maphyo' pye' shao: yao: we' tug' shai" mau" dakaid' ga: pin:22 ke' ra". – Ai qere: Yoshia madam: tug' lo". Nekho mho: ra". Mo"so: dao: magyo: lo: za: gye se' nae" ga: yao" gaung gekai: lai: bau: ve, zo" Megido lao: geim: gye se' jao:23 vao lo" ra". – La: bag mo; yang jhaung zug: Yoshia re bag; zao" byid' ako". Ai mung: yao: wa ngo dae de; va". Ngo re jhui" lo"24 geri: ga: yao" sin: zo: qe re mho: ra". – Sin: zo: qere: yao" lhin" dao mae" khyo" yu mung: thao mae" lhin" tau yao: re jui: nhao yang: Yerusalem: khyo jhui" lo" ko" ra". Ai: au: yao: shid: lo" mung: phug' pho" qe: lab mae shaung nyhab' ke' ako". Yoshia shid: byaug va" mathao Yuda we' Yerusalem: byu25 qe ngug mo" gyo" na: ako". – Yeremia re: Yoshia mathao kaug' ngug; na mung: caung: nghaui" ba: ra" myiqe: , yaug gai jham wa yao: bam: yao" kaug' myhain" ngug yao" ju: yang ana" ba joe" sho' Yoshia akhyo dao: zham" zham" na: ako". Ai: dao: wa Israel qe mae mho: na nae" thung" boe" mung: kaug' myain" qui thoe paug' mae tung" to" ra". –26 Yoshia zaui" lo: dang shi" yao" lo, mau" we' Mo"so: tarha" paug' mae tung" to" ru: –27 Yao: zaui" lo: gai shab: mau" , aqao: athao jao: , Israel we' Yuda jhaung zug: mhomyi: paug' mae tung" to" ra".