1 Asa tao" zaung: ru sam xe: khyaug' zin: au: Yuda jhaung zug: Asa jhao" khag' re: vao thug' maqo" kaid' geshao: Israel jhaung zug: Basha wa Yuda mang: khyo ye: mung:2 Rama vo te" ra". – Ai lao" Asa wa Mo"so: yham jo, nho" jhi we' jhaung zug' yham jo, nho" jhi mae" ngaui hhang she: yu yang: Damasku mae zaung: ra" Suri jhaung zug:3 Ben-hadaid jhao" nhao: ke' mung: – Nga" pho" we' ni" pho" gyo: dao: so: to" to" we' dakhyo: ngo we' ni" gyo: mae re: dao: so: jo; ra". Nao jhao" ngo ngaui hhang qhaug' ke' ra". Israel jhaung zug: Basha ngo mae" thug' lo" sho' nao yao: we' to" to" ra" dao: so: ye phyo' pye' wa, ga: pin: ke' ra". –4 Ben-hadaid wa jhaung zug: Asa dao: tae" gyo: mung: yao" sin: thu qe re Israel vo khyo nhao: ke' mung: yao: bam wa Ijon vomo" , Dain: vomo" , Abela ma-im mae" ru Nabthali mang: mae" jo, nho" to" ra" vo5 jham re lhau: phyo' pye' ra". – Basha ai: akhyo the' gyo: lao" yao: Rama vo mate"6 pin" lo: ai: mau" to" pye' co' ra". – Jhaung zug: Asa wa Yuda mang: mae" mo, alhab' re khai: yu mung: Rama vo mae Basha zhag' to" laug baui jham we' sag' vo: tai: lo yang: Geba vo we' Mizapa vo te" to" ra". –7 Ai: ayo, lapa Hanani Yuda jhaung zug: Asa jhao" joe" mung: nao wa ni" AsAng Mo"so re makhug ngha lo: Suri jhaung zug: jhao" ngha: ra" mathao Suri jhaung zug: gye jham8 wa ni" lo, mae" daid: lo" veko". – Khusha: byu qe we' Lubim byu qe wa gye lhin" myo: sho' myao: jui: mo, myo: myo: we' gye mo, mo" thaui: ngaid: ra" mangaid: i". Ai qere: nao Mo"so jhao" ngha: na: ra" mathao ai bam re ni" lo, khug qhaug' byid: va". –9 Khoru: ga" re Mo"so wa dang main: mo; tau: gang" tang: khug lo laug aug' boe" nae" ga: yao" myo, myid gaung gye, ngae sho' gam" qu" na: ra". Nao wa ce: akhyo mae anghang: mau" kaid' ava". Ai mung: ana" mae" wa gye mau" byo, mau" athug' naeva"10 ga: ta" ra". – Ai: dao: kheim: mathao Asa wa lapa re nhag' yo: mung: kyam: xao" to" ra". Ai: mathao yang mang: byu qe re re:11 anhaung" akhoe' yhin" ra". – Asa zaui" lo: aqhid' athao" loe" Yuda we' Israel jhaung zug: tung" paug' mae tung" to" ra".12 Asa tao" zaung sam xe: gug zin re yao" khyid mae no de, yang: gyai no: na qere: Mo"so re maqho lo: za: mocid' pho sa: qe13 re qho: ra". – Asa phug' pho" qe we' daga" yab pyo" lo" mung: yao: tao" zaung: ru byid14 xe: dazin re shid: lo" byaug va". – Mang: byu qe yao" nghin: dam: re mocid' ba: lhag' mo, pho" to" nae pyo" ja: acao ajab: byang" sheim" to" yab jaung: dao kai" to: yang: Davi vomo" mae yao: mae" ga: yao: kyaung" to" lab mae shaung nyhab' to" ru we' yao" tau: ga: gyai qi" ra" phaid' ngaui" xeim: to' poe mo" re: kaid' ako".