1 Ce: mau" bin: kyab' lo" ru we' vin tang: myid bin: qhu" thao Asuri jhaung zug: Senakhereb wa Yuda mang: khug vao lo mung: vokham" qae: to" vo jham li" lhang" kham" to: yang: ai: vo jham sang nae" da:2 to" ra". – Senakherib li" joe" mung: Yeru- salem: re gye se' nae" akhyo yaung: ru3 Hezekia myao lao" – Vomo" taung gaung mae jo; ra" qid baug; jham jhid' pye' nae" ga: khaung: mhao: , agyi byin qham cao: qe we' qham mung: ai bam ceim" bao"4 ako". – Ai: mathao byu gyai myo: zang" qham mung: Asuri jhaung zug: qe li" gelao" pe" ga: qid gyai myo: sho' qo" myao nae" ga: mho au" qid thug' dung: alhab' we' mang: gaung: mae" qid gyaung: jhid' pye'5 ako". – Hezekia wa nhag' lam: dam: qhao" yu mung: byo; pye' va" vokham" jham re dam: nyhang" zho' ru we' gye byu gai" we' damyao" za: to' pye' ra". Davi vomo" mae" Milo gyedab re tang koe; to: mung: gye zai we' go lung: myo: sho' kaid' zaui: to" ra". –6 Mang: byu qe: adao gye zug: jham jaung: nha: to: mung: vomo" kham: jao: kheim: mae" dae: ra" jo, qo mae yao: bam re khai: qham: to: yang: qam: byid: dao: jhau: ra". –7 Qam: yu mung: vae" vae" phin" na ge, . Asuri jhaung zug: we' yao: jhao" bocao: ra" mo, thaui: mo" re dagyaug , gaung dayug ge, . Nyhao" thao bo yaug wa yao" thao8 bobo yaug tho' je: qi" ra". – Yao" shaid' khyo lo, lam: qo" pyam" mo, jhaid' ngaid: . Nyhao" shaid' khyo kam" wa gye poe mae ngonhaung" re qo" gam: ra" AsAng Mo"so bo: ra" ga: ta" ra" dao: kheim: mathao: yang mang: byu qe Yuda jhaung zug: Hezekia dao: gyo" qam: qo" lam khug: ako".9 Ai: thao Asuri jhaung zug: Senakherib wa gye mo" thaui: we' daga" Lakhisha vo lo: lhang" kham" ci mung: yao" sin: zo: qe re Yerusalem: vo mae" Yuda jhaung zug: Hezekia we' Yuda mang: byu alhab'10 jhao" nhao: ke' mung: – Asuri jhaung zug: Senakherib ce ru: ga: mho: ra". Naon- haung" Yerusalem: vomo" li" lhang" kham" ru , qhug' sho' pe" re lam lao" na ko". –11 Hezekia wa ngonhaung" Mo"so wa Asuri jhaung zug' lo, mae" khyaid' yu: li" nae" ga: ta" zo" vae: moe, qid shab' phau: mung: shid qhug' nae" qhi" naonhaung" re ngaug:12 mhai" yu: pye' va" mangaid: i". – Ce Heze- kia yao: Mo"so myhao: ra" bug gaung mae" pa" kug' jao: we' yao" phain jham re sham" pye' mung: naonhaung" wa ngaui" phain dalam: za" qhid' kheim: mae pa" kug' nae" we' ai: adao nae pyo" ja: phaid' ngaui" byid: ca" nae" ga: Yuda we' Yerusalem: vobyu qe re mho: to: va" mangaid: i".13 Ngo we' nga" phug' pho" qe wa mang: khao: ngo" mae" byumyu" qe re khoru: lhaung" kaid' ra" khyo naonhaung" maba ko" i". Taung bug: byu qe: gyoe lho wa yao: yao" mang: jham re nga" lo, mae" qo"14 khyaid' yu nae" qam: bo: i". – Nga" phug' pho" qe phyo' lai: lo va" mang: din" khao: ngo" mae gyoe jham mae khora" so wa yao: yao" mang: gu: re nga" lo, mae" qo" khyaid' lhoe' yu: qu" ko". Naonhaung" mo"so wa naonhaung" re nga" lo, mae" khoru: khyid'15 yu nae". – Ai: mathao Hezekia wa naon- haung" re ce gau: khyo" mangaug; yu shao: . Yao" dao: dagyo: ge, . Taung bug; so re: yao: yao" mang: re nga" lo, mae" re: , nga" phug' pho" qe: lo, mae" re: maqo" khyaid' yu. Ai: tho' mae naonhaung" mo"so wa naonhaung" re nga" lo, mae" qo" khyaid' yu nae" mangaid: ga: pin: ke' ra".16 Yao" sin: zo: qe wa Mo"so re re: , Hezekia re re: dao: myo: sho' tug' mho:17 ako". – Ai tho' mae" labug; mang: mo"so jham wa nga" lo, mae" yao: yao" byu jham re maqo" khyaid' yu: we' dakhyo: Heze- kia lam khug; ra" Mo"so wa yao" byu qe re nga" lo, mae" magai: khyaid' yu nae" ga: Israel Mo"so AsAng re khyoe' ra" tung"18 khye' re: tung: ke' ra". – Yerusalem: vomo" re qo" se' aung: yu sho' ai: vokham" adao na: ra" byu qe re kyaug' nin" nae" we' anhaung" akhoe' kaid' nae" ga: Yuda myain" khyo" thoe mo" ke' yang: yang:19 zag: hug' na: ako". – Byu: lo; yang kaid' ra" gyoe lho akhyo jham we' Yerusalem: vomo" Mo"so re nyhoe yang: yang: jung" gaui: na: ako".20 Ai mung: yang: jhaung zug: Hezekia we' Amod zo: lapa Esaia wa ai: mathao jhaung: mho' yang: mug: gaung khyo zag:21 hug' ako". – Mo"so: yang mug: logyo: nhao: ke' mung: Asuri gyedab mae" qam: phao" kung: ra" sulhe: qe , gyezug: , gye au: she alhab' re phyo' pye' ra". Jhaung zug: re: nga: ngai: ru we' yao" mang: khyo lo" pye' ra". Yao" gyoe yham khyo vao: au: yao" aung gyo" zo: qe: yang yao: re shae we'22 zin" se' pye' ko" ra". – Ai re" khyo: Mo"so wa Hezekia we' Yerusalem: vobyu qe re Asuri jhaung zug: Senakherib lo, mae" re: , getau: gye alhab' qe: lo, mae" re: khyaid' yu mung: khyo khe' gau: khao: ngo" yao:23 bam re gelo gam byid' ra". – Byu myo: sho' Mo"so: qhid' mae" Yerusalem: khyo jhaung qhu" yu: li" mung: Yuda jhaung zug: Heze- kia re gau myo" ja: qhaug' byid: ko" ra". Ai mung: yao: wa ai: ayo, mae" byumyu" cao jab qhid' kheim: myo, nho ham: hung: qi" li" ra".24 Ai: ayo, gu: mae Hezekia wa shid nae" no no yang: Mo"so jhao" jhaung: mho' ra". Mo"so re: tau: mung: mug' pho: ve, lho yao:25 re myhao" byid' ra". – Ai qere: Hezekia wa yao: the' yu: jeju we' dakhyo: matug' byid: lo: za: nhag' lam: qi" jo; ra" mathao yao" adao mae re: , Yuda we' Yerusalem: adao26 mae re: nhag' yo" kheim: joe" ra". – Heze- kia kam" wa yao" ngaid so" nhag' myid: mathao Yerusalem: vobyu qe we' daga" nhag' lam: nyham: khyo" mung: Mo"so: nhag' yo" kheim: yao" bang: dabang" geim" yao: bam: adao majoe" lo: .27 Hezekia wa jo, nho" we' langa: ham: hung: myo: sho' qo" ra". Ai mung: hhang , ngaui , laug nyug , nae pyo" ja: , go lung: we' gau jho myhao: ra" nam aja: ja: qaung"28 to: nae" bain" jhi kaid' ra". – Gaug , sabyi' qang: sag' , xau , qaung" to: jao: zaung , gug' nyhug' acao ajab we' yao phung: lhaung" nae" yham re re: kaid' ra". –29 Mo"so: yang yao: re gyai dai nhao yang: yao" tau: vo jham re re: te: , gug' nyhug' aja: ja: re: vai: qaung: mung: kaid' ra". –30 Ai: tho' mae" Hezekia wa Gihon tho' mae qid gyaung: jhid' pye' mung: Davi vomo" ba vao khyae: khyo" pai" lhai: ke' ra". Ai re" khyo: Hezekia yao: kaid' lo: mau" ja: khao:31 ngo" mae aung myaug; khyo qo" ra". – Ai qere: yao" mang: khug mug' pho" boe" ra" akhyo Babilon: zug: qe re myid' qu" nae" tau: logyo: nhao: ke' re yao: re lag yu: qu" nae" we' yao" aung khug bo: ra" akhyo jhaid' za: qo" ba sho' Mo"so yao: re lhae" to" ra".32 Hezekia zaui" lo: dang shi" mau" jham we' yao" gai shab: akhyo jham Yuda we' Israel jhaung zug: qe ca: ra" mhomyi: Amod yao: zo: lapa Esaia myo, myhung"33 jham: mae tung" to" ra". – Hezekia wa phug' pho" qe we' daga" yab pyo" lo" mung: Davi zo: myid: qe: lab qo tho' kai" mae shaung nyhab' ke' qhug' ra". Yuda we' Yerusalem: byu qe alhab' bam: yao" lab dau: poe kaid' ru we' yao" ham: hung: re nga: byid' ako". Yao: zo: Manashe wa yao" atha" tao" zaung: ra".