1 Yehoshaphaid' wa ham: hung: we' jo, nho" myo: sho' qo" mung: Ahab jhaung2 zug: we' maung mo, ga: kaid' ra". – Zin na gyai myao" thao re Samari mang: Ahab jhao" ye qhug' ra". Ahab wa yao: we' yao" thao bocao mo; tau: yao nung: myo: sho' se' mung: Ramod-Gilaid khyo yao: we' daga"3 do, lo" nae" ga: qhi" ra". – Israel jhaung zug: Ahab wa nao ngo we' daga" Ramod- Gilaid khyo bocao nae" i" ga: Yuda jhaung zug: Yehoshaphaid' re myid' ra". Yao: wa ngo nao ru: , nga" byu qe ni" byu qe ru: ngaid: ra". Ngonhaung" nao we' daga"4 gye se' jao: bocao nae" ga: ta" ra". – Dam: Yehoshaphaid' wa ana" ba nyhao: Mo"so: dao: myid' qu" gelang: ga: Israel jhaung5 zug: re ta" ra". – Alao" Israel jhaung zug: lapa byid yo khai: qham: to: mung: ngon- haung" Ramod-Gilaid khyo gye se' do, lo" gai , magai khoru: ta" la, ga: myid' re yao: bam wa do, lo" wa, . Mo"so wa ai: vomo" re jhaung zug' lo, mae qhaug' byid: nae"6 ga: phyid: ra". – Ai qere: Yehoshaphaid' wa ngonhaung" Mo"so re qo" myid' qu" nae" lapa dayaug yaug na shi: nae" laug ga:7 myid' re – Israel jhaung zug: wa Mo"so jhao" myid' qu" nae" lapa dayaug na shi". Ai qere: ai: yaug re ngo gyid' ra". Nga" akhyo yao: magai: khyo" za: alhaung" ta" byid' ra". Ai: yaug wa Imla yao: zo: Mikha ngaid: ra" ga: Yehoshaphaid' re ta" ra". Yehoshaphaid' wa jhaung zug: we" ai ru: data" ga: mho:8 ra". – Alao" Israel jhaung zug: wa daui mung su dayaug re khai mung: Imla yao: zo: Mikha re mye, khai: lo geri: ga: ta" ke'9 ra". – Israel jhaung zug: we' Yuda jhaung zug: Yehoshaphaid' wa jhaung zug' ve, mai bau: shaung: ve, zo" Samari vomo" kham: dung: mae yao: yaug yao" zaung tao" tau zaung: na gemung: lapa qe alhab' bam: yao: tao: qhid' kheim: pa byid' na ko" ra".10 Khenana yao: zo: Zedekia wa jo, to' khyug kaid' mung: Mo"so ce ru: ga: mho: ra". Suri byu qe re qo" tam" pye' sho' ce: khyug: yang nao yao: bam re qeim: pye'11 wa, ga: mho: ra" khyo ta" ra". – Lapa qe alhab' re: Ramod-Gilaid khyo gye to" lo" mung: aung: yu wa, se, . Mo"so: yang ai: vomo" re jhaung zug: ni" lo, khug qhaug'12 byid' li" nae" ga: pa byid' ra". – Ana" Mikha re ye khai: ra" logyo: wa lapa qe alhab' bam wa gai dao: za: daqam: daqhi zhao ko" ra". Ai: mathao nao re: yao: bam we' dakhyo: gai: ra" khyo" pa byid: wa, ga: mho' ra". –13 Mo"so daui: na: we' dakhyo: nga" AsAng ngo re ta" khyo: za: ngo ta" nae" ga: Mikha ta" ra".14 Ai: lapa jhaung zug: jhao" joe" lao" Ramod-Gilaid khyo gye se' ye: gai , magai ta" la, ga: myid' re- yao: wa do, lo" mung: aung myaug; khyo yu ge, . Yao: bam re nao tao: lo, khug khyo byid' ru qhug' genae" ga:15 mho: ra". – Jhaung zug: wa Mo"so: mang we' dang main" ra" dao: mae" je yang: nao ngo re pe" re: mata" nae" tau: nao re khonho" lhang ta" peim: ca" ga: yao: re ta"16 ra". – Alao" yao: wa yao zam: mabo: yao jham ru: Israel byu qe bam mug: cao" yang: myi" sin" jo; ru ngo the' myao: . Mo"so: yang re: ce bam AsAng maqo" ko". Khag' re: khag' yao: yao" yham khyo ngaui pyo: za: tug' lo" vegeshao: ga: mho: ra" akhyo ta" ra".17 Israel jhaung zug: wa Yehoshaphaid' re ce: yaug ngo re gai dao: mazhao , magai: khyo: za: alhaung" pa byid' ra" ein: ngo nao18 re ta" va" mangaid: i" ga: ta" ra". – Mikha wa ai: mathao Mo"so: dao: tae" gyo: byid: ge, . Mo"so yao" tao" myhao mae zaung mung: mug: gaung: ajham ataung qe yao" lo, yo lo, vai: ye; na ko" ru ngo myao: . –19 Mo"so wa Israel jhaung zug: Ahab wa Ramod-Gilaid khyo do, lo" mung: lo" shid sho' khoyaug qo" ta" ngaug; yu nae" ga: ta" ra" mathao dayaug dagau: ta" ko"20 ra". – Solo dayaug Mo"so: qhid' kheim: li" ye, mung: ngo yao: re qo" ngaug; yu nae" ga: ta" ra". Mo"so: yang khoru: ngaug: yu21 nae" ga: mho: re – Ai: solo wa ngo thug' yang: yao" lapa qe alhab' bam: nhaid' mae mhug' sham" solo boe" nae" ga: dam: ta" ra". Mo"so khyo" re: nao qo" ngaug; yu: li" nae" ga: ta" ra". Ai ru: yeta" wa, ga: mho:22 ke' ra". – Ai: mathao Mo"so: yang ce ni" lapa qe: nhaid' mae mhug' ra" solo ke' to" ra". Mo"so: yang yao: ni" akhyo magai:23 khyo: za: kho" kyo" ra" ga: mho: ra". – Ai ru: mung: Khenana yao: zo: Zedekia qui" li" mung: Mikha re li" pyo' ke' mung: Mo"so: Solo nao mae qo" jaung" sho' kho gau: khyo" ngo mae" thug' lo" ru ga: ta" ra".24 Mikha wa nao khug' vho' na nae" ga: akhug; qe, khyo vao lo" nae" ba qo" the'25 myao nae" ga: ta" ra". – Israel jhaung zug: re: Mikha re taung" yu mung: vozug: Amon we' jhaung zug: nau" Yoasha lo,26 mae qhaug' ke' yang: – Ngo ngaui bau: za: dam: lo: ba joe" sho' ce yaug re kyam: lhaung" to: mung: aqug: akhai: byid: zho:27 ge, ga: pin: ke' ra". – Mikha wa dang dang nao ngaui bau: za: dam: lo: ngaid: re wa Mo"so nga" nhaid' khyo" dao: zhao nae" mangaid: . Mang: byu qe we" alhab' bam: beim: gyang" na ge, wo" ga: ta" ra".28 Ai ru: Israel jhaung zug: we' Yuda jhaung zug: Yehoshaphaid' wa Ramod-29 Gilaid khyo do, lo" ko" ra". – Israel jhaung zug: khyo" Yehoshaphaid' re ngo nga" gaung re mageim" byu khyo" ve, ci yang: gye poe vao nae". Nao lam: jhaung zug: bau: khyung ve, wa, ga: ta" ra". Israel jhaung zug: wa mageim" byu dayaug khyo" za: ve; ci mung: yao: shid' yaug30 gye poe khug vao ko" ra". – Suri jhaung zug: wa Israel jhaung zug: mae" je yang: qi: ngai khag' re re: gye dase' ge, ga: yao"31 gyelhin" zug: qe re pin: to" ra". – Gyel- hin" zug: qe Yehoshaphaid' re the' myao gelao" yao: bam ce yaug Israel jhaung zug: ngaid: ga: yao: re se' nae" tau: cao" khe' ra". Yehoshaphaid' wa zag: hug' ke' mung: Mo"so: yang yao: re bao" yu: ra".32 Mo"so yao: tao re tug' lo" nhao: ra". – Ai: yaug Israel jhaung zug: mangaid' ru gyel- hin" zug: qe the' ba gelao" macao" khe'33 lo: lhang: tug' lo" byaug ko" ra". – Byu dayaug yao" la: mageim: tau" bag: ke' re Israel jhaung zug' vae: dug: nghoe' we' qao go gyo: mae zao" bag byid: mung: yao: wa lhang wa, . Ngo re gye poe mae" jhui" thug' la, . Ngo dae de; va" ga: yao" lhin"34 keim: yaug re ta" ra". – Ai: ba dae xo sho' gye jho" se' ko" ra". Ai qere: Israel jhaung zug: wa Suri byu qe we' jho" khain: na: re myi" thao joe" yao" gye lhin" dao ngha: na mung: ba vao yo, re shid: lo" va".