1 Ai: thao Mo"ba, byu qe we' Ammon byu qe , Menuim byu damyo" wa Yehoshaphaid' re gye se' nae" ga: to" lo:2 ako". – Ai: au: byu damyo" Yehoshaphaid' re Suri mang: mae" qid lao thoe te' gau: khyo" nao re gye se' ga: mo, thaui: zang to" lo mung: yao: bam wa Engedi mang: ra" Hazazon-tama jo, qo mae gyedab zhaug'3 na: ako". – Ai: re Yehoshaphaid' gyaug mung: Mo"so re qho khyo au: am: yang: Yuda damang" geim" zo: shaug' jao" nhao:4 ra". – Yuda mang: byu qe wa Mo"so jhao" mho' yao nae" ga: zang" qham ko" ra". Yao: bam Mo"so re cao" qho nae" tau: Yuda vo khug khao: ngo" mae" thug' su" lo: ako".5 Yehoshaphaid' wa Mo"so: yham vang" jao: kheim: mae Yuda we' Yerusalem: vobyu qe: qham phaung mae ye; na zo" –6 Ngonhaung" phug' pho" qe: AsAng Mo"so we" nao wa mug: gaung: tho' mae" AsAng ngaid: mangaid: i". Nao wa taung bug mang: din" alhab' geim" mae" zug: ngaid: mangaid: i". Nao re khag' maqo" tau: lhain:7 sho' AsAng wa qam: mo" bo: ra". – Ngon- haung" Mo"so we" ce: mang: mae na: qu" va" byumyu" jham re ni" amyu" Israel qhid' kheim: mae" nao khe' myhi" pye' mung: ni" ba nam Abraham: zo: myid: re pyaid8 da du byid' to" mangaid: i". – Yao: bam ai: mang: mae na: na mung: ni" mang khyao: tau: shao gyang" jao: kaid' to" ru we' –9 Qug: khai" ru , gye khe' ru , ala: ago" , ano aphyo: , bao" khug' khug' ru jham ngon- haung" adao joe" re ni" mang khyao: wa ce: yham mae khug: na: ra" mathao ce: yham khug ni" qhid' kheim: ngonhaung" ye, mung: qug: khai: phau: zo" nao re mho' yao: au: nao tae" gyo: byid: mung: khyaid'10 yu la, ein: ta" bam va". – Ana" Israel zo: myid: qe wa Egutu mang: mae" thug' lo: re nao nhag' khyag' mung: phyo' pye' nae" akhang" mabyid: lo: za: ngonhaung" jao"11 pye' co' ra". – Ammon byu qe , Mo"ba, byu qe we' Seira bam byu qe wa nao byid' to: va" jao khae mug: mae" ngonhaung" re khe' pye' nae" ga: to" veko". Qu" wa, . Ai wa yao: bam khyo" jeju tug' ra" khyo12 ngaid: ava". – Ngonhaung" AsAng Mo"so we" yao: bam re mapyam" lo: na: na nae" i". Ngonhaung" re gye li" kaid' ra" gye thaui: mo" re ngonhaung" qam" yang qo" aung nae" mangaid: . Khoru: kaid' nae" ru ngonhaung" maba lo: . Ngonhaung" nao re13 za: aqu" zhaug' na lo" ga: mho' ra". – Yuda byu qe yao: myi: , zoshao , qi: ngai alhab' bam Mo"so: qhid' kheim: ye; na ko" ra".14 Ana" ai qham phaung jao: agaung: mae bobo: ra" Levi' kaung , Asab kaung Mata- nia , Yeiela , Benaia we' Zekharia yao: zo: Yahaziela adao Mo"so: Solo joe" gyo" li"15 mung: – Ai: yaug wa Yuda mang: geim" , Yerusalem: vobyu jham we' jhaung zug: Yehoshaphaid' we" tae" gyo: ge, . Mo"so mho: ra" ai: gye mo" thaui: mathao: yang nhag' lam: dagyug: . Nhag' dangai. Ai gye poe wa naonhaung" mau" mangaid: .16 Mo"so we' tin" ra". – Ne, mo" ba yao: bam jhao" gye to" ye: ge, . Yao: bam Ziz kha" do, lo" au: Yeruela seyo lao: geim: am: mae17 jho" qhug' genae" ngaid: . – Ai qere: naon- haung" gye se' nae" akhyo mabo. Yuda we' Yerusalem: vobyu qe we" sae za: ye; na ge, . Mo"so naonhaung" re khyaid' yu: khyo jin" qu" ke' ge, . Dagyaug. Nhag' dangai ge, . Ne, mo" ba yao: bam jhao" jhin" ye: ge, . Mo"so naonhaung" we' daga" na: na: ga:18 mho: ra". – Alao" Yehoshaphaid' myid gaung gam" goe, mung: Yuda byu qe alhab' we' Yerusalem: vobyu qere: Mo"so: qhid' kheim: gam" goe, zo" Mo"so re pa" ko"19 ra". – Levi' kaung Kohaid' we' Kora: zo: qe wa ye; na mung: qi" ra" thoe mo" khyo" Israel AsAng Mo"so re caung: khin" byid: ko" ra".20 Yao: bam thao: ne, no' re" to" mung: Teko seyo khyo ye" lo" ko" ra". Yao: bam ye" lo" na: azo" Yehoshaphaid' ye, mung: Yuda byu qe we' Yerusalem: byu qe we" tae" gyo: ge, . Naonhaung" Mo"so re lam khug; na ge, . Ai ru: lao" gang" tang: lo nae". Yao" lapa qe re re: lam ge, . Alao" aung myaug: khyo qo" genae" ga: mho:21 ra". – Mang: byu qe we' re: byin qham yang: Mo"so: nhag' khyag' myid golo gam: to" mathao shaung kin za: kaid' ci mung: caung" na ge, ga: gyemo" thaui: qhid' khyo ye" lo" nae" Mo"so re caung: nghaui" ba22 mo, re jaung: nha: to" ra". – Yao: bam caung: nghaui" ru we' nghaui" qhid: lo" ko" re Mo"so yang Yuda mang: byu qe re gye lham: khaid' nae" Ammon , Mo"ba, we' Seira bam byu qe re aphaug' alhain: khaid' byid: mung: yao: cao: gye jho" se' ko" ra". –23 Ammon we' Mo"ba, byu qe wa Seira bam byu qe re jhaid' za: qo" tam" pye' sho' qam: phin: mung: yao: bam re bin: nhau" pye' thao yao: bam yao: cao: dayaug we' dayaug jho" se' yang: shid: gain: pye' ko" ra".24 Yuda mang: byu qe wa seyo mae" gye byu gai" joe" sho' ai: mo, mo" thaui: bam re qu" ke' ko" au: yao: bam dayaug lhao" maloe, myid gaung mae shid: lang" jo; ra" mao gaung za: to, the' myao ko" ra". –25 Yehoshaphaid' we' yao" byu qe wa gyevo qe: jo, nho" sham" yu ko" au: ai: mao gaung jham mae" jo, nho" we' phug' de; ra" jo, nho" acao jab the' myao mung: khag' re: khag' matho' vo, sho' khyaid' yu ko" ra". Ai: zai saung" myo: yang: sam ba lam: lam:26 khyaid' zhang: yu ko" ra". – Byid ba ein: ba yao: bam Berakha lao: geim: mae zang" qham: na mung: ai: mae Mo"so re caung: khin" byid' ako". Ai: mathao ai: jo, qo re ana" ba joe" Berakha lao: geim: ga: mhang"27 ko" ra". – Ai: thao Yehoshaphaid' jhui" au: yang: Yuda mang: byu qe we' Yerusalem: vobyu qe alhab' ngaui bau: za: Yerusalem: vomo" khyo dam: lo: ako". Mo"so: yang gyevo qe: adao yao: bam re ngaui lho" khyo28 byid' ava". – Yao: bam wa tang: , khul- hao: , labo" maid yang: yang: Yerusalem: vo Mo"so: yham khyo joe" vao lo: ako". –29 Mo"so wa Israel byu qe: tau: gyevo qe re se' pye' byid' ra" khyo , taung bug byu qe alhab' bam the' gyo: gelao" Mo"so re gyaug30 phug' ko" ra". – Ai re" khyo: Mo"so: yang avai: ayae khyi" khao: ngo" yaug yo nhao: pye' mung: Yehoshaphaid' mang: din" myain yo za: boe" nhao: ra".31 Yehoshaphaid' kao sam xe: ngo" zin re tao" zaung mung: shid' xe: ngo: zin lam: lam: Yerusalem: mae na zo" Yuda mang: re zug' gam: ra". Yao: myhi" wa Shilahi32 myiqe: zo: Azuba ngaid: . – Yao: wa yao: pho" Asa khu xam cao" mung: Mo"so: qhid' kheim: dang main" ra". Khyo mang-33 hung: lo: cao" su" ra". – Ai qere: myhao: ra" bug gaung dao pa" kug' jao: jham re masham" pye'. Mang: byu qe wa phug' pho" qe: Mo"so re yao: yao" nhag' myid34 khyo" maba: qho shi: ko". – Dang shi" Yehoshaphaid' mhomyi: aqhid athao" joe" Israel jhaung zug: mhomyi: paug' mae re: bo: . Hanani yao: zo: Yehu tung" paug' mae35 re: tung" to" ra". – Ai: thao Yuda jhaung zug: Yehoshaphaid' wa Israel jhaung zug: Ahazia we' jho" xo' ra". Ai: yaug wa gyai36 makhyang" mau" zaui: su ngaid: . – Yao: we' daga" Tarshi khyo ye: nae" qid lha mo" zhaug' nae" ru yao: we' myid qhug' mung: ai: qid lha jham re Ezion-geba mae37 zhaug' ako". – Ai: au: Maresha byu Doda- vahu yao: zo: Elieza wa Yehoshaphaid' re nao Ahzia we' axo' ataui: kaid' na: mathao Mo"so: yang ni" mau" phyo' lhaui" pye' ava" ga: lapa pa byid' ra". Qid lha mo" re: Tarshi khyo maqo" ye: gyoe; byaug; ru qhug' ra".